ایران‌دا یاشایان ملتلر اوچون موجود رژیمله حاکمیته ادعالی اولان سلطنت‌چیلر- پهلویچیلر ایله شاه‌چیلار - آراسین‌دا هئچ بیر فرق یوخدور.

هر ایکی‌سی ده ایرق‌چی و پان‌ایرانیزمین قورویوجولاریدیر. هئچ بیری ایران‌دا یاشایان ملیتلرین ملی حقوقلارینین وئریلمه‌سینین طرفداری دئییل. بو گونه کیمی نه ملا رژیمی، نه ده کئچمیش پهلوی رژیمی طرفین‌دن ایران‌دا یاشایان ملتلره برابر حقوقلارین وئریلمه‌سی، عدالتلی بیر سیستمین یارادیلماسی حاق‌دا کیچیک ده اولسا، بیر آددیم آتیلماییب، بوندان سونرا دا ممکن گؤرونمور.

۲۰۲۳-جو یئنی ایل مناسیبتی ایله، ۳۱ دکابر آخشام ساعتلارین‌دا ایرانین بیر نئچه مخالیفت نماینده‌سی، باشدا رضا پهلوی اولماقلا بیرگه بیانات یاییب. بو بیانات‌دا، اعتراضلارین داوام ائتمه‌سی نتیجه‌سین‌ده ۲۰۲۳-جو ایلین ملا رژیمینین دئوریلجیی ایل اولدوغو قید ائدیله‌رک، بیرلییه چاغیریش ائدیلیب. لاکین بو بیاناتدا نه ایران‌دا یاشایان ملتلر و ملی حقوقا عایید بیرجه کلمه سؤز، نه ده اونلار آراسیندا بو ملتلرین بیر نماینده‌سی اولماییب.

بوندان باشقا، سون گونلر رضا پهلوی سوسیال شبکه‌لرده یاییلان بیر ویدئوسون‌دا سپاراتچی‌لیقدان دانیشارکن دئییر:

«منیم اوچون، سپاراتچی ایله اؤلکه‌میزه هجوم ائد‌ن خاریجی اؤلکه‌نین عسگری آراسیندا هئچ بیر فرق یوخدور».

قید ائدیم کی، ملا رژیمی و شاهچیلارین ساپاراتچی (تجزیه طلب) آدلاندیردیغی اینسانلار، اساساً ملی حقوقلارینی طلب ائد‌ن وطنداشلاردیر. بو ایکی رژیم، فارس دیلی و مدنیتین‌دن باشقا هئچ بیر ملتین دیلی و مدنیتینی رسمیتده تانیمیر. هر وجهله غیری-فارس ملتلرین دیل و مدنیتلرینین انکیشافینین قارشیسنی آلماغا چالیشیر.

گؤرونن اودور کی، سلطنت‌چیلر و مرکزچیلرین حاکمیتی اله آلدیغی تقدیرده، باشقا ملتلرین ایران‌دان آیریلماق‌دان باشقا چاره‌لری قالمایاجاق. بئله اولدوقدا تورک، کورد، عرب، بلوج و س. ملتلر آیریلیب اؤز دولتلرینی قورمالیدیر، عکس تقدیرده اونلار اوچون وضعیت داها دا آغیر اولاراق داوام ائد‌جک.