خوی‌دا هاوا یاغینتی‌لی و سویوق اولماسینا باخمایاراق، ائولری قزالی وضعیت‌ده اولان اهالی کوچه‌ده قالماغا مجبوردور. تکرار یئرآلتی تکانلار اولور، جماعت اوچوق ائولرینه گیرمکدن احتیاط ائدیر. هره اؤزونه دالدالانماغا بیر یئر دوزلدیب، عائله‌سی ایله قالیر. حکومتدن چادیر و سیغیناجاقلار گؤزلسک ده، وئریلمه‌ییب.

بو سؤزلری Axar.az-آ خوی شهرین‌ده یاشایان میلی فعال سورگون گونش دئییب.

وضعیتین اولدوقجا آجیناق‌لی اولدوغونو دئیه‌ن فعال باشقا شهرلردن یاردیملار گلدیینی، لاکین یئترلی اولمادیغینی بیلدیریب:

«ساکینلر شاختالی هاوادا چاره‌سیز دورومدا قالیب. میللت اؤزو بو مسئله‌نی حل ائتمه‌یه چالیشیر. بعضی ایمکان‌لی شخصلر ده کمک ائتمه‌یه سؤز وئریبلر، گؤرک، نؤوبتی گونلرده وضعیت نئجه اولاجاق. ایستی یئمک و ارزاق محصوللاری ایله معین قوروملار طرفیندن قیسمن تعمین اولونموشوق، اما چوخ آزدیر. میللی فعالار و دینج اهالی طرفیندن خویدا مرکزلر قورولوب. ایستی یئمک بعضی محله‌لره وئریلیر. آنجاق هامییا چاتمیر. آذربایجان میللتی، حقیقتن، مثبت قارشیلیق وئردی. حتی آذربایجان‌لی اولمایان دیگر میللتلردن ده یاردیم گلدی».

او، اوشاقلار و یاشلی اینسانلارین حادثه‌دن داها چوخ تاثیرلندیینی بیلدیریب:

«خویون فیروره کندین‌ده ۸۰ یاش‌لی آنا و ۵۵ یاش‌لی اوغلو چادیردا ایسینمک اوچون کؤمور قالاییب و دم گازین‌دان اؤلوبلر. بئله حادیثه‌لر ده باش وئریر. اینسانلار ایسینمک اوچون نسه ائتمه‌یه مجبوردولار، سویوغا دؤزه بیلمیرلر.

باشقا شهرده‌کی قوهوم ائولرینه گئدنلر ده چوخدور. لاکین بو موقتیدیر. اؤز ماللارینی و ائولرینی قوروماق اوچون زلزله اولان اراضی‌ده قالماغا مجبوردورلار».

مأمورلارین گؤندریلن یاردیملارا مانع اولماسی مسئله‌سینه توخونان سورگون گونش بیلدیریب کی، تهلوکه‌سیزلیک قوه‌لری آلدیقلاری امرلر اساسین‌دا ایش گؤرورلر:

«مأمورلار یاردیم ائتمک مسئله‌سینده ایکی قیسمه بؤلونوب. بعضیلری قیزیل آی آدی ایله گلیبلر، اورادا چالیشیرلار. اونلار کمک ائتمک ایستییرلر. بعضیلری ده تهلوکه‌سیزلیک قوه‌لریدیر. نیظام-اینتیظام یاراتماق آدی ایله بورادادیلار، لاکین یاردیم گلنده معین مانعه‌لر یارادیرلار. آلدیقلاری امرلر ندیرسه، اونون اساسین‌دا ایش گؤرورلر».

تورکییه و آذربایجانین یاردیم تکلیفینه ایرانین ایمتینا ائتمه‌سینی ایسه فعال بئله ایضاح ائدیب:

«ایران طرفینین بئله بیر تکلیفی قبول ائتمدیی حاقین‌دا بورادا هئچ کیم رسمی آچیقلاما وئرمه‌ییب. بونونلا باغلی هئچ نه دئمیرلر. بورادا آیری-سئچکی‌لیک مسئله‌لری وار. گونئی آذربایجان‌دا گئدن میللی مسئله‌یه گؤره ایران حاکمیتی احتیاط ائدیر».