تبریزین کیچیلمه‌سی دونه‌نین و یا بو گونون مسئله‌سی دئییل. آزی ۱۰۰-۱۵۰ ایلدیر ایران رژیمینین داوام ائد‌ن سیاستیدیر. ایران‌دا قاجارلاردان سونرا حاکمیته پهلویلر گلدی.

بو سؤزلری Axar.az-آ گونئی آذربایجان‌لی آراشدیرماچی-یازار محمد رحمانیفر تبریزین اراضی‌سینین کیچیلدیلمه‌سی ایله باغلی یارانان ناراحاتلیغی شرح ائدرکه‌ن دئییب.

پهلویلر دؤنه‌مینده گونئی آذربایجان اهالی‌سینین ایران اهالی‌سینین ۱/۳-نی تشکیل ائتدیینی دقته چاتدیران رحمانیفر اونلارین رضا خان دؤنه‌مینده بؤیوک تضییقلره معروض قالدیغینی بیلدیریب:

«تبریز شهری قاجار دؤنه‌میندن بری بیرینجی اقتصادی شهر ایدی. یاواش-یاواش تهران و اصفهان بؤیومه‌یه باشلادی، اما تبریز هله اولکی دورومونو قورویا بیلیردی. گونو-گوندن آپاریلان بو سیاست، نهایت، اؤز آجی نتیجه‌سینی وئردی. بو گون گونئی آذربایجان‌دا یاشایان آذربایجانلیلار ایرانین اوچده بیرینی یوخ، بلکه، یئددی‌ده، سککیزده بیرینی، آنجاق تشکیل ائدیرلر. چونکی گونئی آذربایجان تورکلری اؤز دوغما یوردلاریندان باشقا شهرلره کؤچمک مجبوریتینده قالیبلار. ایش و مختلیف سببلردن اونلار آذربایجانی ترک ائدیب، باشقا شهرلرده مسکونلاشیبلار».

رحمانیفر، همچینین، بودجه لاییحه‌لرینده ده گونئی آذربایجانا آز وسایت آیریلدیغینی وورغولاییب:

«ایرانین بودجه لاییحه‌سینه باخساق، گؤرریک کی، تکجه اصفهانا آیریلان وسایت گونئی آذربایجان بؤلگه‌سینه آیریلان بودجه‌دن نه قدر چوخدور. تبریزین کیچیلمه‌سی نه دئمکدیر؟ اصلین‌ده، گونئی آذربایجان کیچیلیر. بودجه‌نی فارس بؤلگه‌لرینه وئریب، اورانی آباد ائدیر. آذربایجاندا ایسه ایشسیزلیک اولاجاق، طبیعت زهرلنه‌جک، اورمو گؤلو قورودولاجاق، اینسانلار باشینی گؤتوروب فارس بؤلگه‌لرینه گئده‌جک. بئله‌لیکله ده آذربایجان کیچیله‌جکدیر. گونو-گون‌دن بؤیومک عوضینه جماعت آزالاجاق، شهرلر بالاجالاشاجاق. بو، بیر فاجعه‌دیر، پهلویلر کیمی ملا-فارس رژیمی ده بو فلاکتی گونئی آذربایجانین باشینا گتیریر».

قید ائدک کی، گونئی آذربایجاندان اولان میللت وکیلی احمد علیرضابئیگی تبریز اطرافینین آیریجا شهره چئوریلمه‌سی تکلیفینین آسانلیقلا قبول ائدیلمه‌سینی تنقید ائد‌رک، بونون شهرین اینکیشافینا مانع اولدوغونو بیلدیریب.