عزیز هموطنلریمیز مارت آیینین ۲۵-ده آوروپادا یاشایان بیر سیرا آذربایجان‌لیلار بوروکسل‌ده ایرانا قارشی اعتراض آکسییاسینا دعوت ائدیبلر. بیز همیشکی کیمی بو اعتراضا دستک وئریریک. آنجاق ندنسه آکسییا بعضی تشکیلاتلاریمیز و شخصیتلریمیزدن گیزلی ساخلانیلیب کی، بو دا یوروشه گلنلرین سایینین آز اولماسینا سبب اولاجاق.

Axar.az خبر وئریر کی، بو سؤزلری گونئی آذربایجان تلویزییاسینین (گونازتی وی) رهبری، آمریکادا مهاجیرتده یاشایان سیاسی فعال احمد اوبالی دئییب.

اوبالی یوروشون کئچیریلمه‌سینه دستک وئردیکلرینی سؤیله‌مکله یاناشی بیر سیرا ایراد و توصیه‌لرینی ده بیلدیریب:

"بیر نئچه مسئله‌یه ده توخونماق ایستییرم. بو اعتراض آکسییاسیندا اشتراک ائد‌ن بعضی سویداشلاریمیز ائشیتدییمیزه گؤره آذربایجانچیلیق خطین‌دن چیخیب ایران تورکلویو آدی آلتیندا حتی شعاری بئله دییشدیرمه‌یه چالیشیبلار "آزادلیق، عدالت، میللی حکومت" شعارینین یئرینه "آزادلیق، عدالت" شعارینی قویوبلار. حالبوکی، حرکاتیمیزین اساس شعاری "آزادلیق، عدالت، میللی حکومت"، اؤزللیکله "میللی حکومت" اونون اساس حیصه‌سی‌دیر. بیزیم میللی شعاریمیزین یئرینه پ.ک.ک-نین رهبرلرینین شعارینی ترجومه‌ده اولسا تکرار ائتمه‌مه‌لی، اساس شعاریمیز اولان میللی حکومت، میللی دولتچیلیک اطرافیندا داوام ائتملی ییک. ائشیتدییمیزه گؤره، بعضی سویداشلاریمیز ایسه گونئی آذربایجان آزادلیق حرکاتینین سیموولونو دولت بایراغی یئرینه میللته تحمیل ائتمک ایستییرلر. بیز کئچمیشده ده آنلاشدیغیمیز کیمی بو تیپلی اختلاف‌لی مسئله‌لرین گونده‌لییه چیخاریلماسینین فایدالی اولمادیغینی بیلدیریریک. اینانیریق کی، حرکاتیمیزین سیمگه‌سی اولمالیدیر، آنجاق دولت بایراغینی مجلس سئچر، میللت اونا سس وئرر".

گونازتی وی-نین رهبری دونیادا یاشایان آذربایجانلیلارین بیر دولتی اولدوغو کیمی بیر بایراقلارینین دا اولدوغونا دقت چکه‌رک، میللتین بیر بایراق آلتین‌دا بیرلشمه‌سینین واجیبلیینی وورغولاییب.

"میللی بایراغا گلینجه ایسه بیز بیر میللتیک، بیر دولت اولمالیییق و بیر بایراغیمیز وار. او دا شیمالی آذربایجان‌دا دالغالانان بایراقدیر. بونا گؤره ده هله تلسمه یک".

او، خصوصیله سون آیلار پانیرانیست و مرکزچی اوپوزیسیونون فعاللاشدیریلماسی، ایران‌دا یاشایان غیری-فارس میللتلرین، خصوصیله آذربایجان‌لیلارین حرکاتلارینی کؤلگه آلتینا سالمالاری جهدلرینه توخوناراق، بو جهدلر قارشی‌سیندا بیر معنالی مؤقع نماییش ائتدیرمه‌یه‌ن قوروم و شخصلره ایرادلارینی دیله گتیریب:

"بیز ۲۰۱۹-جو ایلده بعضی سویداشلاریمیزین نیو یورک‌دا خالق مجاهیدلری ایله گؤروشو حاقیندا دانیشاندا بیزی یالانچیلیق‌دا اتهام ائدیردیلر. آنجاق ایندی اؤزلری ویدئو چکیب و قبول ائدیبلر کی، ۲۰۱۹-جو ایلده خالق مجاهیدلری ایله گؤروشوبلر. اوندان درس آلماق اوزینه تأسفله ایندی یئنه ده بیزیم حرکاتیمیزی خالق مجاهیدلرینین بیر حیصه‌سی، اونلارین یانینداکی کیمی گؤسترمه‌یه چالیشیرلار. بو دا هم گونئی‌ده گئدن آذربایجان حرکاتینا، میللی فعاللاریمیزا تهلوکه‌دیر، اونلارین حیاتینی تهلوکه‌یه آتماق‌دیر، هم ده، حرکاتیمیزین بوتؤولویونه کؤلگه‌یه سالماقدیر. بیزیم حرکاتیمیز مستقیلدیر. بیز ایرانین و یا ایرانچیلیغین نه خالق مجاهیدلری ایله، نه شاهچیلاری ایله، نه جمهوریتچیلری ایله، نه ده باشقا قوللاری ایله عینی خطده دئییلیک. بیز اونلارین عکسینه فعالیت گؤستریریک. چونکی اونلار بیزیم حقوقلاریمیزی قبول ائتمیرلر. بو باخیمدان پان‌ایرانیزمه قارشی "گونئی آذربایجان ایران دئییل" شعاری و عینی زامان‌دا ایرانچیلیغا قارشی آذربایجانچیلیق یولوندا داوام ائتملیگیک. اومید ائدیره‌م کی، هموطنلریمیزین هامیسی ال-اله وئریب، بو اعتراضدا آنجاق آذربایجانچیلیق یولوندا اشتیراک ائد‌جکلر. کیم کی بیزیم حرکاتیمیزی آذربایجانچیلیق یولوندان جایدیریب، بیر نؤو ایرانچیلیغا سؤوق وئرک ایستییرسه بو حرکاتین قارشی‌سیندا دورموش ساییلیر. بونون ایسه حرکاتیمیزا و یا اونلارین اؤزلرینه هر هانسی بیر خیری یوخدور. اومید ائدیره‌م کی، دوستلاریمیز بو ایشلردن ال چکه‌جکلر."