۲۰۰۶-جی ایلده ایران دؤلتینین رسمی اورگانی اولان "ایران" قزئتینده تورکلری بؤجک کیمی تصویر ائد‌ن کاریکاتورا درج ائدیلدی. کاریکاتورادا بیر اوشاغین حمام بؤجیینه فارسجا وئردیی سواللارا حمام بؤجیی تورکجه جواب وئریر. یازیدا، همچینین حمام بؤجکلرینی محو ائتمیین یوللاری مذاکیره ائدیلیردی. تورکلرین دیلینه و شخصیتینه ائدیلن بو حقارته اعتراض علامتی اولاراق آذربایجانلیلار آیاغا قالخدیلار. سولدوز شهری ده بو آکسییالاردا بؤیوک قهرمانلیق گؤستردی.

بو سؤزلری Axar.az-آ گونئی‌لی شاعره شریفه جعفری خورداد قیامینین ایل دؤنومو ایله باغلی دانیشارکه‌ن دئییب.

او، ایران رژیمینین اعتراضچیلارا قارشی چوخ آمانسیز داوراندیغینی، میدانا آخیشان اینسانلارا سلاح توشلاندیغینی بیلدیریب:

«جماعت میدانلاردا ایدی. او گون اعتراض ائد‌نلر گوله‌لندی. شهیدلریمیز تورپاغا تاپشیریلدی. طبیعی کی، او زاماندا، او شرایط‌ده آذربایجان بایراغی ایله اونلاری تورپاغا تاپشیرماق ممکن دئییلدی. باسقی چوخ ایدی. چوخ چتین گونلر کئچیردیردیک. سونرالار میللی فعاللاریمیز اونلارین مزارینی زیارت ائدیب، قبرلری اوستونه آذربایجان بایراغی چکه بیلدیلر. سولدوزداکی او قانلی قیام تاریخیمیزین داها بیر آغریلی و عینی زاماندا قهرمان‌لیق گونونه چئوریلدی. بو گون ده شهیدلرین عائله‌لری ایله علاقه ساخلاییریق. اونلار خورداد قیامی ایله باغلی آجیلی خاطره‌لریندن ایلک گونکو ایستیلیگی، کدری ایله دانیشیرلار. دیلیمیزه ائدیله‌ن حقارته دؤزه بیلمه‌ییب ایران رژیمینه اعتراض ائد‌ن آکسییا قوربانلاری، شهیدلریمیز میللتیمیزین قلبینده دایما یاشاییر».

خاطرلاداق کی، ۲۰۰۶-جی ایل مایین ۲۲-دن باشلایان آکسییالار جنوبی آذربایجاندا خورداد حادثه‌لری و یا میللی قیام گونو کیمی قید ائدیلیر. رژیمین حربی قوه‌لرینین آکسییالاری یاتیرتماق اوچون مایین ۲۵-ی سولدوزدا کوچه‌یه چیخان اعتراضچیلارا آتش آچماسی نتیجه‌سینده بیر چوخ اعتراضچی یارالانیب، آزی دؤرد وطنداش - حسین فتحی‌پور، تؤحید آذریون، همت اسمی‌زاده و عسگر قاسمی شهید اولوب. همین گون قیرما گوله‌لر ایله گؤزلریندن وورولماسی نتیجه‌سینده گؤرمه قابیلیتینی ایتیره‌ن داریوش طباخی ۶ ایل سونرا بئینینده قالان قیرمانین تؤرتدیی اینفکسییا سببیله دونیاسینی دییشیب.