۱۹۴۵-۴۶-جی ایللرده جنوبی آذربایجان ملی حکومتینین باش پروکورورو اولموش فریدون ابراهیمی‌نین اعدام ائدیلمه‌سینین ایلدؤنومودور.

Axar.az خبر وئریر کی، او، ۱۹۱۸-جی ایل ۲۱ نویابردا آستارا شهرینده آنادان اولوب.

۱۹۴۳-جو ایلدن ایران خالق پارتیاسینین عضوو اولان ابراهیمی، ۱۹۴۵-جی ایلده تهران اونیورسیتتینین حقوق فاکولته‌سینی بیتیریب. طلبه‌لیک ایللرینده انقلابی حرکاتا قوشولوب و تبریز شهرینده نشر اولونان ایران خالق پارتیاسینین ارگانی اولان "خاور نو" قزئتینین رداکتورو کیمی فعالیته باشلاییب.

۱۹۴۵-جی ایلین اوکتیابر آیندا آذربایجان دموکراتیک فرقه‌سینین قورولتایندا فریدون ابراهیمی ملی مجلیسه نماینده سئچیلیب.

او، ۱۹۴۵-جی ایلین دکابر آینین ۱۲-ده آذربایجان ملی حکومتینین باش پروکورورو تعیین اولونوب. فریدون ابراهیمی ۱۹۴۶-جی ایلده پاریسده صلح کنفرانسیندا اشتراک ائدیب. او، عکس-انقلابچی قوه‌لره قارشی مبارزه آپاران "بابک" آدلی کؤنوللو دسته‌لرین تشکیلاتچیلاریندان بیری اولوب.

حقوق اوزره متخصص اولان فریدون ابراهیمی هم ده، "اطلاعات"، "آژیر"، "رهبر"، "مردم"، "ظفر"، "سیاست"، "آذربایجان" و سایر قزئتلرده دورون چاتیشمامازلیقلارینی عکس ائتدیرن پوبلیسیستیک مقاله‌لر یازیب.

۱۹۴۶-جی ایلده جنوبی آذربایجان ملی حکومتی سقوطا اوغرادیقدان سونرا بوتون اسرارلارا باخمایاراق فریدون ابراهیمی تبریزی ترک ائتمکدن امتنا ائدیر و تبریزه گیرن پهلوی اردوسو طرفیندن حبس ائدیلیر.

آمریکالی ژورنالیستلر خالق آراسیندا مقاومت سیموولونا چئوریلن و داها دا مشهورلاشان فریدون ابراهیمی ایله مصاحبه آلماق اوچون حبس‌خانایا گئدیرلر.

او، آمریکانین آذربایجان ملی حکومتینین دئوریلمه‌سینده پهلوی رژیمینه دستک وئردیینی و آذربایجانلیلارین قیرغینیندا رول اوینادیغینی دئیه‌رک مصاحبه‌دن امتنا ائدیر.

حبس‌خانا دوستلاری فریدون ابراهیمی ایله باغلی خاطره‌لرینده اونو ایگید، سارسیلماز و خالقا باغلی غیرعادی شخصیت کیمی خاراکتریزه ائدیبلر.

"اعدام گونو او، اوزونو قیرخیب، تزه پالتارینی سلیقه ایله گئیینیب اوستونه عطر سپه‌رک بی چیخیرمیش کیمی گولومسه‌یه‌رک اعدام ائدیلمک اوچون کامراسیندان چیخدی. محبوسلاری سارسیلماماغا، دؤزوملو اولماغا سسله‌ییب، کامرا یولداشلاری و باشقا محبوسلارلا گؤروشوب، اؤپوشوب و گولومسه‌یه-گولومسه‌یه آسیلاجاغی دار آغاجینا دوغرو گتدی"،- ابراهیمینین حبس‌خانا یولداشلارینین خاطره‌لرینده قید ائدیلیب.

۲۲ مای ۱۹۴۶-جی ایلده فریدون ابراهیمی‌نین تبریزین گلستان باغیندا آسیلدیغی صحنه‌سینی اؤز گؤزلری ایله گؤرن ایکی شاهد، تانینمیش ضیالیلار حکیم آذری فرهاد و مهندس علی‌اکبر الدینی اعدام صحنه‌سیندن خالقین حیرتلندیینی یازیبلار:

"اعدام منطقه‌سی شاه قوشونلاری ایله دولموشدو. بونونلا یاناشی، چوخ‌سایدا ملکی آذربایجانلی دا اورایا توپلاشمیشدی. ساعت ۱۲-ا یاخین اوجابویلو و یاراشیقلی فریدون ابراهیمینی دار آغاجینین یانینا گتیردیلر. اونو گؤرن خالق جوشه گلیب عسگرلره هجوم ائتمک ایسته‌دیلر. خالقین قانینین تؤکولجه‌ییندن احتیاط ائد‌ن ابراهیمی اوجا سسله خالقا سسلندی: منیم عزیزلریم، هموطن‌لریم، صبر ائدین، قان تؤکولمسین! بو گون جمعه گونودور. جمعه گونو مسلمانلار تویوق باشی بئله کسمزلر. آنجاق بونلار آدام اؤلدورمیی بئله روا بیلیرلر. چوخ چکمز کی، آذربایجان خالقی غلبه چالاجاق و یئنیدن آذربایجاندا ملی حکومت قورولاجاق. یاشاسین آذربایجان! یاشاسین دوغما وطنیمیز آذربایجان!".

فریدون ابراهیمی حاقیندا آذربایجان ادبیاتینین مختلف اثرلرینده گئنیش یازیلیب.

میرزا ابراهیموو "گله‌جک گون" رومانیندا ملی حکومتین باش پروکورورونا گئنیش یئر آییریب.

بونونلا یاناشی، اونلارلا یازیچی و شاعر، او جمله‌دن، حبیب ساهر، فتحی خوشگنابی، بالاش آذراوغلو، مدینه گولگون، سهراب طاهر، خلیل رضا، عارف مهمان، تاریل امید و باشقالاری اثرلرینده اونون پوئتیک اوبرازینی یارادیبلار.

فریدون ابراهیمی تبریزین امامیه قبریستانلیغیندا دفن ائدیلیب. حاکمیتین تطبیق ائتدیی بوتون محدودیتلره باخمایاراق، هر ایل اونون آنادان اولدوغو و اعدام ائدیلدیی گون ملی-مدنی فعاللار و سیراوی آذربایجانلیلار مزارینی زیارت ائدیر، قبری اوستونه چیچکلر قویورلار.