ایستر ملا رژیمی، ایستر ایراندا ان دموکراتیک سایدیقلاری هر هانسی بیر قوهنین کئچیردیی هئچ بیر سئچکینی قبول ائتمیریک. حساب ائدیریک کی، کئچیریلهن سئچکیلر غیری-قانونی، غیری-اخلاقی و غیری-دموکراتیکدیر. نه زامانا کیمی «گونئی آذربایجان استقلالیت ایستییر، یاخود ایرانی»؟ دئیه بیر رفرندوم کئچیریلمهییب، بیزیم اوچون هئچ بیر سئچکینین اهمیتی اولمایاجاق.
بو سؤزلری Axar.az-آ گونئی آذربایجان جمهوریت پارتییاسینین صدری آراز آتاخان ایراندا باش توتان پارلامنت سئچکیلری حاقیندا دانیشارکهن دئییب.
او بیلدیریب کی، رژیمین کئچیردیی سئچکیلر اویوندور:
«ایرانداکی پارلامنت سئچکیلریندن بیزه نه؟ من آذربایجانلییام، او ایرانلیدیر. دوزدور، حرکاتین بعضی فعاللاری ائتنیک مباحثه احتیمالی اولان بؤلگهلرده سس وئرمیین طرفداریدیر. اورمییا، آستارا کیمی بؤلگهلرده سس وئریلمهسینه قارشی چیخمادیق. دوستلاریمیزین بعضیسی حساب ائدیر کی، بو تاکتیکا ایشه یاراییر. چونکی سس وئرهنلرین چوخونون کوردلر یوخ، بو بؤلگهنین ساکینی اولان تورکلر اولدوغونو هامی گؤرمهلیدیر. بیز ده اونلارین بو جور یاناشماسینا قارشی چیخمادیق. اما حساب ائتمیریک کی، گئدیب هر هانسی تورک نامیزده سس وئرمک نییسه دییشهجک. دموکراتیک سئچکیلر باش توتمور و کیمین سئچیلجیینه بیزیم ملت قرار وئرمیر».
سئچکیلرله باغلی بو واختا کیمی ایشلهدیلهن تاکتیکانین داها کهنلدیینی دئیهن آراز آتاخان وورغولاییب کی، ان دوغرو سئچیم بو سئچکیلری تانیماماقدیر:
«کئچمیشده بئله دوشونوردوک کی، خامنییه یاخین آداملارین یانیندا دایانماق لازیمدیر. چونکی رژیم اؤز آداملارینی سئچهجک. بونونلا بیز ده اؤز آدامیمیزی سئچمیش اولوردوق. تاکتیکامیز بو ایدی. لاکین سونرادان بونو آنلادیلار. رئژیمله برابر کوردلر ده بیزیم اولکی تاکتیکامیزی آنلاییبلار. ایندی یئنی بیر تئاتر قوروبلار. دئییرلر کی، اورمییادا نامیزدلرین بئشی تورکدورسه، بئشی ده کورد اولاجاق. اورمییادا ۵۰ فایز کورد اولمادیغی حالدا نیه سئچکیلرده تورکلرله عینی سایدا نامیزد تمثیل اولونمالیدیر؟ بورادا مقصد ایسه دونیایا گؤسترمکدیر کی، اورمییانین ۵۰ فایزی کورددور. من ده سئچکیلره قاتیلماقلا رژیمین دییرمانینا سو تؤکموش اولورام. اودور کی، ایستهنیلن واریانت بیزیم علیهیمیزهدیر. بو گون آذربایجان تورکلری ایراندا ان آغیر دورومدادیر. زیندانلار ملی فعاللارلا دولودور. بلوچ و آذربایجانلیلار ایراندا ان کاسیب یاشایان طبقهدیر. دیلیمیز یاساق، مکتبیمیز یوخ. بو دورومدا اولدوغوموز حالدا گئدیب سس وئرمییمیز هانسی اخلاقا سیغار؟ بعضی گونئی آذربایجان تشکیلاتلاری سئچکیلری بویکوت ائدیر، بیز ایسه عمومیتله سایمیریق».