پرزیدنت‌لییه تورک نامزد مسعود پزشکیانین باشقا نامزدلردن فرق‌لی اولماسی گؤز قاباغیندادیر، آنجاق اونون دا وئردیی وعدلرده غیری-عادی بیر شئی یوخدور و بو ایسته‌نیله‌ن نرمال حکومت طرفیندن حیاتا کئچیریمه‌لیدیر. ساده‌جه ایران حاکمیتی عادی حقوقلاری دا محدودلاشدیردیغی اوچون پزشکیانین وعدلری جلب ائدیجی گؤرونور.

بو سؤزلری Axar.az-آ آچیقلاماسیندا تهران‌دا یاشاین مدنیت خادمی رشید حسنی دئییب.

او، آذربایجان‌لیلارین، تورکلرین مسعود پزشکیانا رغبت گؤسترمه‌لرینی داها چوخ اونون غیری-فارس خالقالارین حقوقلاری ایله باغلی عدالتلی مؤقعینه گؤره اولدوغونو دئییر:

"مسعود پزشکیانین ایران کنستیتوسییاسینین ۱۵-جی ماده‌سینین تطبیقینین واجیب‌لییی، غیری-فارس خالقلارین حقوقلارینین برپاسی، آنا دیللرینده تحصیل حقوقلارینین تعمینی ایله باغلی دئدیکلری، تورکلرله یاناشی باشقا خالقلارین دا اونا ماراق گؤسترمه‌سینه سبب اولوب . بو، اونون غیری-فارس بؤلگه‌لرینه سفری زمانی ازدحاملی قارشیلاما مراسیملریندن ده گؤرونور. بونونلا یاناشی ،تورک نامزدین بؤلگه‌لرین ثروتلرینین مرکزه داشینماماسی، ثروتلرین چوخ قیسمینین عایید اولدوغو ایالتلرین انکشافینا خرجله‌نمه‌سی ایله باغلی چیخیشلاری دا جلب ائدیجی‌دیر".

اونون فیکرینجه تورک نامزد دئدیکلرینی و وئردیی وعدلری یئرینه یئتیرمک اوچون چالیشاجاغی گؤزله‌نیلندیر.

"بیرینجی اونا گؤره کی، اونون دئدیکلرینین هامی‌سی ایران کونستیتوسییاسیندا عکس اولونوب و او، علاوه، یئرینه یئتیریلمه‌سی امکانسیز اولان غیری-عادی وعدلر وئرمیر. پزشکیان ساده‌جه قانونون و بو گونه کیمی قبول اولونموش ،اما یئرینه یئتیریلمه‌یه‌ن قرارلارین حیاتا کئچیریلمه‌سینه چالیشمالی‌دیر. بو قدرینه ایسه اونون صلاحیت و گوجو چاتار. ایکینجی، او بو سؤزلری پرزیدنت سئچیلمک اوچون دئمیر، بوندان اول ده، دفعه‌لرله بو باره‌ده چیخیشلار ائدیب، حکومتین قید اولونان مسئله‌لرله باغلی سیاستلرینی قیناییب. ان واجیبی اودور کی، پزشکیان باشقالاریندان فرقلی اولاراق وظیفه و ثروته حریص، آج گؤز آدام دئییل، سئچیلدیی تقدیرده یا دئدیکیرینی ائد‌جک و یا وظیفه‌دن چکیله‌جک"،- تهران‌لی فعال قید ائدیب.

او، تورک نامیزدین قونشو اؤلکه‌لر و عمومیتله دونیا ایله دیالوگ و صلحون طرفداری اولدوغونا، قادینلارین، تحصیل ایشچیلرینین، دینی و ملی آزلیقلارین، یئنی نسلین پروبلملرینه قایغی ایله یاناشدیغینا گؤره گنجلر، طلبه‌لر آراسیندا جدی نفوذا مالک اولدوغونا دقت چکیب.

رشید حسنی همچینین، مسعود پزشکیانین پلورالیست دوشونجه، دونیا گؤروشونه گؤره، هم دونیوی و هم‌ده دینی تفکره مالک اینسانلار طرفیندن ده قبول ائدیلدیونی قید ائدیب.

"بو دئدیکلریم وطنداشلاری، تورکلری سئچکیلره دعوت کیمی قبول ائدیلمه‌سین. اصلینده بوتون بو دئدیکلریمه باخمایاراق، اؤزوم سس وئرمه‌ده اشتراک ائتمه‌یه‌جه‌یه‌م، عائله‌مه ده اشتراک ائتمه‌مه‌یی توصیه ائتمیشم"،- حسنی فکرلرینی یکونلاشدیریب.