اسدین دئوریلمه‌سی ایله تورکیه، آمریکا، اسرائیل قازانان، روسیا کمپنساسییا امکانلارینی هله ده ساخلایان طرف اولسا دا، اساس ایتیرن ایران اولدو. بونو تهرانین اؤزونده ده اعتراف ائدیرلر.

حاکمیت داخلینده اساس اتهام هدفی خارجی ایشلر ناظیری عباس عراقچیدیر. اونون اسد دئوریلممیشدن بیر هفته اؤنجه دمشقده «شاورما» یئیه‌یه‌رک، «هر شی قایداسیندادیر» مساژی تنقید اولونور. اساس دقتچکه‌ن مقاملاردان بیری سوریاداکی اوغورسوزلوغون عراقچینین تیمثالیندا پزشکیان حکومتینین اوزرینه قویماق جهدلرینین ده ائدیلمه‌سیدیر. اصلاحاتچی قانادا یاخین اولانلار آراسیندا ایسه اسدین دئوریلمه‌سینه «ایران خالقینین پوللارینین گؤیه سوورولماسینا سون قویولماسی» کونتکستینده سئوینه‌نلر وار.

تهرانین سوریادا ایتکیلریندن بیری «ایران خالقینین گؤیه سووردوقلاری» پوللاردیر. رسمی منبع‌لر بو حاقدا دانیشماقدان قاچسا دا، ایرانین سوریا محاربه‌سی باشلایاندان اعتباراً بو اؤلکه‌یه ایلده اورتا حسابلا ۶ میلیارد اولماقلا، ایندییه قدر ۵۰ میلیارد دلار جیواریندا وصایت خرجلدیی حاقدا معلوماتلار وار. ایرانین سوریایا بو قدر پول خرجله‌مه‌سینین آنا سببی «مقاومت اوخو»ندا «قیزیل حالقا»نی قورویوب ساخلاماق مقصدی داشییردی. خامنه‌اینین مشاوری ولایتینین دئدیی کیمی، «سوریا حکومتی اولماسا، بو حالقا قیریلاجاق و اسرائیله قارشی مقاومت ضعیفله‌یه‌جک».

اسدین گئتمه‌سی ایله «قیزیل حالقا» قیریلدی و ایرانین پروکسی قوه‌لردن عبارت «مقاومت اوخو»ندا داغیلما پروسسی باشلاندی:

- سوریادا مغلوبیت ایرانا حزب‌اللاهلا (لیوان) قورو علاقه‌سینی ایتیرمک تهلوکه‌سینی یارادیب؛

- غزه‌ده حماس-این، لیوان‌دا حزب‌اللاهین جدی «قان ایتیرمه‌سی»ند‌ن سونرا سوریاداکی نتیجه «مقاومت اوخو»نون کوردیناسییاسینی پوزدو؛

- ایران-عراق-سوریا-لیوان خطی تهرانین «شیعه هلالی» پلانلارینی آلت-اوست ائدیر.

نوبتی هدفین عراق و یمن اولاجاغی، بو اؤلکه‌لرده ایرانا باغلی حشدالشعبی و حوثیلرین سیرادان چیخاریلماسینا استارت وئریلجیی احتمالی بؤیوکدور. حوثیلرین وورولماسی تهران اوچون تکجه اسرائیلله یوخ، هم ده دینی موستویده استراتژی رقیبی اولان سعودیه عربیستانی ایله مبارزه‌ده ده ایتکی، عراق‌دا مغلوبیت ایسه داغیلما پروسسینین ایران سرحدلرینه چاتماسی دئمکدیر. خصوصیله ترامپین آغ ائوده فعالیته باشلاماسیندان سونرا ایرانی داها چتین گونلر گؤزلییر.

هرچند، تهران آسانلیقلا تسلیم اومایاجاق و آتا بیلجیی آددیملاری بیر نئچه کونتکستده تخمین ائتمک اولار.

۱. عراق‌دا و یمنده‌کی قوه‌لرینی قوروماغا و نه قدر چتین اولسا دا، حزب‌اللاهی یئنی‌دن گوجله‌ندیرمه‌یه چالیشاجاق؛

۲. پروکسی قوه‌لرینی قوروماق اوچون مسکوا ایله آنلاشا، بو قوه‌لرین ادارچیلیینده روسیانین اشتراکینی قبول ائده و اوندان «قالخان» کیمی استفاده ائده بیلر؛

۳. «مقاومت اوخو»نون ضعیفله‌مه‌سی ایرانین «استراتژی چکیندیریجیلیک» گوجونو ده ضعیفله‌دیر، بو باخیمدان، تهران اوچون چیخیش یوللاریندان بیری نووه سلاحینی الده ائتمک استقامتینده سعیلرینی آرتیرماق اولا بیلر.

بوتون بونلارین فونوندا ایرانین اسرائیلله بیرباشا محاربه‌دن نه قدر یایینا بیلجیی ده حل‌ائدیجی پروبلملردن بیری اولاراق قالیر.