دونالد ترامپین یئنی‌دن آمریکا پرزیدنتی سئچیلمه‌سی و ایرانلا باغلی سرت بیاناتلار سسلندیرمه‌سی ایله عینی واختدا اسرائیلین آمریکانین دستیی ایله ایرانا هجوم ائدجیی باره‌ده احتیماللار داها دا گوجلنیب.

آمریکا اسرائیلین ایرانا و ایرانین ایکی متفیقه قارشی بیاناتلاری پروسسین محاربه ایله نتیجه‌له‌نه‌جه‌یی باره‌ده پروگنوزلارین رئال گؤرونمه‌سینه سبب اولوب.

خصوصاً، باشدا علی خامنه‌ای اولماقلا ایرانین محافظه‌کار رهبرلیینین "مقاومت" باره‌ده چیخیشلاری ، آمریکا ایله دانیشیقلارا قویدوقلاری "قرمزی خط" تهرانین محاربه‌یه حاضر اولماسی باره‌ده دئییله‌نلرین حقیقته اویغون اولماسی تصورونو یارادیر.

بونونلا یاناشی ایران اوردوسو و سپاه-این گئنیش مقیاس‌لی حربی تعلیملر کئچیرمه‌سی، پایتختین و بیر نئچه بؤیوک شهرینین تهلوکسیزلیینین تعمین ائدیلمه‌سی آدی آلتیندا نئچه مین نفرلیک تعلیملره باشلاماسی دا همین تصورلری گوجلندیریر.

مسئله بوراسیندادیر کی، ایرانا هجوم و ملا رژیمینین قیسا مدت‌ده سقوطو ایله باغلی بو گون سسلندیریلن فکرلر ملالارین ۴۶ ایللیک حاکمیتی دؤورونده بیر نئچه دفعه تجروبه ائدیلیب.

هر دفعه ایسه تهرانین سون مقام‌دا، تضییقلرین پیک حده چاتدیغی واخت‌دا موقعین‌ده دییشیک‌لیک ائتمه‌سی، "مقاومت" عوضینه "ملایم‌لیک" گؤستریب غربه امتیازلار وئرمک قارشیلیغیندا تهلوکه‌نی سؤوشدورماسی هم ناراضی خالقی و هم ده مخالفت قوه‌لرینی خیال قیریقلیغینا اوغرادیب.

ایرانین تهلوکه‌دن ساغ چیخماسی ایسه بو گون مسعود پزشکیانین باشچی‌لیق ائتدیی "اصلاحات‌چی" سیاسی جریان رهبرلرینین خدمتلری سایه‌سینده اولوب.

جورج بوش دورون‌ده ده آمریکانین ایرانا تضییقلری و سانکسییالارینین تطبیق ائدیلدیی، اسرائیلین ایرانین نووه تاسیساتلارینا هجوم ائدجیی گؤزلنیلدیی بیر واخت‌دا، او واختکی "اصلاحاتچی" پرزیدنت محمد خاتمی و باشچی‌لیق ائتدیی کوماندا تهرانین وضعیت‌دن چیخماسینا نایل اولدو.

خامنه‌ای ایسه باشچیلق ائتدیی سیستمین قورونماسی اوچون غربه، خصوصاً آمریکایا وئریلن ایمتیازلاری "قهرمانجاسینا یومشاقلیق" آدلاندیریب، بونو غلبه کیمی قلمه وئردی.

عینی پروسئس "اصلاحات‌چی" پرزیدنت، "بنؤوشیی تولکو" آدلاندیریلان حسن روحانی دورونده ده باش وئردی و خامنه‌ای اونون خدمتلری، یوکسک امتیازلار وئرمک حساینا یئنه ده حاکمیتینی قورویوب ساخلایا بیلدی.

بوتون بونلاردان سونرا بو گون جریان ائد‌ن پروسسلرین ۱۰۰% گئنیش مقیاس‌لی محاربه ایله نتیجه‌لنجیی باره‌ده پروگنوزلارین او قدر ده اساس‌لی اولمادیغینی دئمه‌یه اساس وئریر.

علی خامنه‌ای بو گون ده مسعود پزشکیانین تمثیل ائتدیی "اصلاحاتچی" سیاسی جریانین خدمتلریندن مهارتله استیفاده ائتمه‌یه، "تهدید و دانیشیق" سیاستیندن یارارلاناراق، رژیمین سقوطو اوچون جدی آددیملارین آتیلماسینین قارشی‌سینی آلماغا چالیشیر.

پزشکیانین کومانداسینین، خصوصاً اونون ایستراتژی مسئله‌لر اوزره معاوینی، کئچمیش خاریجی ایشلر ناظری محمد جواد ظریفین غربله دانیشیقلاردا، حادثه و بحرانلارین اداره ائدیلمه‌سینده زنگین تجروبه‌سی وار.

همین کوماندا هله مسعود پزشکیان پرزیدنت سئچیلممیشدن اول، دونالد ترامپین پرزیدنت اولاجاغی باره‌ده احتماللارین سسلندیریلدیی واخت، اونونلا دانیشیقلارا حاضر اولدوقلارینی، بونونلا باغلی پلان و پروگرام حاضرلادیقلارینی بیلدیرمیشدی.

مسعود پزشکیانین سئچکی قرارگاهینین باشچی‌سی، شرقی آذربایجانین کئچمیش والیسی و کئچمیش شهرسالما ناظری، اصلاحاتچی محسن عبدالعلی‌زاده ۲۰۲۴-جو ایلین ایون آیین‌دا کئچیردیی مطبوعات کنفرانس‌یندا آمریکا ایله دانیشیقلارا حاضر اولدوقلاری باره‌ده بیانات وئریب.

عبدالعلیزاده‌نین "دونالد ترامپ یاخشی تجارتچی‌دیر و بیز ده تجارت دیلین یاخشی بیلیریک. اونا گؤره ده، ترامپلا دانیشیب و راضی‌لیق الده ائدجه‌ییمیزه اینانیریق" بیاناتی، اونون محافظه‌کار سیاسی جریانین هدفینه چئوریلمه‌سینه سبب اولدو.

آذربایجان‌لی سیاستچی محسن عبدالعلی‌زاده‌نین ده دئدیی کیمی دونالد ترامپین ماکزیموم دیپلماتیک تضییق گؤستریب، تهدید ائد‌رک تهران‌دان داها یوکسک امتیازلار آلماسی و داها ضعیف مؤقع‌ده اولان ایرانلا نیسبی، موقتی راضیلاشماسی ایسه داها چوخ رئال گؤرونور.

بئله اولان حالدا ایسه ایران خالقینین اهمیتلی ناراضی حیصه‌سینین و مخالفتین تهران رژیمینین آمریکانین الی ایله دئوریلمه‌سی باره‌ده آرزولارینین رئاللاشماسینین یئنه‌ده تاخیره سالینماسی ممکن‌دور.

اسرائیلین ایسه ایرانین نووه و حربی مرکزلرینه گئنیش مقیاس‌لی و رژیمی ایفلیج ائد‌جک سوییه‌ده هجوملارینین باشلاماسی نه آمریکا، نه ده بؤلگه اؤلکه‌لرینین ماراغیندا دئییل.

اسرائیلین اؤتن ایل ایرانا ایکی مرحله‌ده ضربه ائندیرمه‌سینه باخمایاراق، نووه تاسیساتلارینی هدف آلماماسی آمریکانین بونا راضی‌لیق وئرمه‌مه‌سی ایله علاقه‌داردیر.

ترامپ حاکمیتینین ده تهران‌دان یوکسک امتیازلار قارشیلیغیندا اسرائیلین ایرانا گئنیش مقیاس‌لی هجومونا قارشی چیخماسی گؤزله‌نیلندیر.

نتیجه: آمریکا و اسرائیل بوتون ادعالارا باخمایاراق، هله‌لیک ایران‌دا حاکم سیستمین بیر دفعه‌لیک سقوطوندا ماراق‌لی دئییل. بورادا بعضی آوروپا اؤلکه‌لری، خصوصاً بؤیوک بریتانییا و فرانسانین دا ملا رژیمینین آیاق‌دا قالماسینداکی ماراقلاری دانیلمازدیر.

محمدرضا پهلوینی دئویریب ملالاری حاکمیته گتیره‌ن آمریکا، بریتانییا و فرانسا، تهران رژیمینین ۴۶ ایل عرضینده بؤلگه‌ده یاراتدیقغی بحرانلاردان ماکزیموم ایستیفاده ائتدیکیری، سیاسی و اقتصادی منافعلرینی تهرانین خاوسا حسابلانمیش سیاستلری واسطه‌سیله تعمین ائتدیکلری شبهه دوغورمور.

ایرانین لیوان، فلسطین و سوریاداکی قوللارینی کسن اسرائیلین ده بؤلگه‌ده‌کی هگومونلوغونو سوردورمک، ماراقلاری اوغرونداکی عمللرینه براعت قازاندیرماق اوچون "اسرائیل یئر اوزوندن سیلینمه‌لیدیر" شعاری سسلندیره‌ن ملا رژیمینین ایندیکی مرحله‌ده سقوطونا راضی‌لیق وئرمه‌سی ایناندیریجی گؤرونمور.

"اسلام رسپوبلیکاسی"، خصوصاً علی خامنه‌ای بحران یاراتماقلا هله ده آدی چکیلن اؤلکه‌لرین بؤلگه‌ده‌کی ماراقلارینا خدمت ائتمیی باجاریر و تهران حاکمیتی موجودلوغونون بونا باغلی اولدوغونو بیلدیینه گؤره، عمللرینی فرقلی فورمادا داوام ائتدیره‌جک.

علی خامنه‌ای یاخشی بیلیر کی، اونون و باشچی‌لیق ائتدیی سیستمین سقوطو بحران یاراتماق امکانلارینی ایتیردیی گوندن باشلایاجاق!

بوتون بونلارا گؤره ده، آمریکانین و متفیقلرینین گوجسوزلشدیریلمیش "اسلام رسپوبلیکاسی"نین قیسا مدتده دئوریلمه‌سینده ماراقلی اولماماسی تعجبلو دئییل.

بو سیستمین دییشدیریلمه‌سینین اساس یولو ایسه ایران‌دا یاشایان خالقلارین و مخالفتین بیرلیک یاراتماسی، واحد پلاتفورما اطرافیندا توپلاشماسی و باشقا اؤلکه‌لردن آسیلی اولمادان حرکت ائتمه‌لریندن آسیلیدیر.