کئچمیش پرزیدنت حسن روحانین باشلاتدیغی دییشیکلیک پروسسی ایران‌دا کوتلویلشمه‌یه باشلاییر. ایرانین ۱۸۰ اجتماعی-سیاسی خادمی‌نین پرزیدنت مسعود پزشکیانا مراجعت عنوانلایاراق، کؤکلو دییشیکلیکلره چاغیرماسی دا بونون تصدیقیدیر. حسن روحانی بعضا آد چکمه‌دن، بعضاً ده بیرباشا سید علی خامنه‌اینی هدف آلاراق اؤلکه‌ده دییشیک‌لیکلرین قارشی‌سینین آلینماسیندا عالی رهبری اتهام ائدیردی.

Axar.az خبر وئریر کی، بو سؤزلری پولیتولوق خاقانی جعفرلی قید ائدیب.

«ائله بیر وضعیت یارانماغا باشلاییر کی، جمعیتین طلبی ایله الیتانین ایستیی اوست-اوسته دوشمه‌یه باشلاییر. علی خامنه‌اینین باشچی‌لیق ائتدیی آزلیق دییشیک‌لیکلره مقاومت گؤسترسه ده، دییشیک‌لیکلر قاچیلماز کاراکتر آلماقدادیر.

سیاسی الیتانین بؤیوک بیر حیصه‌سی دییشیکلیکلرین طرفداری کیمی چیخیش ائتسه ده، بو دییشیکلیین نلری احاطه ائتمه‌سی ایله باغلی آیدین فکر اولمادیغی حس اولونور. بو، سووت اتفاقینین سون ایللرینده‌کی وضعیتی خاطرلادیر. سووت اتفاقین‌دا دا جمعیت و الیتا دییشیکلیین ضروری‌لییی قناعتینه گلمیشدی، آنجاق بو دییشیکلیین ندن عبارت اولمالی اولدوغونو آیدین تصور ائده بیلمدیکلری اوچون آتیلان آددیملار یاریمچیق، بعضاً ایسه عکس-افکت‌لی یارادیردی، نتیجه‌ده ده دولت قیسا مدت‌ده داغیلدی.

محدود معلوماتلارین دوغوردوغو قناعت اوندان عبارتدیر کی، دییشیک‌لیکلرین نلری احاطه ائتمه‌سی ایله باغلی یالنیز پرزیدنت مسعود پزشکیانین آیدین تصورلری وار. قناعتلریم اوندان عبارتدیر کی، مسعود پزشکیان آذربایجان تورکلرینین آنا دیلینده تحصیل حاقینین گئرچکلشمه‌سینین تعمین ائدیلمه‌سی ایله اؤلکه‌نی تدریجاً ایکی دولت‌لی فدراسییایا دوغرو آپارماغا چالیشیر. ایرانین ایکی دولت‌لی فدراسیایا چئوریلمه‌سی ایدئیاسینین ایران خارجین‌ده ده دستک‌چیلری چوخدور. نفوذلو اکسپرتلر و بیین مرکزلرینده بئله حساب ائدیرلر کی، فارسلار و آذربایجان تورکلری استثنا اولماقلا، ایران‌دا یاشایان دیگر خالقلارین تاریخی دولت‌چی‌لیک عنعنه‌لرینین اولماماسی ایله یاناشی چاغداش ملی دولت قوراجاق سویه چاتماییبلار. بونا گؤره ده ایرانین ایکی دولت‌لی فدراسیایا چئوریلمه‌سی یارانمیش وضعیت‌دن ان دوغرو چیخیش یولو اولا بیلجیینی قید ائدیرلر»، - پولیتولوگ خاطرلادیب.

او وورغولاییب کی، ایرانین پارچالاناجاغی حالدا یاخین شرق‌ده دومینو افکتی وئرجیی، ان آزی ۸-۱۰ دولتین بوتؤولویونون پوزولاجاغینا سبب اولاجاغی احتمالی دا ایرانین فدراللاشماسینی ان دوغرو یول حساب ائد‌نلرین مؤقعلرینی گوجلندیریر:

«آوروپادا قورخورلار کی، یاخین شرق‌ده دؤلتلرین چؤکوشو نهنگ قاچقین اوردوسو یارادا بیلر. آیدین مسئله‌دیر کی، بؤلگه‌نی بورویه‌جک خاوسدان خلاص اولماق ایسته‌یه‌نلر ایلک اولاراق آوروپایا اوز توتاجاقلار. سوریا قاچقینلارینین یاراتدیغی میقرانت بحرانینا دؤزه بیلمه‌یه‌ن آوروپا ۸-۱۰ دولت‌دن گله بیله‌جک قاچقین اوردوسونو قبول ائتمک اقتداریندا دئییل. بونا گؤره بیر طرفدن سرحدلرین گوجلندیریلمه‌سی، میقرانتلارلا باغلی قانون وئریجیلیین سرتلشدیریلمه‌سی ایله یاناشی، دیگر طرفدن بؤلگه دولتلرینین اراضی بوتؤولویونون قورونوب ساخلانیلماسینا چالیشیرلار. آوروپانین سوریاداکی تحریر الشام حاکمیتینه قارشی دؤزوملو یاناشیلماسینین سببی ده بودور. آنجاق آوروپادا و بوتولوک‌ده دنیادا متخصصلر یاخشی بیلیرلر کی، یاخین شرقین تالعی سوریادان دئییل، ایران‌دان آسیلی‌دیر. ایران بؤلونسه، یاخین شرق‌ده حکماً بیر نئچه اؤلکه بؤلونه‌جک. ایرانین تالعی ده بئله گؤرونور کی، مسعود پزشکیانین آیدین و قطیعت‌لی سیاستیندن آسیلی‌دیر.

ایرانین فدراللاشماسینین، مرکزی تبریز اولماقلا آذربایجان و مرکزی اصفهان اولماقلا فارس دولتینین یارانماسینین خالقیمیزین ماراقلارینا اویغوندورمو؟»