هامی بدنین‌ده هله وطنداشلیق قازانمامیش ایکینجی «اوز» داشیییر.

بعضا قولاغیمیزا پیچیلدایار او. آدینا شیطان دا دئیرلر، اورک سسی ده.

یارادیلیش‌دان مؤوجود «اکیز».

او، بیر گون وطنداش‌لیق قازانیر، گؤرونه‌ن طرفیمیزه صاحب‌لنیر، یا دا عکسینه، ائل‌جه اؤلو کیمی قالیر.

درین‌ده‌دیر، لاپ درین‌ده. هردن-هردن بویلانار. اولور کی، ایللرله آییلماز. بیر قیغیلجیم، بیر ایشارتی اویادار اونو.

گؤرونه‌نلر آیدین. لیاقت‌لی، شرفلی اینسان کیمی تانیدیغیمیز آداملارین ایچین‌ده شرفسیز، کاراکترسیز ایکینجی اوز ده وار. عؤمرون بیر دؤنگه‌سینده چیخار اوزه. گؤزلنیلمه‌دن، بیردنجه پئیدا اولار.

مثلاً، هر کسین ایچین‌ده بیر فاحیشه وار. بیر ده گؤررسن، یاتاقدا بویلانیر سنه، بیر ده گؤررسن، هانسیسا یازیدان، یا بیر میصراعدان.

بوتون کیشیلرین ایچینده بیر هوموسئکسوال یوخولاییر. اویانا دا بیلر، عؤمرون آخیریناجان مورگوله‌یه ده.

ایکینجیلییمیزی قازاندیقلاریمیز پسیخولوژی یاشانتیلاریمیزلا اؤرت-باس‌دیر ائده، گیزله‌یه، عینی زاماندا، یاشادیقلاریمیز پسیخولوژی پروسسی اویادا، بدنیمیزده وطنداشلیق وئره بیلر.

طب‌ده «سرانیوفاگوس پاراسیتیکوس» پاتالوگییاسی وار: بیولوژی، هورمونال پوزونتو نتیجه‌سینده سیام اکیزلری بتنده‌جه بیرلشیر.

ادوارد موردئیک - ۱۹-جو عصر. قاباقدان باخاندا گولروز، نورلو، قولاغی، بورنو یئرینده نورمال اینسان. آرخادا – پئیسرینده ایکینجی اوزو واردی. پئیسرینده‌کی ایکینجی اوزده‌ن ظالملیق تؤکولرمیش. ایکینجی اوزو آناسینین بتنینده بیرلشمیشدی اونا. هر شئی نورمال گئتسیدی، اکیز دوغولاجاقدی. ادواردین بو طرفی هامییا نیفرتله باخیردی. دانیشمیردی و داواملی سوسوردو.

ایکینجی اوزون گؤزلری اطرافداکیلاری دایما دقتله ایزلییردی، بعضا معین ائموسییالار دا گؤستریردی: گولومسییردی، یا دا قاشقاباغینی ساللاییردی. اما همیشه ائدواردین اموسییالارینا عکس-رئاکسییالار وئریردی. او گولنده، بو آغلاییردی. او کدرلننده، بو، گولوردو.

ادوارد دفعه‌لرله حکیملره مراجعت ائدیب. اما حکیملر بیلدیریبلر کی، ایکینجی اوزو عملیات ائتمک اؤلومله نتیجه‌لنه بیلر. داواملی حکیم نظارتینه باخمایاراق، ادوارد ۲۳ یاشیندا اؤزونه قصد ائدیب.

فیکیر وئرین، ادواردین ایکینجی اوزو نینکی پیچیلداییردی، حتی هامی گؤروردو اونو.

هئچ کیم موبارک دئییل، هامینین ایچینده بیر اخلاقسیز، بیر ظالم یاتیر.

یا اونو اؤلدورمک، یا بارماق اوجوندا – سس‌سیزجه کئچمک گرک عؤمرون یولونو. کی، سسه اویانیب صاحبله‌نمه‌سین بیزه.

تانیدیغینیز بوتون آداملار قازانیلمیش ایکینجیلردیر.

آنالاریمیز، آتالاریمیز، قارداشلاریمیز... – هامینین ایچینده گؤرونمه‌یه‌ن اوزو وار.

اینسان دوغولمور، اینسان فورمالاشیر...