کولت. آذ جاوی دانین یازیسینی تقدیم ائدیر:

ایندی تئز-تئز دینلدییم روک موسیقیسی کیمی کئچدی حیات.

ائله جه یانیمدان کئچدی یقین کی.

منی تانیمادان، منی سئومه‌یه ماجال تاپمادان، منی دیرله‌ندیرمه‌یه گوجو اولمادان کئچدی بلکه ده.

هایلی-کویلو بیر رومانتیکا - تام بیر تورک روکو.

هردن منه ائله گلدی کی، وار-گوجومله قاچیرام، ساچلاریم قفیلدن گؤزومه-اوزومه توخونسا، کسه‌جک قدر سرعتلی‌دیر قاچیشیم، هردن ده ائله جه یئرلره چؤکوب ساچلاریملا تورپاغی چیرپیر، داغیدیر، آغریدیرام، سونرا سورونوب ساده‌جه اوزو گؤیلره چئوریلمک، قوللاریمی یانا آچیب دا گؤزلرینی یومماق، یاغیشلاری، یاغیشلاری، یالنیز یاغیشلاری قبول ائتمک قدر اولدو دادی-تامی دونیانین.

و هر سحر گونشی سلاملاماق و هر آخشام اورکدولوسو سئوگی یوللاماق اونونلا دونیانین او تایینداکی آداملار اوچون...

اما زامان...

زامان - بیز اونو حیس ائلدییمیز آنلاردا حاکمدیر ساده‌جه.

اونو دویمادیغیمیز واختلاردا آجیزدی، عؤمروموزدن، روحوموزدان، حتی بدنیمیزدن قوپاریب دا آپارماغا گوجو یوخدو.

زامانین نئجه کئچدیینی بیلمه‌ین لر اونا قالیب گلنلردی، اینانیرام.

قالیبلر - سئومه یی باجارانلاردیر.

یالنیز آشیق اولان اینسان حیس ائتمز زامانی. چونکی نه کئچمیشی اولاجاق آشیقین، نه گله جه یی، ائله جه آشیقلیینین مؤوجود اولدوغو تک بیرجه آنین ایچریسینه هوپوب قالاجاق روحو. تا کی، آشیقلیگی کئچه‌نه قدر.

عشق زامانین نهایتسیزلیگی قوینوندا یگانه قفس‌دیر کی، آشیق اونون ایچریسینده کایناتین ان بؤیوک آزادلیینی یاشاییر.

و ادبیات…

ادبیات دا عشق‌دیر، یازارین موبتلا اولدوغو، وارلیغیندان هئچ جور قوپارا بیلمه دیی، قوینوندان هئچ جور قوپا بیلمه دیی سؤز قفسی‌دیر. او قدر آزاده‌لیک وار کی ایچینده…و او قدر دوستاغیق کی یازیب-یاراتدیغیمیز سؤزلره…

من زامانی ان چوخ یا آد گونومده، یا دا یئنی ایل عرفه‌سینده حیس ائدیرم.

هر ایکی عرفه‌ده اؤتن بیر ایل عرضینده ائتدیکلریم و ائتمه دیکلریم اوچون اؤزومه حسابات وئریرم. بیر ده نؤوبتی بیر ایل اوچون آرزولاریمی، پلانلاریمی گؤتور-قوی ائدیرم. موطلق تام یئنی بیر دفترله باشلاییرام یئنی ایله.

کیتاب ایشکافیمداکی کیتابلارلا یاناشی، هر ایله عایید قئید دفترلریم ده وار. هردن ورقله‌ییب نه واختسا یازدیغیم، سونرا اونوتدوغوم، لاکین آرتیق یاشادیغیم هانسیسا ایسته ییمین قئیدینی گؤره‌نده گولومسه ییرم، "یازییا پوزو یوخدورسا، قالان حیاتیمی دا بئله‌جه قئیدلرله نیظاملایا بیلرم بلکه" - دئیه دوشونوره‌م.

منیم اوچون ادبیات دا ائله بو جور قئید دفترلریندن باشلاییب، مکتبلی دؤورونده‌کی ایلک گونده‌لیکلریمدن. او گونده‌لیکلری یازماغا منی وادار ائد‌ن اوچ گؤزل اثر واردی. سلام قدیرزاده نین "۴۶ بنؤوشه"سی، رشاد نوری گونتکینین "چالیقوشو"سو، بیر ده جوناتان سویفتین "قوللیوئرین سیاحتی" اثری.

همکارلاری‌می ایزلدیکده کیمین اوشاق واختی گونده‌لیکلر یازدیغینی حیس ائده بیلیرم. کیمین ده هئچ واخت اؤزونه عایید بیر گیزلی دونیاسینین اولمادیغی یازیلاریندان گؤرونور. زامان قفسه سالینمیش و "موپاسسانین "عیبه جرلر آناسی"نین اؤولادلاری کیمی ازیلمیش-سیخیلمیش حالدا اولور ادبیاتلاریندا. آخی اؤز دونیاسی اولمایانلار باشقالارینین دونیالاریندان سادجه قیسا رئپورتاژلار اوچون موقتی اعزامیت دؤورلری یاشایانلار اولورلار، نه اولسون کی، اونلار داها چوخ امین اولورلار یازیچی اولدوقلارینا.

آهه، سئوگیلی سؤزلر…

سئوگیلی یازی!

سنه نه قدر زامان آییرا بیلدیم اؤتن ایل من، سنه نه قدر زامان آییرا بیله‌جه‌یم یئنی ایل عرضینده، کیم بیلیر…

سنی نئچه اثر بویوندا یارادا بیله‌جه‌یم گؤره‌سن، نئچه کیتاب ساییندا بؤیوده بیله‌جه‌یم، نئچه اوخوجو ایله قوووشدورا بیله‌جه‌یم؟

او قدر هیجانلییام کی!

من سنی نه قدر سئویرممیش، گؤزل یازی، من سنده نه قدر آزادام، من سنه نه قدر دوستاق… زامانی حیس ائتمیرم، اینان.

منی تک قویما، نولار!