کولت. آذ زلیمخان یعقوبون "من سنین قلبینه نئجه یول تاپیم" شعیرینی تقدیم ائدیر:

گل، منیم عؤمرومون شیرین دونیاسی،
محببت آدلانان پیرین دونیاسی،
فرهاد افسانه‌سی، شیرین دونیاسی،
قالامی اوچوروم، قایامی چاپیم،
من سنین قلبینه نئجه یول تاپیم؟
عؤمروم سنه ساری دوشن گوزاردی،
اولی بشیکدی، سونو مزاردی،
آی الله، بو آزار نه خوش آزاردی،
اورک آغریلاریم، کؤنول عذابیم،
من سنین قلبینه نئجه یول تاپیم؟
اورکدون-اور‌یه دیل کؤرپوسو وار،
گؤروشدن-گؤروشه گول کؤرپوسو وار،
گیزلی سئودالارین قیل کؤرپوسو وار،
چاتارمی کئچمه‌یه دؤزوموم، تابیم،
من سنین قلبینه نئجه یول تاپیم؟
کئشیکچی آییقدی، گؤزتچی متین،
ایزله‌مک قورخولو، بویلانماق چتین،
هاساری هوندوردو بو عیمارتین،
تیلسیم‌لی پنجره‌م، قیفیل‌لی قاپیم،
من سنین قلبینه نئجه یول تاپیم؟
گئجه‌لر شام کیمی اریتدین منی،
گوندوزلر یول اوسته قوروتدون منی،
گؤزله‌ده-گؤزله‌ده چوروتدون منی،
اؤرتولو دفتریم، باغلی کیتابیم،
من سنین قلبینه نئجه یول تاپیم؟
توفان‌می قال‌دیریم، مئهه‌می دؤنوم؟
یاغیشمی یاغدیریم، شئهه‌می دؤنوم؟
قولامی چئوریلیم، شاهامی دؤنوم؟
چمنیم، چیچییم، گولوم، گولابیم،
من سنین قلبینه نئجه یول تاپیم؟
تانری سووقاتیم‌سان، دین ایشیغیم‌سان،
سحر شفقیم‌سه‌ن، دان ایشیغیم‌سان،
ان شیرین لهجه‌م‌سن، دانیشیغیم‌سان،
بوتون سواللارا سن‌سن جاوابیم،
من سنین قلبینه نئجه یول تاپیم؟
منیم ایلک سئوینجیم، سون ایضطیرابیم،
من سنین قلبینه نئجه یول تاپیم؟