کولت. آز گونئی‌لی شاعر علی داشقینین "چکیجی" شعرینی تقدیم ائدیر:

چک قارداشیم
شکیلین، گؤرسه دوشوندورسون هرکیمی!
چک "بابک"ی،"نبی"نی
داغدا دایانسینلار اَر کیمی!
چک "تبریز"ین اوره یین
قیرمیز آلنینی
او "اَرک"یمی!...

چک!
گؤزلریندن اؤپر توپراغین گؤزو
چک!
چکدییین اَمه یی ائل بیلر اؤزو
چک ده
دوشونسون حامی یوردومو درین
گؤنلوم سنین یاتاغین
سیغناغین، یئرین!
چک داغلارین بولاغین، چایلارین سئلین
چکسن
چکر غمینی دوغما تورک ائلین!...

چک!
"اورمو"نون دنیزین، "شیبلی"نین گؤلون
بنزت "مغان" دوزونون جنته چؤلون
چک یوردون هر یئرین
سپه لن، مین یئره بؤلون!
آلسین سنی "قوشاچای"، "سولدوز"، "اورمو"یه
باس باغرینا ائلینی جان دئیه دئیه!

چک!
بیر "اوجان" محالی، بیر "قیزیل اوزَن"
ککلیک یارات قایالاردا
اوچوب، سوزن
چک بیر "مارال"
تئلینه آغ "چیچک" دوزَن
قالدیر "سهند"ی گؤیلره، گؤیلر قوجالماسین!
آلچاق دره تپه "ساوالان"دان باج آلماسین!...

چک!
"قیز کؤپروسو"ن
و اورداکی "قافلان داغی"ن گؤرونتوله!
"حئیران" دا چک، یاشیل
آه، چک!
گؤزل صنعتین وار، اؤلونجه قیل!
"داشقین" سئل اولسا دا گؤنول
یئنه ده ائللره تاخیل!
چک بیر "خزر"
قیراغیندا گؤزل "باکی"!
چک"نخجوان"، "قاراباغ"، "گنجه"، "داش ماکی"!
چک ده
چکیلسین ائلیمین گؤز ببَکلری
سئوسین حامی دیلینی
بیر ده هر یئری
چک!...