کولت. آذ زلیمخان یاقوبون "سیزی قینامیرام" شعرینی تقدیم ائدیر:

بو اثری منه خوجالی دردی، شوشا عذابی، لاچین آغریلاری یازدیریب.

سیزی قینامیرام آی خوجالیلار،
سیزین باشینیزدا شیمشک اوینادی.
سیزین باشینیزدا دومانلار اولدو،
میللتین داغ بویدا فلاکتینه،
گؤزونون اوجویلا دؤنوب باخمایان،
نازلانیب گؤزونو یومانلار اولدو!
من قوربان گؤرموشدوم قوچدان، قوزودان،
من قوربان گؤرموشدوم قویون قوربانی.
بیر بئله میللتی، بیر بئله خالقی،
گؤر کیملر ائلدی اویون قوربانی.
آی لاچین! یارالی جانینا قوربان،
آی شوشا! آغلاما بویونا قوربانی!
ناموس‌سوز اولانین نه وئجینه‌دیر،
هاردا ناموس گئدیر، هاردا آر گئدیر.
هله تاپاممیریق اویونچولاری،
اورتادا شیدیرغی بیر قومار گئدیر.
لاچین قاییتماسا لاچینلیغینا،
شوشا قاییتماسا شوشالیغینا،
مین دفعه شوبهم وار، ترددودوم وار
بوگونکو بیلرین بی اولماغینا!
بو گون پاشالارین پاشالیغینا!
واختیندا یوماساق گوناهیمیزی،
گورو چاتلایاجاق بابالاریمین،
سلطان بی لاچیندان باش قالدیراجاق!
پناه خان شوشانین قالاسی بویدا،
بیزیم باشیمیزا یاغدیرماق اوچون
قایا اوچوراجاق، داش قالدیراجاق!
یئرین آغیرلیغی، گؤیون لنگری،
سیخیب خینجیم-خینجیم از‌جک بیزی.
چوخ اللر توتاجاق چوخ یاخالاردان،
روحلار آددیم-آددیم گزه‌جک بیزی!
روحلار دئمه‌یه‌جک گوناه کیمده‌دی،
حکیم‌ده، شاعرده، یا حاکیم‌ده‌دی.
روحلار دئیه‌جک کی، دوشونه‌جک کی،
دونیانین دوز واختی بو یئر اوزونده
خوجالی آدلانان قیرغین اولوبسا،
بیر نسلی قیریبسا اوغول-اوشاقلی،
قیرانلار اؤزونه وورغون اولوبسا،
جاوانلار یوللاردا پلسنگ اولوب،
قوجالار چؤللرده یورغون اولوبسا،
تک بیرجه نفرین بو خالق ایچینده،
عصمتی، ناموسو لکلنیبسه،
بیر وطن اؤولادی، بیر وطن قیزی،
آغریلار الین‌ده یئددی قات اولوب،
دوشمن سئوینجین‌دن یئکلنیبسه،
مغرور بیر دده‌نی کیمسه‌سیز گؤروب،
بیر گده اوستونه ککلنیبسه،
بئله بیر وطنین وطنداشلاری،
یئرسیزدی اوستون‌ده یاراق گزدیره!
آرتیق‌دی باشین‌دا پاپاق گزدیره!
بئله بیر تورپاغین آداملارینا،
یوز دفعه، مین دفعه حاق‌لی‌دی دوشمه‌ن،
ایت کیمی یال تؤکه، یالاق گزدیره!
الله! گؤرونممیش معجزه گؤستر،
قال‌دیر بیر آنلیغا خانی مزاردان.
دیرینه‌ن اؤلونو اوز-اوزه گؤستر،
قورتارسین یاتانین جانی مزاردان.
ایختیار واختین‌دا، قوجا یاشین‌دا،
قلیان داماغین‌دا، پاپاق باشین‌دا،
قوی گؤرسون شوشاسی نه گونه دوشوب!
ائللر تاماشاسی نه گونه دوشوب!
"قیرمیزی قوفتالی، یاشیل تومانلی،
شوشانین داغلاری باشی دومانلی"،
بو اولو ماهنینی منیم خان بابام،
اوخوماق ایسته‌سه اوخویا بیلمز!

آنجاق قان قوخویار اونون نفه‌سی،
یقین کی، گول-چیچک قوخویا بیلمز!
اوخوماز، قاوالی داشلارا چیرپار!
اوخوماز، باشینی داشلارا چیرپار!
سنی آند وئریرم قادیر اللها،
اوخوما، آی قدیر، اوخوما داها!
جابباردان عاییبدی، خان‌دان عاییب‌دی،
ناتوان آغلاییب گؤز یاشی تؤکور،
شهری داغیلیب، اوندان عاییب‌دی!