بو گون دونیا شهرت‌لی آذربایجان‌لی عالیم، صونعی اینتلکت ساحه‌سین‌ده غیری-سلیس منطیق نظریه‌سینین بانی‌سی، کالیفورنییا بئرکلی اونیورسیتئتینین پروفسورو لطفی زاده‌نین (اصل آدی لطف علی رحیم اوغلو علسگرزاده) دوغوم گونودور.

Kult.az خاطیرلادیر کی، لطفی زاده ۱۹۲۱-جی ایل فئورالین ۴-ده باکینین نووخانی کندین‌ده، رحیم علسگرزاده و یهودی اصیل‌لی روس اوشاق حکی‌می اولان فئیقا (فانیا) مویسیونا کورمانین عائله‌سین‌ده دونیایا گلیب.

او، ایلک تحصیلینه باکی‌داکی ۱۶ سایلی مکتب‌ده باشلاییب. ۱۹۳۲-جی ایلده سووئت اتفاقینین ایران وطنداشی اولان آذربایجان‌لیلارلا باغلی قبول ائتدیی قرارا گؤره عائله‌سی ایرانا قاییدیب. بیر چوخلاری، خصوصیله ده قوهوملاری بو آددیمین گله‌جکده لطفی زاده فنومنینین فورمالاشماسیندا بؤیوک رولو اولدوغونو قید ائدیرلر. چونکی او ایللرده اس اس ار ای-ده کیبرنتیکا، اینفورماتیکا، گنتیکا کیمی علملره قارشی منفی مناسیبت وار ایدی و چتین کی، بئله موحیط‌ده لطفی زاده اؤز علمی ایله ایر‌لی گئده بیلردی.

بئله‌جه، او، ۱۰ یاشین‌دا ایکن عائله‌سی ایله بیرلیکده باکینی ترک ائد‌رک تهرانا کؤچوب. تهرانا کؤچدوکدن سونرا تحصیلینی آمریکالیلارین آلبورز میسسیونر مکتبینده داوام ائتدیریب. اورتا تحصیلینی تماملادیق‌دان سونرا ایسه تهران اونیورسیتتینین الکتریک مهندیس‌لییی فاکولته‌سینه داخیل اولوب.

بؤیوک عالیمین آمریکا حیاتی ۱۹۴۴-جو ایلده‌ن باشلاییر. تهران اونیورسیتتینی بؤیوک اوغورلا باشا ووردوقدان سونرا او، آمریکایا گئدیب و تحصیلینی ماسساچوسئتس تکنولوگییا اینستیتوتوندا داوام ائتدیریب. ۱۹۴۸-جی ایلده کلمبییا اونیورسیتتین‌ده الکترون مهندیس‌لییی اوزره ماگیستر، ۱۹۵۷-جی ایلده ایسه پروفسور درجه‌سی آلیب.

لطفی زاده کالیفورنییا بئرکلی اونیورسیتتینین عمورلوک پروفسورو سئچیلمیش یئگانه شخص‌دیر. او، چوخلو سایدا معتبر جمعیتلرین و فوندلارین موکافاتلارینا لاییق گؤرولوب، مئداللارلا تلطیف ائدیلیب. اونلارلا خاریجی دؤولت و اجتماعی تشکیلاتلارین فخری دوکتورودور. لطفی زاده دونیادا اثرلرینه ان چوخ ایستیناد ائدیله‌ن عالیملردن ساییلیر. تکجه ۱۹۹۰-۲۰۰۰-جی ایللرده اونون اثرلرینه ۳۶۰۰۰-دن چوخ ایستیناد ائدیلیب.

کالیفورنییانین بئرکلی شهرینده «اینفورماسییا تکنولوگییالاری اوزره زاده اینستیتوتو» یارادیلیب.

بو گون دونیا علمینه لطفی زاده‌نین ۶ موهوم نظریه‌سی معلومدور. حاضردا اونلار علم و ایستحصالاتدا گنیش شکیلده تطبیق اولونور. اونا دونیا شهرتی قازاندیران، اونون دونیا علمین‌ده اینقیلاب حساب اولونان غیری-سلیس منطیق نظریه‌سی‌دیر. بو نظریه ریاضیاتین اساسی اولان ایکیلی چوخلوق آنلاییشینا یئنی ایفاده وئرمیشدیر: غیری-سلیس چوخلوق. علم‌ده غیری-سلیس اؤلچونون داخیل ائدیلمه‌سی طبیعت‌ده و جمعیت‌ده گئدن پروسئسلرین غیری-معینلیینی داها آدکوات نظره آلماغا ایمکان یارادیر.

آپاریجی دونیا شیرکتلری طرفین‌دن تطبیق اولونان بو نظریه ۱۹۶۵-جی ایلده ایشله‌نه‌رک حاضیرلانیب. نظریه اوزون مدت آمریکا علمی ایجتیماعیتی طرفین‌دن قبول ائدیلمه‌سه ده، اؤتن عصرین ۸۰-جی ایللرینده یاپون عالیملرینین دقتینی جلب ائتدیی اوچون اونلار بو اونیکال نظریه‌دن یارارلانماق قرارینا گلیب. بو گون یاپونییانین "میتسوبیشی"، "توشیبا"، "سونی"، "کانون"، "سانیو"، "نیسان"، "هوندا" و دیگر نفوذلو شیرکتلری غیری-سلیس منطیق نظریه‌سینه اساس‌لانان فوتو و ویدئوکامرالار، پالتاریویان ماشینلار، واکوم کیمیوی تمیزلییجیلری ایستحصالین‌دا، آوتومبیللرین، قطارلارین، صنایع پروسئسلرینین ایداره اولونماسیندا گنیش ایستیفاده ائدیرلر. لطفی زاده ۱۹۸۹-جو ایلده غیری-سلیس منطیق نظریه‌سینین صنایع‌ده‌کی اوغورلارینا یاپونییانین علم آداملارینا وئردیی ان یوکسک "هوندا" موکافاتی ایله تلطیف اولونوب. بو گون بو نظریه آمریکانین "گنرال موتورز"، "گنرال الکتریک"، "موتورولا"، "دوپونت"، "کوداک" و باشقا شیرکتلری طرفین‌دن ایستحصالات‌دا گئنیش تطبیق اولونور. حاضردا بو نظریه‌دن اقتصادیات‌دا، پسیخولوگییادا، لینقو ایستیکادا، سیاست‌ده، فلسفه‌ده، سوسیولوگییادا، دینی مسئله‌لرده، موناقیشه پروبلملرین‌ده ده ایستیفاده اولونور.

غیری-سلیس منطیق نظریه‌سیندن علاوه لطفی زاده ۵ فوندامنتال علمی نظریه تکلیف ائدیب: "طوراتلار نظریه‌سی"، "سیستملر نظریه‌سی"، "سؤزله ایشله‌یه‌ن کومپوتر نظریه‌سی"، "اوپتیمال سوزگجلر نظریه‌سی" و "سوفت کومپیوتینگ".

لطفی زاده ۲۰۱۳-جو ایلین ۱۹-۲۰ ایون تاریخلرین‌ده مادرید شهرین‌ده ایسپانییانین ببوا فوندونون علم و مدنیت ساحه‌سی اوزره تاسیس ائتدیی موکافاتلانما مراسیمینده اینفورماسییا-کومونیکاسییا تکنولوگییالاری کاتگورییاسیندا ۴۰۰ مین آورو دیرینده موکافاتا لاییق گؤرولوب.

۲۰۱۶-جی ایلده اونون نظریه‌سی اساسین‌دا یاپون عالیملری طرفیندن ایلک دفعه اولاراق صونعی-اینتلکته مالیک روبوت حاضیرلانیب. «آلتر» آدلی روبوت توکیوداکی بین الخالق علم موزئیین‌ده سرگیلنیب.

لطفی زاده ۶ سنتیابر ۲۰۱۷-جی ایلده آمریکانین کالیفورنییا ایشتاتین‌دا یئرلی واختلا سحر ساعت ۷:۳۰-دا ۹۷ یاشین‌دا دونیاسینی دییشیب. عالیم ساغلیغین‌دا باکی‌دا دفن اولونماسینی وسیت ائتدیی اوچون اونون نشی سنتیابرین ۲۹-دا وطنه گتیریلیب.

همین گون آکادمیادا عالیمله ویدا مراسی‌می کئچیریلیب. مراسیم‌ده پرزیدنت ایلهام علیئو باش‌دا اولماقلا، دؤولت و حکومت رسمیلری، علم و مدنیت خادیملری ایشتیراک ائدیب. دونیا شهرت‌لی عالیم ۱-جی فخری خیابان‌دا تورپاغا تاپشیریلیب.