آنا صحیفه کولت |
طبیعی کی، سیاسی سبب ده اولمامیش دئییل، اما بو حادثه شاعرین پویزییاسیندا سیلینمز ایزلر بوراخدی. ایللر سونرا ثریا ایله گؤروشهن شاعر چوخ ساده، عادیدن-عادی سوال وئردی اونا: ایندی نیه؟
گلمیسهن، جانیم سنه قوربان اولا، ایندی نیه؟
دوشموشم الدهن داها، ای بیوفا، ایندی نیه؟
نوشداروسن، فقط سؤهراب اؤلوب، گئج گلمیسن!
ائیلمز تأثیر اونا هئچ بیر دوا، ایندی نیه؟
سئوگینین عمرو بیلینمیر. اما بیر آز درین دوشونهنده هر شئیین دییشیلدیی، هر شئیین بیتدیی، هر شئیین کئچدیی ده اینکار ائدیلمز... شاعرین سوالی ایسه (ایندی نیه؟) هئچ وجهله پوئتیک سوال دئییل، داها چوخ فلسفهنین، پسیخولوگییانین، حتی سوسیالوگییانین آراشدیرما مؤوضوعسودور. هر شئی کئچیب گئدندن، عاشیقین قانادلاری قیریلاندان، اؤزو طاقتدن دوشندن سونرا یانینا گلمیین اهمیتی وارمی، بیلمیرم؟!
شهریار بو سارسینتیسینی، آغریسینی هله اوزون ایللر موختلیف شعرلرینده سؤزه چئویریردی، بیر واخت «سندن ساوایی دونیادا هر شئیدن اوساندیم» دئدیی قادیندان آیریلماق ائله بوتون دونیادان آیریلماق، هر شئیدن اوزولمک دئمک ایدی:
داغ چکدی سینهمه نئجه ده آیریلیق داغین،
آیریلمیشیق بو ظلمله آرییلا شان کیمی.
سیزده، گولوم، مگر نئچهدیر نیرخی بوسهنین،
گؤوهر ساییر گؤزوم بیر عؤمور ارمغان کیمی.
هیجرینده هر گئجه باشیما دؤیدویوم بو ال،
ایندی سوراهی بوینونو قوجموش جاوان کیمی.
ای غم، یولون اوغورلو، فقط حاق-سای قالیر،
بوشدور یئرین اورکده، یاخین مهریبان کیمی.
سن آیریلیب گئدنده، فغان ائتدی شهریار،
تأثیرلی بیر فغان یوخ ایمیش بو فغان کیمی. بلی، سادهجه خیال کیمی ده اولسا، شاعرین یانیندا، یادیندا، دوشونجهسینده ایدی همیشه. حیاتینین آخیر ایللرینده وئردیی موصاحیبهلرینده بو مؤوضوعدا سواللارا جواب وئرمیردی شاعر، بو حاقدا دانیشماق ایستمدیینی بیلدیریردی، گؤرونور، زامانلا همین حادثه قاداغان مؤوضوعیا چئوریلمیشدی اوندان اؤترو:
بسلدیم گؤز یاشی گؤزلرده من اؤولاد یئرینه،
آخدی گؤز یاشلاری، یاخدی منی حسرت کدری.
همدم ائتدیم اؤزومه ایندی ده تنهالیغی من،
تک قالاندا دئدیم اینسانین اولور چوخ هونری.
شهریار ۴۰ یاشیندا ائولنیر، عزیزه آدلی بیر خانیملا، اما بو ائولیلیگی ده چوخ چکمیر، عزیزه بیر نئچه ایلدهن سونرا خستهلیکدن دونیاسینی دییشیر. شهریار عمرونون سونونا کیمی عزیزهنی ده بؤیوک غصه ایله خاطیرلاییردی. عمومیتله، قادینلارین شاعره تأثیری، شعرلرینده اونلاری دؤنه-دؤنه یادا سالماسی دیقت چکن مقامدیر. ننهسینین اؤلوموندن سونرا یازدیغی «خان ننه» شعرینی شاعر آغلایا-آغلایا اوخویور، ایلک گنجلیینده فارسجا یازان شهریار محض آناسینین «دئییرلر یاخشی شاعرسن، اما منیم ده آنلادیغیم دیلده یاز» سؤزوندن سونرا تورکجه یازماغا باشلاییب و آناسینا حصر ائتدیی «ای وای آنام» شعیری ده بؤیوک حیرانلیقلا یازیلیب، پریسینه - ثریاسینا یازدیغی شعیرلر ده مؤوضوعسو، قورولوشو وزنی اعتیباریله کلاسسیک ادبیات نمونهلریندن چوخ دا سئچیلمیر، اما شاعرین بؤیوک، چوخ بؤیوک سئوگیسی هر میصراعدان دویولور. بیلمیرم، بلکه ائله شاعری شاعر ائدن ده محض بو قادینلار، اونلارا سئوگیسی، اونلاردان آیریلیغی و بو آیریلیقلاری یازماق ایستعدادی اولوب...
تاریخ
2019.02.17 / 11:55
|
مولف
آیتاج آراز
|