کؤچورن: فرخ جرایدی

نینا ایله آرشاک گئتدیکدن ایکی گۆن سوْنرا نینا نین باجیسی بئله بیر تلگرام آلمیْشدی:

« مرند شهری ایله جولفا آراسیْندا بۆتۆن شئی‌لریمیزی حتا ویزالاریمیزدا اوْغورلاندی . اؤزۆم و اریم اۆچۆن ایکی ویزا گؤندرمه‌لی‌سینیز . ویزالار ایران جولفاسیْندا کنسول ژنرال ژارسکی جنابلارینین آدرسینه گؤندریلمه‌لیدیر».

تلگرام آلیْنان کیمی ویزالار گؤندریلدی . بئله‌لیکله ایتمش ویزالارلا همیشه تبریز له جولفا آراسیْندا باریْت و ساییر شئی‌لر گتیرمک اۆچۆن ایشله‌دیلمه‌گه باشلاندی . هئچ بیر شئی اوْغورلانمامیْشدی . بوُ تلگرام داها ایکی ویزا آلماق اۆچۆن واقتی ایکن قوُرولموش بیر ایش ایدی . نینا نین اؤزۆده آرشاک لا برابر تبریز-ه قاییتدی . نینا و آرشاک-یْن گتیردیگی ماللار روُس جولفا سیْندا " نصرالله شیخ اوْو " -ون آنباریْندان گؤتۆرۆلۆب کنسول خانا نین اؤزۆنه اؤزل تاشیْتلاری ایله تبریز-ه گتیریلمیشدیر . تبریزده " جهنم ماشین لاری " و بؤیۆک حجم‌ده بوْمبالار قاییریب مئیدانا چیْخاردیق . بوْمبالاردان اَن بؤیۆکۆنۆ سیْناماق اۆچۆن بیر تاخیْم ( تیم ) یاراندی.

بوْمبا امیره خیْز خارابالاریْندا سیْناقدان کئچیریله‌جکدی .

مجاهد لردن و انجمن اۆیه‌لریندن ده چوْخ آدام توْپلانمیشدی.

بوْمبا آتیْلاندا دوْغرو داندا بیر جهنم قیامتی قوْپاردی . سسیندن بۆتۆن امیره خیْز سیلکه‌لندی . بیر نئچه خارابا دیوارین آلتیْنی اۆستۆنه چئویردی . بوْمبالار اوُغورلو چیْخدی .

بوْمبالار بلغاریا دا قایریلان بوْمبالاردان داها گۆجلۆ ایدی .

بیز سردارین نه دئیه‌جگینی گؤزله‌ییردیک .

نهایت سردار گؤزلرینین توْزونو سیلدی . سؤزه باشلایاراق :

« بۆجۆر بیر بَلانی انسان ایچه‌ریسینه آتماق دین‌دن و انصاف‌دان اوُزاقدیر . چوْخ انسان تلف ائدر . چوْخ دا ائولر داغیْدار . بلا لاری داها قایریلماسین ، شهر ایچینده آتماق یاراماز»

نینا قافقاز دان قاییدیب میلرین ائوینه گئتدیکده اوُشاقدان بؤیۆگه قدر اوْنون عایله حیاتی ایله ماراقلانیْردیلار .کنسولون قادیْنی بالاجا نینانی قوُجاقلاییب اؤپدۆ ، توْیلارینین نئجه کئچدیگینی سوْروشدو . نینا چوْخ اومودسوز بیر جواب وئردی :

« عایله‌لری چوْخ نانجیب بیر عایله دیر . ائوی ، باغچاسی یوْخدور . بؤیۆک شهر دگیل ، الکساندروْپولون اوُزاق بیر کندینده دیر . بیز اوْرایا گئتمه‌لی اوْلساق من اوْردا بیر گۆنده یاشایا بیلمرم . چوْخ یوْخسول دورلار . قوُرو حصیر اۆستۆنده اوْتورورلار . کندلیلری منیم اۆستۆمه ، باشیْما باخیْب گۆلۆردۆلر . اؤزل لیکله آرشاک-یْن کئچمیشی ده یاخجی دگیلمیش»

کنسولون عایله‌سی بوُ دوُروما چوْخ تاسسوف ائدیردی . ژنرال کنسولون اؤزۆده اوْتاغیندان چیْخیب بوُ دانیْشماغا گلدی .
نینانین آلنیْندان اؤپدۆ.

« قیْزیم خوْشبخت‌لیگینیز باش توُتدو مو ؟"

نینا آرتیْق بیر اوْیونچو روْلو اوْیناماغا باشلامیْشدی . بوْغازی توُتولدو . دانیْشا بیلمه‌دی . الینی گؤزۆنه قوْیوب قیْزلارین اوْتاغینا کئچدی . کنسولون قادیْنی نینانین یئنی حیاتینی چوْخ بؤیۆک بیر اۆزۆنتۆ ایله سؤیله‌مه‌گه باشلادی :

« گنج قی‌زلارین سئوگی‌سی باشلاریْنا بلادیر . ایندی نه ائتمک اوْلار ؟ سئودی ، گئتدی . ائله بیر آداما گئتدی کی یازیْق قیْز اوْنون حیاتینی دئدیکده ، اوُتانماغیْندان ترله‌مگه باشلادی . هئچ بیر شئی یوْخوموش . عایله‌سی‌ده بؤیۆک دگیلمیش».

میلر باشیْنی ترپه‌دیب قادیْنینی دینله‌ییردی . سیغاراسینی یاندیریب سؤزه قاریْشدی :

« آلمان لاردا گؤزل بیر آتا-بابا سؤزو وار " قادیْنلار آغلیْندان ، کیشی لر ایسه گؤزۆندن تله‌یه دۆشر " . آغیْل‌سیز قیْز گؤزل گنج-ی گؤرۆرکن سئویر . اوْنون عایله‌سینی و یاشامینی اگنینده گؤردۆیۆ بزه‌کلی پالتارلارلا اؤلچۆر . سئویشیر و ائوله‌نیر . سوْنوجدا بیزیم نینانین دۆشدۆگۆ دوُروما دۆشۆر . »