کؤچورن: فرخ جرایدی

نینا زینب-ی چوْخ سئویردی ، اوْنو اؤز گؤزۆ کیمی بسله‌ییردی . زینب‌دن آزربایجان‌جا دانیْشماغی اؤیرنیردی .

زینب-ین دؤرد یاشلی اوْغلو " مجید " چوْخ زامان گئجه‌نی‌ده نینانین یانیْندا کئچیریردی .

زینب سماوری گتیریب ماسانین اۆستۆنه قوْیدو . مجید ده ائیوانین اۆستۆنده اوْتوروب آیاقلاریْن اوْینادیردی . اوْ ، اؤزۆنۆ بیزه سئودیرمیشدی . نینا اوْندان تئز-تئز:

« مجید سن نه سن ؟ » - دئیه سوْروشدو

« مجاهیب »- دئیه جواب وئرن مجید بیزیمله بیرگه گۆلمه‌یه باشلایاردی . سوْنرا الینده کی کانفِت ( شکلات ) پارچاسینی زوْرلا نینا نین آغزیْنا سوْخوب « بیراز دیشله » دئیه آیاقلارینی یئره چیْرپاردی . زینب سماوری قوْیدوقدان سوْنرا مجید-ی آلیْب باییرا چیْخماق ایسته‌دی . من اوْندان بیراز اوْتورماغین ایسته‌دیم .

« اوْتورون زینب باجی » دئدیم.

زینب شاشقیْنلیقلا اۆزۆمه باخدیْ . یقین کی اوْ منیم آزربایجانلی اوْلدوغومو بیلمیرمیش ، چۆنکۆ اوْنو بیرینجی دفه دیندیریردیم . زینب باشیْندا کی شالیْنی آغزیْ‌نین اۆستۆنه ائندیریب یاشماغیْنی دۆزلتدی و قیْزاریب دئدی :

« آند اوْلسون آللاها من سیزین مسلمان اوْلدوغونوزو یالنیز ایندی‌جه بیلدیم . آلیْش-وئریشچی اوْلدوغونوزو بیلیردیم ، آما نینا باجی مسلمان اوْلدوغونوزو منه دئمه‌میشدی . مسلمانا دا اوْخشادیردیم ، آما سوْروشماغی عیب حساب ائدیردیم .»

« عیبی یوْخدور ، زینب باجی .بۆجۆر شئی‌لر چوْخ اوْلور . انسان بیردن-بیره تانیْش اوْلا بیلمز .»

« اگر جواد آغا بیلسئیدی ، منی هئچ وقت مسلمان ائوینده قوُللوق ائتمه‌گه بوُراخمازدی . تبریزده بئله عادت یوْخدور . بوُرا جماعتینین خاصیتی چوْخ پیسدیر .»

« زینب باجی اؤزۆن بیر دوْغرو سونو سؤیله ، سیز ایندی‌یه کیمی بیزدن بیر پیسلیک گؤرۆبسۆنۆز مۆ ؟ »

« آللاه ائله‌مه‌سین . من سیز ده گؤردۆیۆم حرمت ، آزادلیْغی هئچ کس‌ده گؤرمه‌میشم .»

« ایندی کی بوُ حرمتی هئچ کسده گؤرمه‌میسینیز ، داها مسلمان اوْلدو ، باشقا سی اوْلدو ، سیزین اۆچۆن نه فرقی واردیر ؟ سیز ده ، نینا دا قادیْن سینیز. سیزین آرانیْزدا هئچ فرق واردیر می ؟ »

« البته یوْخدور . آی قارداش من ائله بیلیردیم کی سیز ده نینا باجیْ‌نین مذهبیندن سینیز . آما بوُنونلا بیرگه سیزی اؤز قارداشیم کیمی سئویردیم . یاخشی اوْلدو کی شوبهه‌دن چیْخدیم . آما نه ائله‌مک اوْلار ، قایدانی بئله قوْیوبلار . یا گرک خالقیْن ایچیندن چیْخاسان ، یا دا کی خالق گئدن یوْل ایله گئده‌سن .»

« زینب باجی ،خالق گئدن یوْل ایله گئتمک اوْلماز . خالقیْن گئتدیگی یوْل سیزی یئنه ده چارشابدان چیْخماغا قوْیماز .»

« اصلینه باخساز من عادت-زاد سئون دگیلم . آما جواد بیراز قیْسقاندیر . حتا منیم دلاله‌زن-ده گئدیب شئی ساتماغیْما راضی اوْلمادی .»
« جواد آغا نه ایش گؤرر ؟ »

« اَه ، نه ایش گؤره‌جک . بیر پارچا چؤرک‌دن اؤتورو باشیْنی کۆت پیچاغا چکیر . آما نه فایدا کی ، چؤرک ده چیْخماییر . »

« هارادا چالیْشیر ؟ »

« دوْروسونو دئسم ، یئنه‌ده بدبخت اوْلاجاغام .»

« نه اۆچۆن ؟ »

« بلکه آجیْغینیز گلدی »

« زینب باجیْ بوُ نه سؤزدۆر ؟ آجیْغیم نییه گلسین ؟ »

« هر یئرده کی قوُللوغا گیریشمیشم یالنیز اَریمین آدینی بیلنه قدر قوُللوق ائله‌میشم .»

« عجب ، سیزین اَرینیز قوُلدور مو ، جانی می و یا اوْغدور مو ؟ »

« هئچ بیری‌سی دگیل. اوْ کاسیب ، نزاکتلی ، اۆرگی یوُخا بیر گنج دیر . آما ایندیکی ایشی هئچ کسین خوْشونا گلمیر . آلیْش-وئریش‌چیلر و وارلی لار مجاهدلری گؤرمک ایسته‌میر . سیز ده آلیْش-وئریش‌چی سینیز . قوْرخورام کی جواد آغا مجاهد اوْلدوغو اۆچۆن منی ائودن قوْواسینیز»

زینب باجی بوُ نه سؤزدور . بیر بوُ کی بیز چوْخ دا بؤیۆک تاجر دگیلیک . ایکی اینجی ، مجاهدلری سئویریک ، چۆنکۆ اوْنلار اؤز حاقلارینی آلماق یوْلوندا دؤیۆشۆرلر . اوْنلارین ایچینده چوْخ سئویملی و صمیمی آداملار وار .»

« جواد آغا سئویملی و صمیمی اوْلدوغو اۆچۆن ده بیزی بوُ گۆنه قوْیدو . بیزیم ائویمیز ، ائشیگیمیز وار ایدی . هامیسی داغیْلیب گئتدی . گرک جواد آغا اوْ رحمتلیک قافقازلی ایله هئچ ده تانیْش اوْلمایایدی . »

« نئجه قافقازلی ؟ جواد آغا اوْنو هاردا گؤرمۆشدۆ ؟ »
« بوُنو سیزه ناغیْل ائتسم باشیْنیزی آغریْدارام . چۆنکۆ چوْخ اوُزون دور .»
« عیبی یوْخ زینب باجی ناغیل ائله .»