کؤچورن: فرخ جرایدی

میس هاننا-نین کیچیک دفترینده یازدیغین گؤررکن اوْنون اۆچ گۆن اؤنجه " ایراندا خیریه ایشلرینه باشلایاجاغیق، سیاست له هئچ بیر ایشیمیز یوْخدور " سؤزلرینی خاطرله‌دیم. آمریکالی‌لارین ایرانداکی تزار سیاستی ایله ماراقلاندیغینا ایناندیم.

روُس استقراض بانکی‌نین مادی حمایه‌سی آلتیْنا گیرن و تزار ژاندارمیْنا آرخالاناراق ایران کندلی‌سینی راحت‌جه سوْیانلارین بایرام ائتدیگینی، هر بیر آددیمدا گؤرمک اوْلوردو.

شوسه یوْلوندا بیر روُس اوْن باشی‌سی ایله بیر ایران تاجری‌نین دانیْشیغینی دینله‌ییردیم. اوْ روُس‌جا دانیْشا بیلمه‌سه‌ده، من اوْنون نه دئمک ایسته‌دیگینی آنلاییردیم. اوْن باشی چوْخ ساغلام بیر گنج ایدی. تاجرین کیم اوْلدوغونو فایتوْنچودان سوْروشدوم. ' داران ' کند تاجرلریندن ' حاج سلمان آغا ' اوْلدوغونو سؤیله‌دی.

دانیْشیقلاری چوْخ ماراقلی ایدی.

ــ سیزین شاه-یْز چوْخ بؤیوکدور. من دئدیم کی سندن چوْخ خوْشوم گلدی.

بوُنو سؤیله‌یه‌رک حاج سلمان سالدات-ین اۆزونو و چنه‌سینه اَل چکدی و یئنه‌ده سؤزونه دوام ائتدی:

ــ سیزین آداملاریزین ذاتی خرابدی.

بوُ سؤزو ائشیدر-ائشیتمز سالدات تاجره بیر سیللی ووُردوغونو گؤردوم. اوْنون پاپاغی دا یئره دۆشموشدو. اوْ یالواریردی و تئز-تئز دئییردی:

ــ من کی پیس سؤز دئمه‌دیم. نییه ووُرورسان؟
سالدات اوْنون یاخاسیندان یاپیْشیب :

ــ اؤز ذات-ین خرابدی. کؤپک اوْغلو.

دئیه اوْنو هارا ایسه سۆرویوب آپارماق ایسته‌ییردی. چوْخ آدام ییغیشمیشدی ، هامی دا بیلر-بیلمز حاج سلمان-ی سؤیور و اوْن باشیْنا توْختاخلیق وئرمه‌گه چالیْشیردی.

بیز اوْرادا دوُرمادیق، فایتوْندا اوْتوردوق، گؤردوگوم گؤرونتو قانیمی قارالتمیشدی. هئچ بیر سؤز دانیْشمیردیم.

میس هاننا:

- بیز هارادا دۆشه‌جه‌ییک ؟ دئیه سس‌سیزلیگه سوْن وئردی.

- بوُردا دینجلمک اۆچون هتل یوْخدور ، جوُلفا قرارگاه شکلینی آلیبدیر. دئیه جوابلادیم.

- بس نه ائدک ؟

- تانیْش بیر آدامیْن ائوینه گئتمه‌لی‌ییک

- البته بوُ آنجاق سیزین اۆچون ممکن‌دور. من ایسه تانیْش اوْلمادیغیم بیر آدامیْن ائوینه نئجه گئده بیلرم ؟ دئیه قیْز منه باخدی.

- سیز اوْنلارین یاخیْندان تانیْش اوْلدوغو بیر آداملا تانیْش‌سینیز، بوُ دا یئترلی دیر.

فایتوْنوموز پست-تلگراف مودورونون قاپیْسیندا دوُردو. خان-یْن قوُللوقچولاری و اوْغلانلاری قاپییا چیْخدی، منی گؤرونجه سئویندیلر، شئی‌لری فایتوْندان گؤتوردولر. اوُشاقلار آنالارینا خبر وئرمک اۆچون پیلله‌کانلاردان یوُخاری قاچدیلار. بوُرادا داها بیر ایش باش وئردی کی اوْ دا خان-ین اوْو دان اوُغورلا قاییتماسیندان و بیزیمله قاپیدا اۆز-اۆزه گلمه‌سی ایدی.

پیلله‌کانلاردان یوُخاری قالخارکن، اوْنونلا گؤروشدوک. میس هاننا-نی اوْنونلا تانیْش ائدیب بیرلیکده یوُخاری چیْخدیق خان-ین خانیْمی منی آمریکالی قیْزلا گؤره‌رک گۆلدو و قیْزی سایقی ایله قارشیلاییب و ییخانماق ( یوُوونماق) و بزه‌گینی دۆزلتمک اۆچون اؤز اوْتاغینا آپاردی.
من خانیْمین نه اۆچون گۆلدوگونو آنلادیم و خان-ا دؤنوب:

- "تانیْشیمیز هر سئری بیر قیْزلا گلیر" دئیه خانیْمیز گۆلدو, دئدیم، بوُ سؤزومو خان دا دوْغرولادی و:

- خانیْم نینا-یا بؤیوک سایقی بسله‌دیگیندن، سیزی باشقا بیر قادیْنلا گؤررکن گۆلمه‌گه و شبهه‌لنمه‌گه حقلی‌دیر. چۆنکو اوْنون بیزیم نه ایش گؤردوگوموزدن و نه آماج داشیْدیغیمیزدان خبری یوْخدور.