اوستاد «عباس بابايی» شعر عالمينده و اؤز ادبی ياراديجيليغيندا «سؤيلر» تخلصونو سئچميشدير. سؤيلر جنابلاری محتشم اسلافی كيمی شعرلرين فارس و تورك ديللرينده ترنم ائده‌ن شاعر لرده‌ن بيريسی دير.

بو شاعیردن ۱۳۷۷ اينجی گونش ايلی توركجه «گليره‌م» عنوانلی بير مجموعه چاپا وئريلیبدير. بيز بوردا «گليره‌م» مجموعه سينه اؤتری باخماق مقصدينده يك.

«گليره‌م» مجموعه‌سی بو آز مدتده اؤزونه بير اوستون و ده‌يرلي يئر آچماقدادير. بو كيچيك چلنگيی، كيمسه ايلك دفعه، ‌اله آلسا اونو اوخوياركن شاعيرين ايستی نفسين،‌ آيدين فيكرين، درين دويغولارين و اورك دويونتولرين گؤزل بير سويه‌ده حس ائده‌ر.

بو كيچيك حجملی مجموعه‌ده بؤيوك سؤز قدرتی و توكنمز ايلهاما باغلي اولان شاعير اؤز بؤيوك فيكرلرين و قوتسال هدف‌لرين گؤسترميشدير. كتاب دوكتور «صديق»‌ين مقدمه‌سيله باشلانير، ‌دوكتور صديق بير مفكوره‌لی عاليم‌كيمی بو كيتابی تانيتديرير، ‌آمما بيز بوردا بير آيري زاويه‌ده‌ن بو مجموعه‌يه باخماق ايستريك.

بو مجموعه‌نين شعرلرين بيز ايكی يئره‌ بؤله بيله‌ريك:

(كلاسيك شعرلر و سربست شعرلر)

اوستاد بابايي كلاسيك شعرلرينده، گئچميشده يارانميش اثرلره اعتناسيز دئييل. شاه اسماعيل (عنقا شعري)، علي آقا واحد (آخشاملار شعري) ميرزا علي اكبر شبستری(ديوان تبالار شعري) هابئله سحر خانيمين ايزين بيز (دانشيق) شعرينده آيدين جاسينا دويا بيله‌ريك.

اوستاد بابايي اؤزو دئميشكن دريالارين مدّيني ايچيب نشئه‌لرين حدّيني آشيب و آواره‌لرين ردّيني توتاراق اندازه‌لرين سديني سينديرماق،‌ ايستين بير شاعيردی. شاعيرين «تاريخ پوئماسيندا» يئرله‌شن شعرلري تقليدي شعر و تكجه دوزولموش سؤزلر دئييل، بلكه يئني بير مضمونا باغليدير بو شعرلرده شاعيرين درين محبتي ائلينه، ديلينه، ائلينين عنعنه‌لرينه، ‌پارلاق كئچميشينه و آيدين گله‌جگينه بير باجاريقلي هنرمندين اليله و بير ماهر رسامين فسونكار تابلولاريله گؤز اؤنونده جانلانيز و او خوجونو اؤزونه مفتون و وورغون ائدير:

"بير تحفه سازيم وار، سسي زيردن بَمَه غمدير

شنليك هاواسين چالماغا شايد سيمی كم‌دير

سويله‌ردی آتام: قالدی بابامين باباسيندان

دينديرمه كؤكون! هر سيمي بير نَسله حَكمدير

گاهدان ساليرام چينيمه بندين، چاليرام‌دا

هر سيم سئچيره‌م نغمه‌سی ماتمله ستم‌دير"

قئيد ائتمه‌لی‌ييك اينديسه شعر هر فورمادا يازيليرسا،‌ شعر اولسا شعردير، اولماسا يوخ. وزن و قافيه هئچ واخ شعر ياراتماييب و چوخ سربست شعرلرده شعر دئمك اولماز. بيرده شعر ايله شعار آراسيندا چوخ فرق‌وار اگر هر موزون يا غير موزون سؤزه شعر دئسك پس شعار نه دئمك دير؟ بو اساسدا اوستاد بابائي «تنقيذی» بير غزلده (شاعيرنما) اينديكی چوخلو شاعيرلر ديوانين «يولچولوق تورباسی»، «مضمون ديلنچيسی» آدلانديرير.

بو ساتريك شعرده مصراعلاردا اولان ريتم و آهنگ عروضون اويناق بحرلرينده‌ن سئچيليب همده گوجلو شعر صنعتلريله و آخيجي بير ديليله ياناشي‌دير:

"هر مقدس كلمه از بس ياوه‌دن تكرار اولور

مطلبين يازماقدا شاعير كلمه‌دن بيزار اولور

عشق اولوب ساققيز مگر؟ مردار آغيزدا چئينه‌نير؟

كلمه‌ی عرفاندا دولموش معده‌دن نشخوار اولور

عشقه لايق مدعي شعر ايچره تك مجنون دئييل

گونده‌ مين يالتاق‌دورور مجنونه دعوی دار اولور"

آمما سربست شعرلر ايچره بير گؤركملی شعر (قاييقچی) گؤزه چارپير. بو شعرده شاعيرين اينجه دويغوسو و آزادليق آختاريش و يئني‌ليك سئومه‌سي گؤرونور. دئمك قاييقچي شعري اوخوجوسونو فيكره آپاران و اونون بئينيني ايشه سالان و اوخوجويا فيكير و ايده وئره‌ن بير شعر دير. خطر آرديندا دنيز سئيرائده‌ن شاعير بو شعرده موسيقي باخيميندان‌دا اعجاز ياراديب دير. اينديسه بير ليكده بو شعري اوخوياراق گؤركملي شاعيره آرتيق نائليتلر و يوكسك باشلاريلار آرزيليريق:

«قایيقچی»

گوجه نيرديم كي چكم قاييقي يئردن دنيزه

سويئتيش ميشدی ديزه

گؤرونور دريادا طوفان اولا جاقدير! – دئديلر

گوجه‌لنديم داها من! قاييقی سالديم سويادا

مينيره‌م قاييقادا

گئده دريا يولو يوللاردان اوزاق‌دير- دئديلر

بئله گونلرده دنيز گزمه قاچاقدير-دئديلر

آمما من باخماياراق قاييغي مينديم! گئديره‌م

خطر آرديندا دنيز سئيرائديره‌م

دئديلر: گيردابی گئچمكده باجارماز! باتاجاق

دالغا يوكسلسه غافيلدان!، آشاجاق

آمما من خوشلاميرام!، بيرجه قولاق وئرمه‌ني‌ده

آچيرام يئلكني‌ده

گئديره‌م‌ها! ... گئديره‌م ....