کؤچورن: فرخ جرایدی

سۆفره باشیْندا ائشیتدیگیمیز یئنی خبر مندن آرتیْق میس هاننا-نین اۆره‌گین اۆزدو.

خان-ین قوُللوقچولاری استیلا اوْردوسونون باشچی‌سی، ژنرال سنارسکی نین یازیب وئردیگی بوُیوروقلارین بیر اۆزون گتیردیلر. اوْرادا :
"" تبریز و تبریز یوْلو اۆزه‌رینده اوْلان آزربایجان شَهرلری ساواش دُروموندادیر . بوُرالاردا اوْلان ملّتین آدینی یازماق و ساییلارینی توُتماق اۆچون بۆتون یوْلجولوقلار هله‌‌لیک دایانیْلمالیدیر. اؤزل بوُیوروق گلینجه‌یه قدر تبریزه و باشقا شهرلره هئچ کس بوُراخیلمایاجاق .
آزربایجان دؤیوشن اوْردوسونون باشچی‌سی سنارسکی ۱۴ اییول ۱۹۰۹.

بوُ یاخشی خبر دئییلدی. ملّتین آدینی یازماقدان تزار ژاندارمالیغی‌نین باشقا آماجی وار ایدی. انقلابا قاتیْلان و تزار سیاستینه قارشی ایشله‌ینلرین آدی سنارسکی‌نین الینده ایدی . اهالی‌نین آدیْن یازماق بهانه‌سیله، سنارسکی لیست‌ده اوْلانلارین هامیسینی الده ائتمه‌گه چالیْشیردی. بیزه گلدیکده ایکی چاره‌میز وار ایدی : یا ایران جوُلفاسیندا ایستی‌ده، توْزدا قاپانیب قالماق ، یا دا روُسیه ساحلینه قاییتماق . من روُسیه ساحلینه قاییتماق فکرینده دئییلدیم، چۆنکو پاسپورت ایشینده یئنی انگل دوْغا بیلردی. قیْزین سوْرونو دا چتینله‌شیردی.

من بوُ قوْنو دا دۆشونمه‌گی سوْنرایا قوْیماق اؤنه‌ریسینی وئرمه‌سمده، آمریکالی قیز سس‌سیز قالمایاراق :

- من باش‌سیز آوارا قالدیْم، محو اوْلاجاغام. دئیه آغلاماق ایسته‌ییردی.

- سیز باش‌سیز و یاردیْم‌سیز دئییل‌سیز. من سیزین راحاتلیغینیز اۆچون هر ایش گؤره بیله‌رم. دئیه قیْزا توْختاقلیق وئردیم.

قیْز قوُرتولوش ایسته‌ین گؤزلری ایله منه باخیْردی.

علی اکبر یوْلداش:

- قوْرخمایین خانیْم، کندیمیز یاخیْن دیر. یاخشی اوْتاقلاریمیز، تمیز هاوامیز و راحت اوْلماق اۆچونده امکانیمیز واردیر.》 دئیه اوْنو اوْووُندوردو.

قیْز ایسه سس‌سیز اوْلماق ایسته‌میردی:

- قوُرول ( هیات) اۆیه‌لری تبریزده، من ایسه بوُرادا قالدیم. اوْنلارین نه دَردینه‌دیر، اَللرینده پارا وار، کوْنسول خانادان دا هَر یاردیْم آلا بیلرلر. منیم ایشیم ایسه اوْف، آرادان گئتمه‌لییم. پوُلوم بیتیر، اؤزومده چؤللرده قالاجاغام، نئجه اوْلسون؟ نه ائدیم؟ 》دئیه قیْز یوْل چکن گؤزلری‌له الینده کی چنگال-پیچاغا باخیْردی.

- بوُ سؤزلرین هامیسی گرکسیز دیر. بیرینجی‌سی بوُ اوْلای بیزدن آسیلی دئییل دیر، تزار اوْردوسونون اَله کئچیردیگی ائتگی‌سیدیر.

ایکینجی‌سی ایسه پارا قوْنوسوندا هئچده دۆشونمه‌مه‌لی‌سینیز، وارلی بیر تاجر اوْلماسامدا گۆجلو و کئچرلییم. اوْ کئچرلی‌لیک سیزی و ائله‌ده منیم اؤزومو ایللرجه یاشادا بیلر. بیز هارادا اوْلورسا-اوْلسون تانیْشلاریمیزین، یوْلداشلاریمیزین سایقیلی قوْناغی کیمی یاشایاجاغیق، اۆچونجو ایسه سیزی آیلارجا یانیْمیزدا ساخلاماغا یئترینجه پارا واردیر، اؤز پارنیزلادا یاشایا بیلرسیز. تمامیله دینج‌لیکده و گۆونده سینیز.

منیم بوُ ایناندیریجی و اۆرک وئرن سؤزلریم هاننا دا درین ائتگی بوُراخدی، اوْنون توُتولموش اۆزو آچیْلماغا باشلادی.