ارمنستانین باش ناظری نیکول پاشینیان "ترامپ مارشروتو"نون ایشه دوشمه‌سیندن اول آذربایجانلا الکتریک اؤتوروجو خطلرینین و گاز کمرینین تیکینتی‌سینی رئاللاشدیرماق ایسته‌ییر. بو، آذربایجانین ماراقلارینا اویغون‌دورمو؟

Axar.az خبر وئریر کی، بو باره‌ده پولیتولوگ ائلخان شاهین‌اوغلو قید ائدیب.

"البته، ارمنستان اقتصادی باخیمدان نه قدر آذربایجان و تورکییه‌دن آسیلی وضعیته دوشرسه، بو، اؤلکه‌میز و بؤلگه‌میز اوچون فایدالی اولار. بو معنادا آذربایجان گله‌جک‌ده ارمنستانا گاز ساتا بیلر. آنجاق بونون رئاللاشماسی اوچون ایکی اؤلکه آراسیندا صلح سازیشی امضالانمالیدیر. اگر پاشینیان الکتریک و گاز نقلینی ائرکن رئاللاشدیرماق ایسته‌ییرسه، پارلامئنت سئچکیلرینی ائرکن تاریخه تعیین ائتمه‌لی و رفراندوم کئچیره‌رک کونستیتوسییانی دییشدیرمه‌لی‌دیر. بو حالدا گلن ایل دهلیزین تیکینتیسی ایله یاناشی گاز خطینین برپاسینین دا شاهدی اولا بیلریک»، - پولیتولوگ بیلدیریب.

او وورغولاییب کی، پاشینیان دهلیز مسئله‌سینی بوتؤولوکله آمریکایآ یوکله‌ییب:

"پاشینیان "ترامپ مارشروتو"نون اوزون‌مدتلی اجاره‌یه وئریلمه‌سی ایله باغلی ایکی واریانتدان بیرینی سئچه‌جک، یا ۴۹ ایللیک، یا دا ۹۹ ایللیک مقاویله‌لر امضالاناجاق. هر ایکی واریانت دهلیزه آمریکانین نظارتینی نظرده توتور. آمریکا دهلیز اوچون گرکلی اولان مالییه‌نین بیر حیصه‌سینی آییریب. بونا باخمایاراق، پاشینیان تیکینتینین ۲۰۲۶-جی ایلین ایکینجی یاریسیندا باشلایاجاغینا امید ائدیر. تیکینتینین هانسی تاریخ‌ده باشلایاجاغی و سرعتی واشینگتونون آتاجاغی آددیملاردان آسیلی اولاجاق".