کؤچورن: فرخ جرایدی

" لیوارجان یایلاسیْنا دوْغرو "

جوُلفا اوْلدوقجا ایستی ایدی. یاشاماق، نَفس چکمک ممکن دئییلدی. اؤزل‌لیکله بئله بیر هاوا دوُرومونا آلیْشقان اوْلمایانلارا بوُرا جهنّم قدر دؤزولمز گلیردی. ایستی دن آرتیْق هاوانین پوْزغونلوغو و توْز انسانی سینسیدیردی. مینلرجه فایتوْن و آرابا کاروانلارینین یئرلشدیگی بوُ آل-وئر بؤلگه‌سی کۆلکلی گۆنلرده توْز بوُلودلارینا چوُلغالانیردی.

خانلا دانیْشیب قوْی-گؤتور ائتدیک، یوْل آچیْلانجایا کیمی لیوارجان یایلاسینا کؤچمه‌گی قَرارا آلدیق. بوُرا داغلیق، باغچالیق بیر یئردیر. سَرین سوُلاری، گؤزل تیکینتی‌لری اوْلان کیچیک بیر شَهَردیر. منیم جوُلفادا قالماغیـْم دا قوْرخولو ایدی. من لیوارجان یایلاسیْنا گئتمک قَرارینا گلدیگیمی میس هاننا-یا سؤیله‌دیم. اوْ:

- من اوْرادا سیزسیز قالا بیلمه‌رم.

- منده سیزینله بیرگه گئده‌جه‌یم،

خان-ین عایله‌سی و علی اکبر یوْلداش دا اوْرادا قالاجاقدیر. ساغلام یاشایاراق راضی قالاجاغیْنیزا سؤز وئریرم. دئیه دۆشونجه‌لریمی قیْزا داها گئنیش آنلاتدیم. قیْزین تیترک و ماوی گؤز بَبَکلریندن بیر داملا یاش دۆشه‌رک، آبی ایپک دوْنونون اَتکلرینده پارچالاندی :

- سیزه اینانیرام. ایراده‌لی آدامسینیز. اؤزونوزدن ده آرتیْق منی دۆشوندوگونوزو بیلیرم. لاکن منیم اؤز حقیمده گؤسته‌ریلن سایقینی یاخشی قارشیْلامادیغیم اۆچون اوُتانیرام، چۆنکو بوُ یاخشیلیغین قارشیلیغین گله‌جکده ده وئره بیلمه‌یه‌جه‌گم. آنجاق منیم دۆز بیر دۆشونجه‌م وارسا، اوْدا منیم سیزینله داییمی تانیْشلیق ائتمک دیله‌گیمدیر.

قیْز بوُنو دئدیکدن سوْنرا منیم اَللریمی سیْخدی، اوْنون قیْزغین اَللری منه دیلله سؤیله‌نیلمه‌ین بیر چوْخ سؤزلر اوْخودو.

من، میس هانن-نین بوُ گئدیشدن راضی قالدیْغینی، لیوارجان یایلاسیْنا کؤچمک ایسته‌دیگینی خان-ا و اوْنون خانیْمینا خبر وئردیکده، اوْنلاردا سئویندیلر. باشقا حاضرلیق لازم دئییل دی. خانین بیر فایتوْنو واردی، ایکی فایتوْن دا توُتمالی ایدیک. فایتوْن اۆچون کاروانسارایا گیردیکده، حِجاز هاواسیْندا اوُجادان قُران اوْخویان بیر آدامیْن سسینی ائشیتدیم، شاشیْردیم. آتلارین کیشنمه‌سی، ائششکلرین آنقیْرماسی، آراباچیْلار و فایتوْنچولارین سسلری بیر-بیرینه قاریْشدیغی بیر یئرده قُران اوْخویانین کیم اوْلدوغونو بیلمک اۆچون یاخیْنلاشدیقدا دۆنن روُس سالداتیْنی دؤیدوگو حاج سلمان-ی گؤردوم. دۆنن بوُ حاجی‌نین باشیْنا گَلن احوالاتی خان-ا سؤیله‌دیم. اوْ گۆله‌رک دئدی:

- بوُ حاجی سلمان جوُلفانین یاخیْنلیغیندا اوْلان ' داران ' کندیندن دیر. اؤزوده تزار جاسوسودور. علمدار شَهَری‌نین تزار تبعه‌سی اوْلان مۆلکه‌دار لار طرفیندن اَله کئچیریلمه‌سینه یاردیْمجی اوْلان بوُ ملعون دور. هر نمازدان سوْنرا بیر جزء قُران اوْخومالی و اهالی‌نین باشیْنی آغریْتمالی دیر. مؤمن و مسلمان تزار جاسوس لارینا هر آددیم باشیْنا توُش گله بیلرسن. ایندی باشلاریْندا کاسکت بؤرکو، اگنینده کُت و یاخالیق گؤردوگون بوُ آداملارین هامیسی اییرمی گۆن اؤنجه عَبا و دوْن گئیَـن ساققالیْنا خیْنا ( حَنا ) یاخان، بارماغیْندا عقیق اۆزوک، تسبیح اوْلان تاجرلر دیر. بیر نئچه گۆندن سوْنرا انگلیس‌لر گلسه، باشلاریْنا انگلیس لَبه‌داری قوْیوب آغیْزلارینا پیپ آلماغا حاضردیلار.

- یالتاق ، میمون کیمی تقلیدچی بیر خالق‌دیرلار. تقلیدی بوُنلارا اؤز دین اؤنجۆل‌لری اؤیرتمیش.

فایتوْنلاری دانیْشدیق. گۆنش قالخمامیش هاوا قیْزمامیش جوُلفادان چیْخمالی ایدیک.