کؤچورن: فرخ جرایدی

فایتوْنلارین بیرینه خانلا قادیْنی، اوْ بیرینه اوُشاقلاری ایله قوُللوقچوسو، اۆچونجونه ایسه من له میس هاننا اوْتوروب یوْلا دۆشدوک. علی اکبر یوْلداش سحر تئزدن شجاع کندینه گئتمیشدی، کند یوْلوموزون اۆستونده اوْلدوغوندان گۆن اوْرتا علی اکبر یوْلداشا قوْناق اوْلمالی ایدیک.

بیزیم فایتوْنوموز قاباقدا گئدیردی. قیْز اینجه اللرینه باخاراق:

- بلکه من سیزه راست گلمه‌یه‌ ایدیم، اوْندا نئجه اوْلاجاقدیر؟ هئچ دۆشونه بیلمیرم؛ من ایرانا گلمه‌گی بوُ قدر چتین بیلمزدیم.

- هر کَسه تۆش گلسه ایدیز، مَدنی بیر قیْزا قارشی سایقیدان باشقا بیر حرکت گؤرمزدینیز.

- دوْغرودور ائله آدام تاپیْلاردی لاکن اوْ سیزین کیمی اوْلمازدی.

- نه اۆچون اوْلمازدی ؟

- چۆنکو سیز باشقا ، باشقاسی ایسه باشقا دیر. سیزی هامی سئویر، سایقی بسلیر، من بیرینجی گۆندن بوُنا ایناندیم، بوُنون اۆچونده سیزه سایقی بسله‌ییرم. من بوُ سایقینی ایندییه قدر هئچ کَسه ائتمه‌میشدیم، گله‌جکده ده ائتمه‌یه‌جه‌گیمه آند ایچه‌رم. تاسوف اوْلسون کی من دوْغولو ( شرقلی)، سیز ایسه آمریکالی دئییل‌سینیز. قیْز بوُ سؤزلری دئیه‌رک یئنه ده دۆشونمه‌گه باشلادی.

- تاسوفه لزوم یوْخدور، ایندی هر ایکیمیز دوْغولو ساییلیریق .دئیه گۆلدوم .

اوْ اوُتاناراق:

- منجه یاشیْمیزدا دا فرق آزدی. دئیه آرتیردی.

- بلی بوُرادا دا ائله آرامیْز یوْخدور, - دئیه فکره گئتدیم.

من بوُ یوْللاری بیر نئچه آی اؤنجه نینا ایله گئتمیشدیم. ایندی اوْ نه دوُرومدا ایدی، نئجه یاشاییردی ؟ گؤره‌سن باشیْنا بیر ایش گلمه‌میشدی؟ اوْنا ییر اۆزونتولو اوْلای اۆز وئرمیش اوْلسا، اوْنون نه‌دنی من اؤزومم. داها سوْنرا منه باغلانماق ایسته‌ین آمریکالی قیز حقینده دۆشونوردوم. بوُنون بوُ گۆنه دۆشمه‌سینه و یوْللاردا قالماسینا نه‌دن یئنه من ایدیم. بوُ قیْزدان تبریزده دالداسیْندا اوْلماق ایسته‌دیگیم آماج اۆچون ایشلتمک خیالیندا اوْلماسایدیم، بوُنو جوُلفادا ایکی گۆن لنگیتمه‌سه‌یدیم، ایندی بوُ قیْز اوُزون یوْللارین آغریسیندان اوُزاقدا، تبریزده اوْلاردی.

میس هاننا منیم دَرین دۆشونجه‌یه دالدیْغیمدان شبهه‌لندی و منه دؤنوب:

- سیز منیم سؤزومدن اینجیدینیزمی؟ دئدی.

- هانسی سؤزونوزدن ؟

- بلکه ده اؤزوم بیلمه‌دن، سیزی اۆزه‌جک اوْلان بیر سؤز دئدیم؟

- خیر، سیزدن یاخشی‌لیقدان باشقا بیر شئی گؤرمه‌میشم، اوْنلار نرمال دانیْشیقلاردی.

- یوْخ، دانیْشمالاریمیزدا نرماللیق یوْخدور. بوُ سؤزلر منیم قلبیمدن، قانیْمدان چیْخان سؤزلردیر. بوُ سؤزلرین خاطره‌سی، منده اۆزۆک قاشیْندا یازیلان و سیلینمه‌سی ممکن اوْلمایان یازی قدر دوام ائده‌جکدیر. حیف کی سیز آمریکالی دئییل سینیز. دئیه یئنه قیْز تکرار ائتدی.