کؤچورن: فرخ جرایدی

فایتون اونون وجودونا حرکت وئردیکجه او باشینی منیم چیگنیمه قویوردو. بعضاً قالدیرماق ایسته‌میردی.

من قیزین شبهه‌لرینی داغیتماغا چالیشمالی ایدیم. آرامیزداکی صمیمی علاقه‌نی ساخلاماق اۆچون آسان بیر یول آرامالی ایدیم.

" عزیز و گؤزل دوستوم "دئیه میس هاننانین اللرینی توتدوم. " سیز ناحق یئره منیم، سیزین سئوگینیزه قارشی لاقید اولدوغومو دۆشونورسونوز. انسان مختلف اولدوغو کیمی اونلارین سئوگی قابلیت‌لری ده باشقا-باشقا دیر. انسانلارین بیر سیراسی چوخ تئز سئوه بیلر، لاکن بو سئوگی تئز باشلادیغی کیمی تئزده سؤنر. باشقا بیریسی چوخ گئج و تاخیرله سئودیگی کیمی، او سئوگینی یاشادار. بلکه اؤزو ایله برابر قبره‌ ده آپارا بیلر. دوغولو سئوگیسی باشقا، آوروپالی سئوگیسی باشقا، آمریکالی سئوگیسی ده بیر باشقادیر، بونلارین هامیسی سئوگیدیر، لاکن ماهیّت‌لری و کیفیت‌لری بیر دئییلدیر. من یالنیز سئوگیلی قوُرو بیر حرمت‌له تامین ائتمک اۆچون یوخ، حتی باشقا گنجلرده گؤره بیلمه‌یه‌جه‌گینیز بیر اۆرکله سئومک اۆچون یارانمیشام.

چۆنکو من، قادین دیله‌گی‌نین اساسینی تشکیل ائدن عنصرلری یوخلاییرکن باشلیجا اولاراق سئوگینی سئچه بیلمیشم. قادینین آنجاق سئوگیسینه قارشی صمیمی بیر سئوگی قویولماقلا اساس عَمللری تامین ائدیلمیش اولور. "-من میس هاننانین الینی سیخیب: " عفو ائدین، گؤزل خانیم، بو سؤزلری حقیمده‌کی فکرلرینیزی باطل ائتمک اۆچون دئییل، اؤز اؤزل فکریمی سیزه بیلدیرمک اۆچون باشینیزی آغریدیرام. "

" رجا ائدیرم دانیشین، سؤزلرینیز ماراقلی دیر "دئیه میس هاننا منی دانیشماغا آلقیشلایاراق جوابلادی.
" بیزیم تانیشلیغیمیزین تاریخی او قدر اوُزون دئییلدیر، بو تانیشلیق او قدر یاخین دیر کی، اونون گۆنلرینی، ساعت‌لرینی بئله سایماق اولار. بیز بیر-بیریمیزی اؤیره‌نه‌رک، دۆشونه‌رک سئومیش اولورساق، سئوگیمیز تدریجی اولاراق انکشاف ائتمیش اولورسا، ایلیشگیمیز داها دا مُحکم اولار. من لاقید دئییلم. من بیر قدر متواضع آدامام، گئج جواب وئرمه‌گیمین سببی ده یالنیز بودور. لاکن سیزه اولان سئوگیمین داها یۆکسک بیر سَوییه‌یه قالخماسینا چالیشیرام. بو سئوگی داها محکم و داها عظمت‌لی اولاجاقدیر. "
بو سؤزلریمدن سونرا اونون بۆتون وجودو تیتره‌دی، الی الیمده، باشی چیگنیمده اولاراق آغلادی. من اونون ساچلارینی اوخشایاراق:

" آغلاماغا لزوم یوخدور، هر شئی وقتینده لازم دیر. " دئدیم.
قیز الیمدن توتاراق ایکی بارماغیمی قولاقلارینا آپاریب دئدی:
" بونلاری، بو قیمتلی سیرغالاری علی اکبر یولداش منه گتیردی، بونلاری منیم اۆچون آلدیغینیزی سؤیله‌دی. "-او برلیانت سیرغالاری گؤسته‌ریب بارماقلاریمی ساری تئللری ایله اؤرتولموش قولاقلارینا باساراق ساخلادی.
قیزین کئفی کؤکله‌نه‌رک سفر خاطره‌لریندن و لیوارجان یایلاسی گئجه‌لریندن دانیشماغا باشلادی.

شهردن قیراغا چیخمیشدیق. فایتون ایده آغاجلاری‌نین کؤلگه‌سیله گئدیردی. من دۆشونوردوم، اۆزونه آغ توْز قوْنموش ایده یارپاقلاری دا سانکی دۆشونمکده ایدیلر.
سئرچه‌لر ایستی‌نین شدّتیندن بوداقلارین کؤلگه‌سینه چکیلمیش، دوُمانلی تبریزین اجتماعی و سیاسی حیاتی کیمی مۆرگوله‌ییردیلر. اَیری-اۆیرو یوللار تبریز خلقی‌نین عقیده‌سی کیمی دولاشیق ایدی.