آذربایجان میللی علملر آکادمییاسینین ناخچیوان بؤلمه‌سینین اینجه صنعت، دیل و ادبیات اینستیتوتونون موسیقی و تئاتر شعبه‌سینین مدیری، صنعتشوناس‌لیق اوزره فلسفه دوکتورو، دوسئنت علی قهرمانووون «تبریز تئاتری و بؤیوکخان ناخچیوانسکی» آدلی مونوگرافییاسی ایشیق اوزو گؤروب.

آخار. آذخبر وئریر کی، مونوگرافییادا تبریز تئاتری حاقین‌دا آشکارا چیخاریلان یئنی تاریخی فاکتلار تدقیقاتا جلب ائدیلیب، بو مدنیت اوجاغینین گؤرکه‌م‌لی آکتیور و رئژیسورلاری باره‌ده معلومات وئریلیب، تبریزده تئاتر دسته‌لرینین یارانماسی و فعالیتین‌دن بحث اولونوب.

کیتاب‌دا قید ائدیلیر کی، خالقین مدنی اینتیباهی، میللی اویانیشی و معاریفچی‌لیک دوشونجه‌سینه بؤیوک تأثیر گؤستره‌ن ناخچیوان تئاترینین اینکیشافین‌دا تانینمیش مدنیت خادیمی، تئاتر فدایسی بؤیوکخان ناخچیوانسکینین ده مهم خیدمتلری اولوب.

یئنی نشرده بؤیوکخان ناخچیوانسکینین کئشمکئش‌لی عؤمور و صنعت یولونا نظر سالینیب، اونون تبریز تئاترینین اینکیشافین‌داکی ثمره‌لی فعالیتی ایشیقلاندیریلیب. صنعتکارین قورولوش وئردیی تاماشالارین و اوینادیغی اوبرازلارین اساس مقصد و قایه‌سینین معاریف‌چی‌لیک ایدئیالارینین خالق آراسین‌دا تبلیغ اولوندوغو گؤستریلیب.

قدیم ناخچیوانین تئاتر صنعتکارلارینین عصریمیزین اوللرین‌ده‌کی دؤورونو تدقیق ائد‌ن مؤلف مونوگرافییادا او دؤور تئاترینا عایید تبریز آرخیولری، تیفلیس تئاتری سندلری و ناخچیوان دیارینین قدیم تئاتر تاریخینی عکس ائتدیره‌ن منبع و آرخیو ماتئریاللارینی اوزه چیخاریب.

قید ائدک کی، یئنی نشرده همین دؤوره عایید ایلک دفعه آشکار اولونموش نادیر فوتوشکیللر ده عکسینی تاپیب.