سورقو: هخامنش اوزره نه دئمک ایستردینیز؟

جاواب: بللی بیر سیاست اساس گؤتوروله رک تاریخ یونتامالار هر هانکی بیر دؤلتچیلیک مسئله لرینه آراچ و وسیله ساییلار. حاکیم دیل و مدنیتی یاخشی، مدنیتلی و محکوم اولموش توپلوملاری پیس و مدنیتسیز دئیه حاکیم قوروپا باشاریقلی تاریخ یونتامالار توپلومتانیما (جامعه شناسلیق) آلانیندا تانینمیش "بیزیم قوروپ و او بیری قوروپ" اساسیندا اورتایا قویولموش بللی بیر سیاسته خدمت ائدر دئیه قلمه آلینار. بو اساسدا دا یهودیلیکده مقدس مقام کیمی تانینمیش "خاخام" آدیندان یولا چیخیلاراق اویدورولموش فارس شاهلیق سیلسیله سی دئیه "خاخامنش/ هخامنش (خاخام طبع)" آنلاییشی دا اویدرولموش و عوامفریبلیک سیاستینه خدمت ائدن بیر آنلاییش ساییلار. توپلومتانیما (جامعه شناسلیق) بیلیمینده قوروپلار آراسیندا گلیشمکده اولان حرکت و دینامیسم نظره آلیناراق بئلنچی گؤتوروشمکلر (یاخشیلیغیی اؤز قوروپونا نسبت وئرمک و پیسلیگی باشقالارینا و دوشمن دئیه قلمه آلینانلارا نسبت وئرمکلر) دریندن اینجه لنمیش و آیدینلیغا قاویشدیریلمیش. فارس تاریخینی نظره آلدیقدا هخامنش آنلاییشی فارسلیق تاریخی ایله اوست اوسته دوشمز. فارس دیلی تورک اصیللی اولان غزنویلر واسیطه سی ایله سامانیلردن دیوانچیلیق اوچون تحویل آلینمیش و سلجوق شاهلاری واسیطه سی ایله بوگونکو ایران ممالیکی محروسه سینه گتیریلمیش دیل و مدنیت ساییلار.