کولت. آذ آذربایجانین گؤرکه‌م‌لی یازی‌چی‌سی فرمان کریمزادنین " تبریز ناموسو" آدلی تاریخی رومانینی تقدیم ائدیر:

اولی بورادا

کؤچور‌ن آینوره مممدووا

او اوز اولوسونا تله سیردی. اوزو هله یولدا اولسادا، یقین کی، غلبه خبری آرنیق اولوسا یئتیشیب. اوردا ایندی شنلیکدیر. داها ائله بیر قدرتلی دشمنلری قالماییب. ایندی قونشو طایفالار اونو تبریکه گله جکلر. او ایسه خراجین مبلغینی بیر قدر ده آرتیراجاق. اوزو ده بیلیر نییه آرتیراجاق. اگر او تایفالارین آداملاری بیر قارین یئمکدن آرتیق قازانج گوتورسه لر، آرخا گونه بیر شئی آتسالار، اونون هامیسینی بیر یئره ییغیب، نورون اولوسونو ضعیفلتمک اوچون خرجله یرلر. چوخلو سیلاح آلیب ییغارلار. اونسوز دا اونلارین هامیسی نورون اولوسونون ایگیدلرینی پارچالاماق اوچون استفاده ائدیله جک. اودور کی، قوی نورونلولارین دشمنلری دیلنچی کوکونده یاشاسینلار. بیر اوینه یئمک تاپاندا تانرییا دعا اوخوسونلار. توخلوغا گوره یوخ، آجیندان اولمه دیکلرینه گوره سئوینسینلر. خراجی مال لا، پوللا اوده یه بیلمه ینده تورپاقلا اوده سینلر. اونلارا مخصوص اوتاقلار نورون اولوسونون اولسون. تالانیب گتیریلن، ایندی تانرینین اونلارا باغیشلادیغی سورولر و ایلخیلار او تورپاقلاردا اوتلاسین. وئرمزلر؟ قوی وئرمه سینلر، زورلا آلماق اوچون هر جور امکان وار. تورپاق وئرمزلر، عوضینده ایگیدلرینی اسیر آلارلار، یعنی محو ائله یرلر، قیزلارینی، آروادلارینی، اوزلرینی غول ائدرلر، تورپاغین هامیسی اولار نورونلولارین...
بو دونیا گوج اوستونده قورولوب،- باهادیر دوشونوردو. گوجون وار، آغالیق ائله، یاشا. گوجون یوخدور، نوکر اول، باش ای، آچیق بوینون قیلینجی آلتیندا قالسین. " او طایفالارین هامیسینین باشچیلاری منیم اوزومه گولور، اما گوجسوز اولسام، اوزومه توپوررلر. گوجسوزلوکدن گولورلر، عاجزلیکدن هیریلداییرلار. دوزدور، منیم سفرلریمده اشتراک ائدیرلر، اما غنیمتدن اونلارا وئریلن پای ایت قاباغینا آتیلان یال کیمی اوجوز اولمالییدی. یئسینلر، قویروق بولاسینلار، چوخ یئییب، صاحبلرینی قاپماسینلار. من اونلاری اوکوز کیمی بویوندوروقدا ساخلاماسام، اوندا او آرابانی کیم چکه جک؟ عومروموز او قدر ده اوزون دئییل، منیم اوغلوم بویویوب، عرصه یه گلمه میش باش قالدیرسالار، وای بیزیم حالیمیزا."

هامی کیمی او دا همیشه "اوغلوم، اوغلوم" دئییردی. اما اوغلو یوخ ایدی. آروادی اولون اکه حامیله یدی. اوندان اوغول گوزله ییردی. اوغلو اولسا، بسیدیر. اوندا لاپ اوتکوخو دا ییخیب، چینه غالب گلر. دونیایا حکمدار اولار. آخی، اونون نسلی نوردان یارانیب، تانریلاردان دونیایا گلیب. تانری همیشه اونون مصلحتچیسیدیر. آخی، اونون دامارلاریندا تانری قانی آخیر. اونا گوره ده تورپاقدا اوندان بویویو، اوندان یوکسه یی یوخدور. اگر قیلینج چالیرسا، کسری تانرییا گوره اون قات آرتیر، اگر اوخ آرتیرسا، بوتون اوخلاردان اوزاغا گئدیررر. آخی، اوخ ایکی جوردو. قیسا اوخ، اوزون اوخ. اوزونو اوزاغا گئدیر، قیساسی ایسه یاخینا. اونون قیسا اوخو باشقا باهادیرلارین آتدیغی اوزون اوخلاری دا کئچیر.

"تانری منه یالنیز اوغول وئرمه لیدیر. تانری هم ده وئردییینه حامیلیک ائتمه لی، اونون باشی اوستوندهه دایانمالیدیر. تانرینین حاکمیتی بوتون گویلرده دیرسه، او گویلرین آلتینداکی تورپاقلارین حاکمیتی آنجاق داماریندا تانری قانی آخان اوغلونون الینده اولمالیییدیر. همین اوغول منیم اوغلومدور. بیلیرم، بو دفعه مطلق اوغلوم اولمالیدیر.

داوامی وار