تختی سلیمان غربی آذربایجان اوستانی اراضی‌سین‌ده یئرلشه‌ن میدییا-آتروپاتئنا دؤورونه عایید قازاکا شهری اراضی‌سین‌ده آرخئولوژی عابده‌دیر.

عابده اورمییا و همدان (قدیم اکباتان) آراسین‌دا، معاصر تکاب شهرینین یاخینلیغین‌دا یئرلشیر.

بو عابده‌یه سئمیتیک آد، آذربایجانین عربلر طرفین‌دن ایشغالین‌دان سونرا وئریلیب. تختی سلیمان اراضی‌سین‌ده یئرلشه‌ن «بؤیوک آلوو» و یا «حکمدار آلووو»نون قوروندوغو آزرگوشناسپ معبدی ساسانیلرین حاکمیتی دؤورونده شاهلارین تاختا چیخمازدان اول زیارت ائتدیکلری اساس مقدس معبد اولوب. آذرگوشناسپ مبدین‌ده‌کی آلوو، عینی زامان‌دا آدلاندیریلیب و دؤیوشچو طبقه‌سینه مخصوص حساب ائدیلیب.

عابده اراضی‌سین‌ده آپاریلان آرخئولوژی تدقیقاتلار یاشاییش مرکزی کیمی بو ارازینین میلاددان اول ۶-جی-۵-جی عصرلرده، میدییا دؤورون‌ده اساسینین قویولدوغونو، آتروپاتئنا-پارفییا دؤورون‌ده ایسه قالانین و شهرده‌کی بیر چوخ تیکی‌لیلرین اینشا ائدیلدیی اورتایا چیخاریب. شهر آتروپاتئنا دؤولتینین پایتختی اولوب.

تختی سلیمانین معمارلیق کومپوزیسییاسی و المنتلری سونراکی دؤورده تکجه آذربایجان معمارلیغینا دئییل، قونشو اراضیلرین ده معمارلیغینا تأثیر گؤسترمیش‌دیر.[۷] عابده کومپلئکسینین اساس حیصه‌سینی زردوشتی‌لیک معبدی، سارای کومپلکسینین قالیقلاری و قالا دیوارلاری تشکیل ائدیر. بو عابده آذربایجان‌دا ایکی مین ایلده‌ن آرتیق داوام ائتمیش سو و اود کولتونون ان بؤیوک ثبوتلارین‌دان بیریدیر.