آذربایجانین تاریخی ثروتلرین‌دن اولان همدانین میر فتاح بوز آنباری یوخ اولماق تهلوکه‌سی ایله قارشی-قارشییادیر.

مدنی میراث و تاریخ تشکیلاتی ۱۰ آی بون‌دان اؤنجه تیکیلینین تمیری اوچون سؤزو وئرسه ده، وعده‌لره عمل اولونماییب.

سون یاغان یاغیشلاردان سونرا بو تاریخی اثرین تاوانی چؤکوب و تامامن محو اولماق اوزره‌دیر. ملاییر شهرینین مدنی میراث و تاریخ تشکیلاتینین مدیری ایبراهیم جلیلی بودجه‌لرینین آزلیغین‌دان دانیشیب. او، بودجه‌لرینین ۷۰ فایز آزالماسینا دقت چکیب و بو حسابلا میر فتاه بوز آنبارینین تعمیری اوچون پول آیریلمادیغینی بیلدیریب.

جلیلی سون یاغیشلاردا ۵۰۰ میلیون تومن خسارت گؤره‌ن بوز آنبارینین تعمیرینین چتین اولمادیغینی بیلدیریب. بودجه وئریلدیی زامان تعمیرین اولا بیلجیینی آچیقلاییب.

قید ائدک کی، قاجار دؤنه‌میندن یادیگار قالان میر فتاخ بوز آنباری آجور جین‌سین‌دن اولان گونبزلی بینادیر و ملایر-بوروجرد جاده‌سینین ۲ کیلومترلیین‌ده یئرلشیر. بو بوز آنبارینین ایکی گیریش یئری وار. بیری دهلیز شکلین‌ده‌دیر و بوز تخلییه‌سی اوچون ایستیفاده اولونور. او بیری ایسه اینسانلارین گلیب-گئتمه‌سی اوچون ایستیفاده اولونور.