تبریزده چوخ گؤرمه‌لی یئرلر وار. اونلاردان بیری تبریزین بلدییه سارایید.

تبریزین بلدییه سارایی ۳۰.۵ متر هوندورلویه مالیک اولان دؤرد طرف‌لی ساعت قله‌سینه مالیک‌دیر. بو ساعت ۱۵ دقیقه‌دن بیر زنگ چالاراق اهالییه زامانین کئچمه‌سینی خاطیرلادیر.

بینانین فاسادی یونما داشلا اؤرتولوب. بینانین عمومی پلانی ایسه اوچماق‌دا اولان بیر قارتالی خاطیرلادیر بو دا ایکینجی دونیا محاربه‌سین‌دن اؤنجکی آلمانییا بینالارینا اویغون‌لوغو عکس ائتدیریر.

هم ده موزئی کیمی ایستیفاده اولونان بو بینانین جنوب طرفین‌ده گنیش و گؤزل ساحه یارادیلیب، بورادا موختلیف آغاجلار و گوللره راست گلمک اولار. اراضی ده تبریز شهرین‌ده ایستیفاده اولونان ایلک تاکسی و ایلک یانغین‌سؤندورمه ماشینی نوماییش ائتدیریلیر.
بو امارت ۱۳۸۶-جی هیجری شمسی ایلین‌ده ، ایرانین ایلک شهر بلدییه جمعیتینین تبریزده یارادیلماسینین ۱۰۰ ایللیی مناسیبتی ایله اؤلکه سوییه‌سین‌ده ایلک بلدییه موزئیینه چئوریلمیشدیر. حال حاضردا تبریز بلدییه‌سینین بعضی رسمی دیپلماتیک گؤروشلری ده بو بینادا تشکیل اولونور.

تبریز بلدییه موزئیینین زیرزه‌میسین‌ده ۸۰۰ کوادرات مترلیک ساحه ایران بلدییه‌لرینین تاریخینی عکس ائتدیره‌ن ایراندا یئگانه بلدییه سرگیسی اولاراق ایستیفاده‌یه وئریلمیش‌دیر و چین‌دن سونرا دونیا اوزره ایکینجی بلدییه موزئیی حساب اولونور.
۱۱۰ ایللیک کئچمیشی اولان سون درجه نفیس خالچالاری گؤرمک ایسته‌یه‌نلر موطلق تبریز بلدییه موزئیینین خالچا زالینا باش چکملیدیرلر.

تبریزین بلدییه موزئی سارایی شهرین مرکزین‌ده ساعت میدانین‌دا یئرلشیر. موزئی‌ده موختلیف زاللار مؤوجوددور بونلارا، قدیم فوتواپاراتلار، مقدس مدافعه، چاپ و نشریات، خالچا، معاصر صنعتلر، ختتات‌لیق، حیکمت و بیر نئچه باشقا زاللاری مثال گؤسترمک اولار.

اصیل و قدیم تبریز خالچاسی آختاریرسینیزسا موطلق تبریزین بلدییه موزئیینین خالچا زالینا باخیش کئچیرین. بورادا موختلیف نؤولو نفیس خالچالارا راست گلمک اولار. زال‌داکی ۱۲ ادد خالچا بینانین اینشا ائدیلدیی واخت‌دان ۱۳۲۰-جی هیجری شم‌سی ایلیندک ارفول-مولک جلیلینین امری ایله توخونان خالچالاردیر.

قدیم فوتواپاراتلار زالین‌دا قدیم نسیل فوتواپاراتلارین تاریخچه‌سی، اونلارین فورمالاشما و اینکیشافی پروسئ‌سینین شاهی‌دی اولماق اولار.

موزئی‌ده تبریز بلدییه‌سینه مخصوص اولان قدیم سندلر و اشیالار، خاریجی دیپلوماتلار و رس‌میلرین تقدیم ائتدیکلری هدییه‌لر، الیازما کیتابلار، صنعت اثرلری، بلدییه‌نین قدیم مالییه سندلری، تبریز بلدییه‌سینین ایدمان کلوبونون قازاندیغی مکافاتلار، چینی قابلار، تبریز باره‌ده یازیلان سیاهتنامه‌لر، شهرله علاقدار دیگر تجهیزاتلار و سندلر ساخلانیلیر.

موزئی‌ده تبریز شهرینین ایلک بلدییه صدری قاسیم خان والینین سلاحی، تبریزین یانغین مرکزینین ایلک یانغینسؤن‌دوره‌ن ماشینی، موختلیف دؤورلرده بلدییه‌ده ایستیفاده اولونان تجهیزاتلار، تبریزین قدیم بینالارینین فوتولاری، مشروته اینقیلابینین سرکرده‌لرینین فوتولاری، تبریزده ایلک کوچه‌نین چکیلمه‌سی و نفتله یانان کوچه چیراقلارینین قوراشدیریلماسینین شکیللری، بلدییه‌نین ایلک مکتوبلاشمالاری و دیگر اشیالار یئرلشیر.