ابولقازی باهادیر خان ۱۸-جی عصرده قله‌مه آلدیغی "شجرئیی-تراکیمه» ("تورکلرین شجره‌سی») اثرین‌ده گؤستریر کی، تورکلرین قدیم اجدادلاری دؤرد طرف‌دن داغلارلا احاطه اولونموش ارگنکون آدلی چوخ گؤزل بیر مکان‌دا مسکه‌ن سالیبلارمیش.

اونلار بورادا ۴۰۰ ایل یاشامیش، آنجاق زامان ایچین‌ده هم اؤزلری، هم ده قویون، آت و دوه سورولری او قدر آرتیب چوخالمیش‌دیر کی، مسکون اولدوقلاری یئر اونلارا دار گؤرونموش، اوت، سو سیخینتی‌سی چکمه‌یه باشلامیشلار. اطرافلارینی چئوره‌له‌یه‌ن سرت، سیلدیریم قایالی کئچیلمز ارگنکون داغلارینی هئچ بیر وجهله آشیب گئنیش‌لییه چیخا بیلمیرلرمیش. ارگنکون داغلاری بویابوی دمیریمیش. بیر گون داغین اتیینده قویون سوروسونو اوتاران چوبان بوز قوردون قویونون بیرینی قاپیب قاچدیغینی گؤرور. چوبان قوردون دالینجا یویوروب باخیر کی، قورد داغین آلتینا گیریب غیب اولور. یاخینلاشیب گؤرور کی، داغین آلتین‌دان او بیری اوزه دار بیر اویوق وار. قوردون بو اویوق‌دان کئچیب گئتدیینی یقینلشدیردیکدن سونرا گلیب احوالاتی ائلین باش‌چی‌سینا سؤیلییر. خاقان بیلیجیلری باشینا ییغیب همین یئره گلیر. داغین او بیری اوزونه کئچه‌ن دار اویوغو گؤردوکدن سونرا مصلحت-مشورت ائل‌ییب بو قرارا گلیرلر کی، دمیرچیلر اویوغون چئوره‌سین‌ده‌کی دمیری اریدیب بورادان آت-دوه کئچه بیله‌جک بیر یول آچسینلار. اوزون زحمت و اذیت‌دن سونرا بوز قوردون کئچیب گئتدیی همین اویوق اریدیله‌رک بؤیودولور، تورکلر ده وار-دؤولتلرینی گؤتوروب داغین او بیری اوزونه - اوتلو-سولو گئنیش دوزه‌ن‌لیکلره چیخا بیلیرلر. بوز قوردون یول گؤستریجیلیگی ایله دمیر داغلارین محاصره‌سیندن - سیخینتی‌دان چیخیشی یئنی گونون - یئنی حیاتین باشلانغیجی سایاراق عزیز توتان تورکلر هر ایل همین گون بؤیوک تونقال یاندیراراق اوجاقدا قیزدیردیقلاری دمیری زیندان اوستونده دؤیر و ارگنکون‌دان چیخیشی بایرام ائدردیلر.