تورکجه‌یه چئویردی: سوسن نواده‌رضی

نوحه‌خوان‌لارلا دسته‌باشی‌لار قاداغان ائله‌ییب دئمیشدیلر کی، حوسئن بیزوو-‌و شاخسئی دسته‌لرینه، سینه ووران و زنجیر وواران دسته‌لرینه قویماسینلار. چونکی هم اؤزو گولور هم ده اوشاق‌لاری گولدورور.

هر نه آند ایچیردی- قان قوسوردو کی، گولمور، آللاه اوزونو بو تهر یارادیب، هئچ‌کیماونون سوزونو سایمیردی. هئچ‌کیم اونا اینانمیردی. هله دفعه‌لرجه ائشیتمیشدی دالیسیجا بئله دئییرلر:

-ایتین توخومو نئجه ده بئیاردیر. هرزادا میرت ائلیر. بیر دقیقه دینج دورمور.

-دیلیغی لات گئده‌‌ عجب اوزلودور. ائله هیر هیر گولور. گؤر واری- زادی اولسایدی نئیله‌ردی؟!

-طیفیل گولمه‌سین به نئینه‌سین؟ نه آدامی وار قئیدینه قالسین نه ده ایش‌گوجو وار غوصصه- ‌زاد ائله‌سین.
-خوش حالینا، نه بیر شئیی وار نه ده غم- غوصصه‌سی!

-یاخشی اوغلان‌دیر. ایشلک‌دیر. یورغونلوق نه‌دیر، بیلمز.

-چوخ دا صمیمی، صاف اورکلی اوغلان دیر.

جماعت دوغرو دئییردیلر. اونون هئچ‌نه‌یی یوخ ایدی. درد-ی غمی ده یوخ ایدی. گوزلرینده همیشه بیر ایشیلتی دالداناردی. سئوینج‌له سایمازلیق ایشیلتیسی ایدی. آتا، آنا، اوزاق- یاخین قوهوم اقریبادان یالنیز و یالنیزجا بیر نفرین اوزونو- تهرینی خاطیرلاییردی، او دا ایل‌لر اؤنجه خسته‌له‌نیب اؤلن اؤگئی ننه‌سی، "سریه‌ ننه" ایدی. او اؤلدوکدن سونرا، حوسئن ده "چوخورلار" محلله‌سینده‌کی او شئه زئرزمی‌دن چول- پالازینی ییغیشدیریب، "تورپ‌لار" محلله‌سینده اولان خرابه‌لیق کروانسارایا داشیندی. بو کروانسارایین یاشلی گؤزه‌تچی‌سی- قیرخ ایل گئجه‌لری کروانسارادا سحرله‌دیی اوچون- قالان عؤمرونو آرواد- اوشاغی‌نین یانیندا قالماق ایسته‌ییردی. بو اوزدن ده حوسئندن ایسته‌دی کی،گئجه‌لری هم اوردا یاتسین هم ده گؤزه‌تچی‌لیک ائله‌سین.

آت، ائششک و فایتون کروان‌لاری‌نین یئرینی اوتوبوس‌لار آلاندان بری، بو کروانسارانین دا ایشی کاساد اولموشدو، قاباقکی گل-گئت‌لر اولموردو داها. یاواش- یاواش خرابه‌لیغا دؤنوشمکده‌ایدی. طؤوله‌لرده کروان‌لارین آت‌لاری‌نین یئرینه، قویون، ائششک، یا دا شهرده دولانان آت داشقالارینی گتیریب باغلیردیلار.

اوست قاتین اوتاق‌لاریندا، اطراف کندلردن گلن یولچولارین یئرینه حسن آغا کاووشو-نون فرش دزگاه‌لاری قورولموشدو.
اوتاق‌لارین کناریندا قاپی‌سی ائیوانا آچیلان، کوچه‌یه پنجره‌سی اولان بالاجا بیر اتاق واریدی. بو بالا اوتاقدان گوزه‌تچی هم کروانسارانین ایچینی هم ده کوچه‌دن گیرن قاپی‌سینی گوره بیلردی. او، ایل‌لر بویو بو اوتاقدا یاتمیشدی، ایندیسه، اونون یئرینده حوسئن بیزوو یاتیردی.
اوست قات، دؤرد-دؤوره‌ ایشگه ائیوان ایدی. اوتاق‌لارین قاپی‌لاری‌یله پنجره‌لری بو ائیوانا آچیلیردی. بو اوتاق‌لار ایل‌لر بویونجا کروان‌لا یولچولوق ائدن‌لرین استراحت یئری اولموشدو.

حوسئن بیزوو ، گوندوزون ایش‌لریندن، محلله ‌اوشاق‌لاری‌ایله میرتداشیب گوله‌شمک‌دن یورغون آرغین قاییتدیغیندا، تک تنها، بو بالا اوتاغا سیغینیب گئجه‌سینی سحرله‌یردی. گئجه یاری‌لاریندا، اورانین درین سس‌سیزلییینی طؤوله‌ده‌کی آت‌لارین کیشنمه‌سی، یا دا کوره‌لرین گؤذرچی‌سی‌نین فیشقاسی سیندیرار، حوسئنی یوخودان ائلردی.

چوخ گئجه‌لر بئله اولموشدو، حوسئنین یوخوسو قاچمیشدی. سونرا دا ها ائله‌میشدی، یاتا بیلمه‌میشدی. قارانلیغین و یوخوسوزلوغون دا همیشه‌کی سونوجو یالقیزلیغا، گئچمیش یاشاما دوشونمک اولموشدو. او، ایندی‌یه کیمی یوزلر، بلکه مین‌لر کره بو قونویا فیکیرلشمیشدی.
گئچمیشیندن، آتاسیندان- آناسیندان، هئچ نه آنیمساماییردی. یاشینی بیله دوغرو- دوروست بیلمیردی.
اوشاقلیق چاغ‌لاریندان هئچ اونودا بیلمه‌دییی بیر خاطیره قالمیشدی بلله‌یینده، او دا تبریزین دهشتلی سئلی ایدی.

داوامی وار...