تبریز بیلیم‌یوردو، بیلیم، آراشدیرما و تکنولوژی وزارت‌خاناسینا (باخانلیغینا باغلی اولان، دولت بیلیم‌یوردلاریندان بیری‌دیر. بو بیلیم‌یوردونون ۲۲ فاکولته‌سی (دانشکده‌سی) و اوست-اوسته ۲۹ بیلیمسل قطب و اؤیره‌تیم مجتمعی واردیر. ۱۳۲۵-نجی ایلده قورولان بو بیلیم‌یورد، تهران بیلیم‌یوردوندان سونرا ایرانین ایکینجی قدیم بیلیم‌یوردو ساییلیر.

تبریز بیلیم‌یوردو ایرانین قوزئی باتیسیندا یئرلشمیش ان بؤیوک بیلگی مرکزی‌دیر.

تبریز بیلیم‌یوردونون قورولماسی فیکری، ایکینجی دونیا ساواشیندان بیر ایل سونرا، ایلک دفعه ۱۳۲۵-ه.ش.ده آذربایجان ملی حکومتی دؤنمینده و سید جعفر پیشه‌وری طرفیندن ایره‌لی سورولدو.

تبریز بیلیم‌یوردو یاخود آذربایجان بیلیم‌یوردونون ایلک یئری دانشسرا میدانیندا، اوغلان‌لار دانشسرا-سیندا، رئیسی ایسه، دوکتور جهانشاهلی ایدی. بیرینجی آچیلیش ایلینده ۱۷۹ نفر اؤیره‌نجی طب، اکینچیلیک، پئداگوژی (معلمچی‌لیک)، فلسفه و ادبیات اوزره تحصیله باشلامیشلار. ۱۳۲۵-نجی ایلین قیزاران (خرداد) آییندا تبریزین دوغو (شرقی) گیریشینده، زیندان کیمی ایشله‌نن بیر بینا «آذربایجان اونیورسیته‌سی» آدیندا بیر بیلیم‌یوردونا چئوریلدی.

آذربایجان مختار دولتی دئوریلیب، آذربایجان ایران اوردوسو توسطو ایله گئری قایتاریلدیقدا یئنیجه قورولموش آذربایجان اونیوئرسیته‌سی داغیلدی. همن ایلین چیلله آییندا «مصطفی حبیبی» و «خان‌بابا بیاتی» آدیندا ایکی نفر اوستاد تهران بیلیم‌یوردو طرفیندن تبریز بیلم‌یوردونو یئنیدن ایشه باشلادیلماسی اوچون گؤره‌ولندیلر. بیلیم‌یوردو دوکتور بیاتی‌نین باشقانلیغی ایله طب و ادبیات فاکولته-لرینده ۱۶۰ نفر اؤیره‌نجی قبول ائتمکله، رسمی اولاراق فعالیتینی باشلادی.

بیلیم‌یوردونون آچیلیش مراسیمی، چاغداش تبریز تاریخینده بؤیوک و بنزه‌رسیز بیر اولای کیمی گؤستریلیب، جانلی اولاراق یئرلی رادیودان یایینلانمیش‌دیر. سونرالار بیلیم‌یوردونون فاکولته‌لری، لابوراتوارلاری، کالئج‌لری و ایش یئرلری بالا-بالا قورولدولار. نئچه ایلدن سونرا بیلیم‌یوردو ایکی « تبریز بیلیم‌یوردو» و «تبریزین ساغلیق بیلیم‌لر بیلیم‌یوردو (دانشگاه علوم پزشکی تبریز)» بؤلمه‌لرینه بؤلوندو.

سونرالار«آذرآبادگان بیلیم‌یوردو» آدلانان تبریز بیلیم‌یوردو، ۱۳۴۶-نجی ایلده ایندیکی یئرینده قورولدو. اؤنجه، بو یئر دوکتور موسوی و دوکتور علم‌الهدی‌نین مولکو اولان بیر باغ ایدی. بو ایکی نفرین مولکو آلچاق بیر دیوار واسطه‌سیله اورتادان بؤلونموشدور. باغین باتی حیصه‌سی "کاظم قوزقوزو"، دوغو حیصه‌سی ایسه "اکبر بامادور" آدیندا شخصلرین کیراسیندایدی.

باغین قوزئی ضلعینده، زوبئیده خاتین بولاغی-نین قیراغیندا «چمن گولو» قهوه‌خاناسی یئرلشیردی. بو باغین او اوزونده پیکریه باغی، جادانین قوزئینده ایسه حاجی محمدعلی حیدرزاده-نین باغی یئرلشمیشدی