آنا صحیفه کولت |
تبریزلی رسامین آد و امضاسی آلمانین ائشمینگ پاستئللری اوزرینده...
۱۳۹۵-جی ایلدن، آلمانین ائشمینگ کومپانیسی، اؤز پاستئل اورونلرینین (تولیداتینین) تازا سئریسینی جواد سلیمانپور آدی ایله بازارا گؤندریب.
ائشمینگ کومپانیسی، پاستئل، یاغل بویا، سولو بویا، اکرلیک، گوواش و... کیمی هنری ملزمهلرین اورهدیجیسیدیر. بو کومپانی ۱۸۹۲-جی ایلدن چالیشماغا باشلاییب، ایللردیر دنیانین باشاباشیندا بازارین بؤیوک بیر قیسمینی قاپساییبدیر. ۲۰۱۵- جی ایلین اورتالاریندان بو کومپانی اؤز تازا سئیری پاسئتل اورونلرینده جواد سلیمانپورون آد و امضاسیندان یارالانماغی ایستهدیگینی بیلدیرمیشدی کی، بو صنعتچینین موافقتی ایله یئنی میلادی ایلدن بو اورونلر بازارا گؤندریلدی.
مهارتلی رسام، جواد سلیمانپور، ۱۳۴۴ گونش ایلینده تبریز شهرینده آنادان اولدو. او، ۱۳۵۶-جی ایلدن رساملیغا باشلاییب، تجربهلر قازانماق اوچون استاد علوی، استاد مقبلی، استاد صدق روحی، استاد فیروز نخجوانی و استاد عباچی زاده کیمی مجرب اوستا صنعتچیلردن درس الدی.
او، ۱۳۵۹-دان گونوموزه کیمی ۳۰-دان آرتیق انفرادی و گروپ اولاراق سرگیلرده، او جملهدن: مانی نگارخانهسی، تبریزین مقبرهالشعراسی، تهرانین معاصر هنرلر موزهسی ، تهرانین کمال الملک و نقش جهان گالریسی و سئوئن سانات استانبولدا اشتراک ائتمیشدیر.
جواد سلیمانپور تبریزین میرک آدلی اینجه صنعتلر هنرستانیندا صنعت اؤیرتمنلیگی ده ائلهیبدیر. اونون الده ائتدیگی اؤنملی افتخارلاریندان بونلارا اشاره ائتمک اولار:
۱۳۷۷-ده، ایرانین ایکی ایللیک رساملیق مسابقهسینده بیرینجیلیک مقامی.
۲۰۰۹ ایلینده، آمریکادا کئچیریلن دونیا پاستئل رساملیغی مسابقهسینده، ۱۱مین اشتراکچی آراسیندا، منظره بؤلومونده بیرینجیلیک مقامی.
۲۰۱۳-ده، تورکیهده، اورانین جمهور باشقانی طرفیندن برگزار اولان تورکیه تاریخیندهکی جمهور باشقانلارینین پورترهسی یاریشماسیندا، اونلارجا رسام ایچینده، بیرینجیلیک مقامی.
آچیقلانمالیدیر کی، بو اثرلر آنکارادا، چانکایا سارایینین ( تورکیهنین جمهور باشقانلیق سارایی) دووارلارینی سوسلهییب، بوتون دونیا لیدئرلرینین گؤروشونه سونولور.
او، ۸۹-جو ایلدن تورکیهنین استانبول شهرینده یاشاییر، و اؤز گالئریسینده هم اؤیرنجیلرینه رساملیق اؤیرتمکدهدیر، هم ده ایللیک سرگیلر دوزنلمکله مشغولدور.
تاریخ
2020.06.04 / 17:15
|
مولف
Axar.az
|