آذربایجان‌دا بؤیوک طنطنه و جوشغو ایله قید اولونان نوروز آرازین جنوبوندا دا بنزر شکیلده کئچیریلیر. بیر سیرا نوروز عادت-عنعنه‌لری هم قوزی‌ده، هم ده گونی‌ده عینی شکیل‌ده اجرا ائدیلیر. آنجاق فرقلی عادتلر ده وار.

Kult.az گونئی آذربایجان‌دا نوروزون ان طنطه‌نه‌لی شکیل‌ده کئچیریلدیی بؤلگه‌لردن بیری اولان اردبیلین نوروزلا باغلی بیر نئچه عادت و عنعنه‌سینی تقدیم ائدیر:

بورادا «یالانچی چرشنبه» و «دوغروچو چرشنبه» آدلاری ساخلانیلسا دا، اساساً سونونجو اوچ چرشنبه خصوصی مراسیملرله قید ائدیلیر. بونلارا «کول چرشنبه»، «قودوخ قیرخدی چرشنبه‌سی» و «گول چرشنبه» دئییلیر.

خالق یادداشینا اساساً، کول چرشنبه‌سینده ائولر توزدان تمیزلنیر و تندیرلرده‌کی کوللری چیخاریب کنارا آتیرلار. دئییله‌نلره گؤره، قودوق قیرخدی چرشنبه‌سین‌ده هاوالار نیسبتا ایستیلشدیینه گؤره قیشدا دوغولموش قودوقلارین و قولانلارین توکلرینی قیرخیرلار. گول چرشنبه‌سی اردبیل‌ده ایلین سونونجو چرشنبه‌سینه دئییلیر و بونون مراسیملری چوخدور.

گول چرشنبه‌سینه، یعنی آخیر چرشنبه‌یه حاضرلیق خیلی اؤنجه‌دن باش‌لانیر. بایرام قاباغی اردبیل «دولگ توتک» آدلانان توتکلرله دولور. دولگه بورادا ساخسی بارداغا دئییلیر. بو جور کیچیک بارداقلارا آت، مارال، کئچی شکلینده اولان لولک ده قویولور. هم لولکلر، هم ده بارداغین اؤزو الوان رنگلرله بزدیلیر. هر یئرده اونلارین چالینماسی شهره شن بیر احوال روحییه گتیریر. گول چرشنبه‌سینین مهم و ضروری ساییلان سیمووللاریندان بیری ده تزه کوزه آلیب، اونون ائوه گتیریلمه‌سیدیر.

بایرام قاباغی حاضرلانان مهم رمزی اشیالاردان بیری ده سمنی‌دیر. سمنینی داها چوخ حمام ایشچیلری حمام‌دا خصوصی تاختلار اوزرینده اکدیکلری بوغدادان دوزلدیر و بایرام قاباغی اونلاری لازیمی قایدادا کسه‌رک، چینی قابلارا قویوب، اؤز مشتریلرینین ائولرینه آپاریرلار.

گول چرشنبه‌سی آخشامی هاوا قارالماغا باشلایاندا اوشاقلار و گنجلر گؤیه فیشنگ آتماقلا، مختلیف پارتلاییجی واسطه‌لری یاندیراراق سس سالماقلا بایرام طنطنه‌سی یاراتماغا چالیشیرلار.

اوشاقلار یاخین قوهوملارینین و قونشولارینین قاپیسینا دستمال قویوب، سونرا قاپینی دؤیور و قاچیب گیزلنیرلر. بو مراسیمه اردبیل‌ده «قورشاق آتماق» دئییلیر. ائو صاحبی قاپینی آچیب، همین دستمالی گؤتورور و اونا بایرام سوقاتی قویدوقدان سونرا اولکی یئرینه قویور.

گول چرشنبه‌سی آخشامی قادینلار اؤز نیتلرینی ده سیناییرلار. بو مقصدله اونلار گیزلینجه قونشولارین قاپیسینا و یا پنجره‌سینه یاخینلاشاراق، ائوده گئدن صحبته قولاق آسیرلار.

گول چرشنبه‌سینین سحریسی گون سو اوستونه گئدیلیر، هر کس اؤزونون چرشنبه‌قاباغی آلدیغی کوزه‌سینی سو ایله دولدوروب، ائوینه گئری قاییدیر. بونونلا دا گول چرشنبه‌سینین مراسیملری سونا چاتیر.

بایرام سفره‌سین‌ده بالیق باشی و تویوق دؤشو اولمالیدیر. ایل تحویل اولاندا سفره‌ده‌کی بالیقلاردان بیرینین باشی آتیلیر. ایل تحویل اولاندان سونرا عائله عضولری بیر-بیری ایله قوجاقلاشیب اؤپوشه‌رک، بیر-بیرینی تبریک ائدیر و بؤیوکلر کیچیکلره بایرام هدیه‌لری وئریرلر.

نووروزون ایلک گونو دوغمالارین گؤروشونه گئدیلیر، «قارا بایرام» آدی آلتیندا وفات ائتمیش یاخین آداملارین قبری زیارت ائدیلیر. بوندان سونرا هر گون بیر محله اولماق اوزره شهرین آیری-آیری محله‌لرینده یاشایان قوهوملار، دوستلار و تانیشلارین گؤروشونه گئدیلیر.