بو گون گونئی آذربایجانین ۲۰-جی عصرده ان تانینمیش شاعر و ضیالیلارین‌دان اولان بولوت قاراچورلونون (سهند) آنیم گونودور.

Kult.az خبر وئریر کی، بولوت قاراچورلو (سهند) ۱۹۲۶-جی ایلین یازین‌دا گونئی آذربایجانین ماراغا شهرین‌ده آنادان اولوب.

ایلک تحصیلینی ماراغا و تبریزده آلان بولود ۱۷ یاشین‌دا ایکن رازی، آز مدت کئچدیکدن سونرا ایسه سهند تخلصو ایله شعیرلر یازماغا باشلاییب.

سهندین گنجلیک ایللری ایران‌دا آذربایجان خالقینین ملی آزادلیغی اوغرون‌دا آپاردیغی چتین مباریزه دؤورونه – ۴۰-جی ایللردن باشلایان ملی-آزادلیق حرکاتینا تصادف ائدیب.

ملی حرکاتدا فعال اشتراک ائد‌ن سهند، ۱۹۴۵-جی ایلده پیشه‌ورینین رهبرلییی ایله گونئی آذربایجان ملی حکومتینین قورولماسیندان سونرا آذربایجاندا آپاریلان مترقی اصلاحاتلار باره‌ده شعیرلر یازیب.

۱۹۴۵-جی ایلده تبریزده قورولموش "شاعرلر مجلیسی"نین و آذربایجان دئموکرات فیرقه‌سینین عضوو اولان سهند، ۱۹۴۶-جی ایلده میللی حکومت دئوریلدیک‌دن سونرا حبس، سونرا ایسه تئهرانا سورگون ائدیلیب.

۱۹۴۷-جی ایلده "خاطره" آدلی ایلک منظوم اثرینی یازان بولوت قاراچورلو، ۱۹۵۱-جی ایلده یئنی‌دن حبس ائدیلیب، حبسخانادا "خاطره"نین داوامی اولان "آراز" اثرینی یازیب.

۱۹۶۷-جی ایلده تهران اونیورسیتتین‌ده شرق شناس عالیم روستم علیئوله گؤروشن سهند، "ارمغان" آدلی اثرینی باکیا گؤندریب.

۱۹۶۸-جی ایلدی "ایکینجی ارمغان" اثرینی باکییا گؤندردیکدن سونرا، بختیار واهابزاده، مممد راحیم و سلیمان روستم اونا جواب شعیرلری یازیبلار.

"اوچونجو ارمغان"ی یازان قاراچورلو ۱۹۶۸-جی ایلده چتین ده اولسا اؤزو بو اثری شمالی آذربایجانا گتیریر و بورادا دورون تانینمیش یازیچی و شاعرلری ایله یاخیندان گؤروشور.

گئری قاییتدیقدان سونرا پهلوی حاکمیتینین تهلوکه‌سیزلیک اداره‌سینین تعقیب و تضییقلرینه معروض قالدیغی واخت، شهریار اونون منظوم مکتوبونا جواب اولاراق "سهندیه" پویماسینی یازیر. بو سهندین داها دا مشهورلاشماسینا سبب اولور.

لیریک شعرلر یازان شاعر آرزو، ایستک و آغریلارینی خالقا چاتدیرماق اوچون "دده قورقود" داستانلارینا اوز توتوب. خالق یارادیجیلیغیندان یارارلانیب و دده قورقود داستانلاری اساسیندا مشهور "سازیمین سؤزو" اثرینی یازیب.

ایکی جلده چاپ اولونان بو اثر گونئی آذربایجانین ۲۰-جی عصر ادبیاتینا اؤزونه‌مخصوص یئری ایله سئچیلیر.

بولوت قاراچورلو سهند، فورال انقلابینین باش وئرمه‌سیندن قیسا مدت سونرا، ۱۰ آپرل ۱۹۷۹-جو ایلده دونیاسینی دییشیب.

۲۰۰۶-جی ایلده سهندین "سچیلمیش شعیرلری" باکی‌دا شرق-غرب نشریاتی طرفیندن چاپ اولونوب.

اؤزگه چیراغینا یاغ اولماق بسدیر،
دوغما ائللریمیز قارانلیقدادیر.
یانیب، یاندیرمایاق یادین اوجاغین،
ائویمیز سویوقدور، قیشدیر، شاختادیر.

دئمیرم یانمایاق، آلوولانمایاق،
یانماسین، نئیله‌سین یازیق پروانه؟!
یانمایاق وفاسیز یارین اودونا،
یاناق ائلیمیزه، یاناق وطنه!.........