دیلیمیزده تئز-تئز ایشله‌دیله‌ن بئله دئییملر وار: «هر ایشین ایچیندن بیر قمبرقولو چیخیر»، «قمبرسیز توی-دویون اولماز». بس بو هر ایشین ایچیندن چیخان، هر تویا گئدن او قمبرقولو کیم اولوب؟

Kult.az «بئله یارانیب» روبریکاسیندا بو ایفادنین یارانما تاریخچه‌سینی تقدیم ائدیر:

اؤنجه قید ائدک کی، «قمبرسیز توی-دویون اولماز» ایفاده‌سی اکثر مسلمان اؤلکه‌لرین‌ده، خصوصاً تورکییه‌ده چوخ سیخ ایشلدیلیر. هر مجلیسه، هر تدبیره گئدن آداملار حاقین‌دا ایشله‌دیله‌ن ایفاده‌دیر. بعضا استهزا معناسی دا داشیییر.

قمبر حضرتی علینین قولو اولوب. بعضی منبع‌لرده اونون علینین قولو یوخ، صادق دوستو، گئتدیی هر یئرده اونو مشایعت ائد‌ن آدام اولدوغو دئییلیر.

قمبر علینین هم قولو، هم صادق دوستو، هم محافظه‌چی‌سی، هم ده یاخشی دین بیلیجیسی ایدی. علی هارا گئدیرمیشسه، قمبر ده کؤلگه کیمی اونو ایزله‌ییب. یعنی، قمبرسیز علینی گؤرمک ممکن‌سوز اولوب. اونا گؤره هر ایشین آلتین‌دان دا بو قول قمبر، باشقا سؤزله قمبرقولو چیخیرمیش.

یاخین اطرافین‌دا کیمین خئییر-شر مجلسی اولارمیشسا، علی قمبری او ائوه کمکه گؤندرردی. دئیی‌لنه گؤره، علی قمبری کؤله‌لیکدن آزاد ائد‌ندن سونرا او، ملالیق ائدیب و چوخلو سایدا اینسانین نیکاحینی کسیب. اونا گؤره «قمبر اولمادان، توی اولماز» ایفاده‌سی ایشلدیلیب.

باشقا بیر وئرسییایا گؤره، بو ایفاده مشهور «آرزو و قمبر» داستانیندان گؤتورولوب. بیر-بیری ایله ائوله‌نه بیلمه‌یه‌ن ناکام عاشیقلری قووش‌دورماق ایسته‌یه‌ن شهر والیسی «قمبرسیز توی اولماز» دئیه‌رک، آرزونو قمبره قوووشدورماق ایسته‌ییب.