خصوصاً سون آیلار آذربایجان دیلینده اولان کیتابلارین نشرینه قاداغا و سنزورالار اهمیتلی درجه‌ده آرتیب.

Kult.az خبر وئریر کی، بو سؤزلری "یاز" نشریاتینین مدیری بهرام اسدی دئییب.

او، ایرانین مدنیت و اسلامی ارشاد ناظرلیینین آذربایجان دیلی، مدنیتی، تاریخی و کیم‌لییی ایله باغلی اولان نشرلره مناسیبتینین سون واختلار داها دا سرتلشدیینی سؤیله‌ییب.

اسدی‌نین سؤزلرینه گؤره، اوشاقلار اوچون نظرده توتولان کیتابلارین نشرینه ده حساس‌لیقلا یاناشیلیر، چاپینا اجازه وئریلمیر.

قید ائدک کی، بیر نئچه گون اول شاعر، ترجمه‌چی و مدنی فعال صالح سجادی ده همین مسئله ایله باغلی پایلاشیم ائدیب.

"یارانان وضعیت تورک دیلینده کیتابلارین نشرینه، آذربایجانین تاریخ، دیل و مدنیتی ایله باغلی فعالیتلره بیرمعنالی اولاراق قاداغا کیمی دیرلندیریله بیلر"،- صالح سجادی بیلدیریب.