آذربایجانین خالق آرتیستی، بسته‌کار فایق سوجددینوو تبریزین "تراکتور" فوتبول کلوبو اوچون "ظفر مشقی" آدلی مارش بسته‌له‌ییب.

Kult.az خبر وئریر کی، بو باره‌ده دانیشان خالق آرتیستی "تراکتور" اوچون مارش یازیلماسینی آکادمیک رافایل حسینووون تکلیف ائتدیینی بیلدیریب.

سوجددینووون سؤزلرینه گؤره، مارش ۱۲ نفرلیک خور طرفیندن ایفا اولونوب:

"آنجاق بیز بونو ائله فورمایا سالمیشیق کی، ۶۰ نفرلیک خورون ایفاسی کیمی سس‌لنیر. سولو ایفا ایسه تورال آغاسییئوه مخصوص‌دور. بیز بو تشببوسو جان-باشلا ایشلدیک، حساب ائدیریک کی، بو مارش "تراکتور" کلوبونو داها بؤیوک ظفرلره آپاراجاق".

قید ائدک کی، ایسوچ‌ده نشر اولونان "تریبون" ژورنالینین سون بوراخیلیشی دا بوتولوک‌ده "تراکتور" فوتبول کلوبونا حصر اولونوب.

بوراخیلیش‌دا بحث اولونان مارشین سؤزلرینین مؤلفی آکادمیک رافایل حسینووون گئنیش مقاله‌سی ده درج اولونوب.

آکادمیک مقاله‌ده «تراکتور"اون فاکتیکی وضعیتینی معجزه کیمی قیمتلندیریب:

"تراکتور" معجزه‌سی اؤز فلسفه‌سی اعتباریله یالنیز آذربایجان حادثه‌سی دئییل، دریندن دوشونولرسه و داها نهنگ موستویده گؤتورولرسه، عکس-صداسی سونرالار هله داها قاباریق دویولاجاق، عنعنه‌یه چئوریلمه‌لی قوت‌لی ملی کاراکتر تظاهرودور".

حسینوو «تراکتور»او جمعیتین بوتون طبقه‌لری اوچون رمز آدلاندیریب:

"فلسفه‌سی اعتباریله واحد رمز – استقلالین، داخلی آزادلیغین، مستقیللیین، اؤز اراده‌سینین شریکسیز صاحبی اولماغین، الین، دیلین سیمگه‌سی؛ اما «تیراختور» هم ده بو آنلاییشلارین هر بیرینی تجسم ائتدیره‌ن بیر-بیریندن سئویم‌لی رمزلر سلسله‌سی‌دیر".

"ظفر مشقی" مارشی

هجوما کئچ، اوستونلویو آل اله،

رقیبلرین میدانینی دار ائله.

غالبیت اینامی یای هر کسه،

تبریزیمله، گونئیمله سس-سسه!

درسینی وئر سنی ضعیف بیله‌نین،

هردن سنه اوست‌دن باخیب گوله‌نین.

هامی گؤرسون سن بیر یاتمیش آسلان‌سان،

جوشدوغون‌دا سن گور سئل‌سه‌ن، ولکان‌سان!

ایر‌لی قوش، سیرانی یار، قول وور، قول،

میلیونلارلا قوللار قالخ‌سین، فاتح اول!

آتدیغین توپ بوتون خالقی اویادیر،

سن میللته روح وئره‌نسه‌ن، «تیراختور»!

خالقین سنه دایم آرخا اولوب‌دور،

ائله گووه‌ن، سن ده خالقا آرخا دور.

سن بو خالقین عزمی، عشقی، «تیراختور»،

سن میللتین ظفر مشقی «تیراختور»!