آمریکاین سفیرلیینی قودسه کؤچورمه‌سیندن سونرا گرگین وضعیتین یاراندیغی یاخین شرق‌ده ایسرایل عسگرلرینین ۶۰-دان آرتیق فلسطینلینی اؤلدورمه‌سی بوتون دونیانی سارسیب. باش وئره‌ن قانلی حادثه‌لره قارشی برازیلییادان یونانیستانا، آمریکادان فیلیپپینه، جنوبی آفریکادان ایسوچره‌یه کیمی دونیانین دؤرد بیر یانیندا اعتراض آکسییالاری کئچیریلیب.

آخار. آذ خبر وئریر کی، حتی ایسرایل‌ده بئله سولچولار کوچه‌لره آخین ائد‌رک اعتراض نوماییشلری کئچیریب و اؤلوملرین درحال دایاندیریلماسینی طلب ائدیب.

حادثه‌لرین آرخاسیندا دایانان بیر نؤمره‌لی شخص - ایسرایلین باش ناظری بنیامین نتانیاهو اؤتن گئجه رسمی ایقامتگاهیندا بؤیوک بیر شوک یاشاییب. ایسرایل‌لی نوماییش‌چیلر اللرینده پلاکاتلارلا نتانیاهویا اعتراض ائدیب. نوماییشچیلر اللرینده‌کی پلاکاتلاردا «قززانی ایندی آزاد ائدین»، «قززاداکی اعتراض ترورچولوق دئییل» شعارلاری دقت چکیب.

ایسرایلین نفوذلو «هاارتص» نشری یوزلرله سولچونون پایتخت تلاویوده اعتراضلارا قوشولدوغونو بیلدیریب. یوللاری باغلاییب، نقلیاتین حرکتینی ایفلیج ائد‌ن کوتله «آتش آچماغی دایاندیرین»، «عربلر و یهودیلرین دوشمنچیلیینی رد ائدیریک» شعارلاری سسلندیریب. نوماییشچیلرین الین‌ده‌کی پلاکاتلاردان بیرین‌ده ایسه «ترامپ و بیبی، بیز سیزین اویونجاغینیز دئییلیک» یازیلیب (بیبی باش ناظر نتانیاهونون آدینین قیسالتماسیدیر).

اعتراض صدالاری همچینین دونیانین ان پرستیژلی فیلم فستیواللاریندان حساب اولونان کان‌دا دا اوجالیب. لیوانلی آکتریسا مانال ایسسا فستیوال‌دا «قززایا هوجوملاری دایاندیرین» یازیلمیش ورقه نوماییش ائتدیریب.

خاطیرلاداق کی، آمریکا سفیرلیینین قودسه کؤچورولمه‌سینه اعتراض ائد‌ن فیلیسطینلیلره آچیلان آتش نتیجه‌سینده اؤلنلرین سایی ۶۱ نفره چاتیب. حادثه‌لر زامانی ۲۷۰۰ نفر یارالانیب.