جواب: بیر چوخلاری نین "ایستعمار" ایله "استبداد" آنلاییشلاری اوست اوسته دوشر. اونلارا گؤره ایران ممالیکی محروسه سینده کئچمیش یوز ایلده فقط "استبداد" حاکیم اولموش.

بونلاردان سوروشدوقدا سیزین قلمه آلدیغینیز "استبداد حاکیمیتی" نه اوچون فارسلارین دیلی و مدنیتلرینی یاساق و قاداغان ائتمه میش، حتی اعدام حؤکملری بیله فارسچا یازیلار، آنجاق نه اوچون فارس اولمایان ملی توپلوملارین دیل و مدنیتلری یاساق و قاداغان ائدیلمیش (؟) دئیه سوروشدوقدا فارسچا رسمی دیلدیر دئیه جاواب وئررلر. بونلار هئچ زامان اؤزلرینه فارسچانین نه اوچون رسمی، آزاد و باشقا دیل و مدنیتلرین یاساق و قاداغان ائدیلدیکلری اوزره دوشونمک قابیلیتینه مالیک اولمامیشلار.

دئمک، حاکیم اولموش نظام و انتظام اؤز ائلیتی و دوشونورلری واسیطه سی ایله "استبداد" آنلاییشینی اورتایا آتاراق "فارس ایستعمارچیلیق" آنلاییشینی کؤلگه ده ساخلاماغا و بئله لیکله فارس اولمایان ملی توپلوملاری فارسلیقدا اریدیب یوخ ائتمک سیاستینه تابع توتماغا چالیشار. فارس ایستعمار حاکیمیتی استبدادچی داورانیشلاری ایله فارس ایستعمارچیلغینی اؤرتوک آلتینا آلار و کؤلگه-ده ساخلارکن انسانلارا یالنیز فارس حاکیمیتی اوغروندا دوشونمکدن باشقا فیکیر اولوشدورماغی دا قیسیرلاتماق سیاستینی اؤزونه بیر ایستراتئژیک خط قلمه آلار. بئله بیر سیاست ایله فارس ایستعمارچیلیق حاکیمیتی بو موجودلاری کرگدن دورومونا دوشوردوگونه باخمایاراق بونلار یالنیز بیز بوینوز چیخارماریق دئیه اللرینی باشلارینا قویاراق اؤزلرینی "آیدین (روشنفکر)" قلمه آلار و استبداد کلمه سینی بیر ساقیز کیمی چئینمگه چالیشارلار.