ایسرایل رژیمی قزئتی " ژئروسالئم پوست" سعودییه عربیستانی ایله علاقه‌لره آپاران یولونو آراشدیران بیر حسابات یاییملاییب. حسابات‌دا دا بو باره‌ده معلوماتا یئر وئریلیب.

"ایسرایل و سعودییه عربیستانینین اورتاق بیر دوشمن اولان ایرانا قارشی گیزلی شکیل‌ده امکداشلیق ائتدیکلری تئز-تئز دئییلیر" - دئیه قزئت یازیب. معلوماتا گؤره، ایسرایل رژیمی اوردوسونون بیرگه قرارگاه ریسلری ۲۰۱۷-جی ایلده سعودییه عربیستانی و ایسرایلین بؤلگه‌ده‌کی علاقه‌لی قروپلارا وئریله‌جک ایران ایستحصالی سلاح سیستملری حاقین‌دا معلومات مبادیله‌سی ائتمه‌سینی تکلیف ائدیرلر.

"ایسرایل و سعودییه عربیستانی آمریکانین نظارتی آلتین‌دا مشترک تکنولوگییایا اساس‌لانان حل یوللاری حاضرلامالی و قارشیلاشدیقلاری چتین‌لیکلری بؤلوشملیدیرلر. ایرانین راکت لاییحه‌سینه قارشی یؤنلمیش اقتصادی جهت‌دن ثمره‌لی مدافعه سیستملرینین اینکیشافی یاخشی بیر باشلانغیج اولا بیلر. تهدیدین جیددیلیینه شوبهه ائد‌ن وارسا، سعودییه‌لیلر و ایسرایل اوچون هیجان وئره‌ن سعودییه عربیستانینین "آرامکو" نفت معدنلرینه ائدیله‌ن سنتیابر هجوملارینا باخمالی‌دیر"، - دئیه قزئت یازیب.

همچینین حسابات‌دا قید اولونوب کی، سعودییه عربیستانی ایچمه‌لی سویونون ۵۰ فایزینی دوزسوزلاشدیرما زاوودلاری واسطه‌سی ایله ساکینلرینه وئریر و بو قورغولار عینی شکیل‌ده هجوما معروض قالسا، فلاکتلی نتیجه‌لره سبب اولاجاقدیر. عینی زامان‌دا سعودییه عربیستانی دمیر قوببه راکتدن مدافعه سیستمینین آلینماسینی دا نظردن کئچیره بیلر.