نویابر اعتراضلارین‌دان آیلار کئچمه‌سینه باخمایاراق، ساخلانیلان آذربایجان فعاللاری هله ده بوراخیلماییب.

نویابردا بنزینین آنی‌دن باهالاشماسین‌دان سونرا ایران‌دا کوتلوی اعتراضلار باش وئردی. قیسا زامان‌دا ایرانین بیر چوخ یئرینه یاییلان اعتراضلاردا میللت، گونبگون چتینلشه‌ن اقتصادی دوروما اعتراض ائدیردی. ایرانین تهلکه‌سیزلیک گوجلری میللتین اعتراضینی کوبود بیر شکیل‌ده یاتیریردی. نئچه گون ایچین‌ده ۸ مین نفردن چوخ اینسانین توتولماسی خبری یاییل‌دی. ان قریبه‌سی ایسه اعتراضلارا قاتیلمایان آذربایجان فعاللارینین دا حبس ائدیلمه‌سی ایدی. عائله‌لرینه نه اوچون توتولمالاری حاقین‌دا بیلگی وئرمه‌یه‌ن مسئوللار میللی فعاللارا باسقیلارینی داها دا آرتیردیلار. بئله‌لیکله، نویابر اعتراضینی بهانه ائد‌ن رئژیم آذربایجان‌دا یئنی‌دن قورخو و دهشت حکومتی قورماغا چالیش‌دی. بعضی فعاللار شرط‌لی آزاد اولسالار دا، بیر چوخ میللی فعال هله ده سورغو آلتین‌دادیر.

تبریزدن گلن معلوماتا گؤره، میللی فعاللاردان یالان اعتراف آلماق اوچون باسقی گؤستریرلر. اؤنجه‌لر ده، حاکمیت توتدوغو آذربایجان فعاللارین‌دان یالان اعتراف اوچون ایشکه‌نجه‌یه باش ووروب. حتی اونلارین عائله‌لرینه ده باسقی ائدیبلر.
آذربایجان و اومومیتله فارس اولمایان میللتلرین معروض قالدیغی ظلم و آیری-سئچکی‌لیک تکجه حاکمیت طرفین‌دن گئرچکلشدیریلمیر. ایران‌دا اقتداردا اولان فارس-شیعه کولتورو رئژیم طرفین‌دن رسمیته تانینان یئگانه هایات طرزی‌دیر. بو دوزه‌نین خاریجین‌ده قالانلار ایستر-ایستمز آغیر آیری-سئچکی‌لییه معروض قالیرلار. ایران‌دان خاریج‌ده موخالیف کیمی چالیشان فارس دیل‌لی مطبوعاتین چوخو عمله‌ن گؤستریب کی، میللتلرین حاقلارینا اینانجلاری یوخ‌دور. اؤرنیین، حاکمیت فارس اولمایانلارین میللی کیملیینی نئجه یوخ ساییرسا، بو مطبوعاتین دا چوخو عینی ایشی گؤرور. اوزون مدت‌دن بری مهبوس اولان آذربایجان فعاللارینین خبرلری بایکوت ائدیلیب.

بو مطبوعات‌دا چالیشانلار مرکزچی فعاللار حاقین‌داکی خبرلری هسساسیتله گون‌ده‌مه گتیریرلر.

آنجاق، تورک مهبوسلاری مسئله‌سین‌ده سس‌سیزلیگی سئچیرلر. حتی اجتماعی مئدیادا بئله رئک‌سییا گؤستریب، اعتراض ائتمیرلر.

آذربایجانین مینیموم حاقلاری قارشی‌سین‌دا بئله فارس مطبوعاتی و اومومیتله آیدینلارین‌دان یاردیم گؤرمک اولمور. مثال اوچون دونیا آنا دیلی گونون‌ده توتولان فعاللارین هر بیرینه ۲ ایل حبس و سورگون جزاسی وئریل‌دی. بو حؤکم، ایران حاکمیتینین فارس اولمایان میللتلرین آنا دیلی مسئله‌سینه باخیشی‌دیر.