اهر شهرین‌ده اطراف موحیطی تهدید ائده بیله‌جک بیر سیرا پروبلئملر، او جمله‌دن، توللانتیلارین قای‌دالارا اویغون اولمایان فورمادا باسدیریلماسی، قویروغو قهویی کپنک، شهرین چیرکاب سولارینین غیری-قانونی طرزده یؤنلدیلمه‌سی، میس معده‌نین توللانتیلارین‌دان عبارت سو آنبارینین یارانماسی و بو کیمی دیگر حاللار اطراف موحیطین پروبلئملری ایله ماراقلانان خئیلی ویجدان‌لی شخصلری ناراحات ائدیر.

آذنیوز. تی وی خبر وئریر کی، بو باره‌ده اهر شهر اطراف موحیطین محافظه‌سی ایداره‌سینین رئیسی علی داییلاری «مهر» خبر آگنتلیینه مصاحیبه‌سین‌ده دئییب. او بیلدیریب کی، اطراف موحیطین پروبلملری ایله ماراق‌لانان شخصلرین سسلرینی ائشی‌دن یوخ‌دور:

«بو ایل ده اطراف موحیط هفته‌سی بئله کئچدی. کیمسه اطراف موحیطین مسئله‌لری ایله ماراقلانمادی. اهر شهرین‌ده بیزی ناراحات ائد‌ن بیر چوخ اطراف موحیط پروبلملری وار. اونلاردان بیری زیبیل و توللانتیلارین اصوللارا اویغون اولمایان شکیل‌ده باسدیریلماسی‌دیر. دفعه‌لرله اهرین بلدییه‌سینه بو باره‌ده خبردارلیق ائتسک ده، محل قویان اولماییب. زیبیللرین توپلاندیغی یئرین اطرافینا هاسار چکیلمه‌لی‌دیر کی، حیوانلار زیبیل‌لیک‌ده اوتلاماسین. دیگر طرف‌دن، زیبیللرین یاندیریلماسی ایله باغلی بلدییه‌یه اؤز اعتراضیمیزی بیلدیرمیشیک. بئله کی، بو، هاوانی چیرکله‌ن‌دیرمکله یاناشی، اهالییه، خصوصیله، آزغان یولونون کنارین‌دا مسکونلاشان ساکینلرین وضعیتینی دؤزولمز حده چاتدیریب. بعضی حاللاردا پروبلئملرین حلی بلدییه‌نین اؤهده‌سین‌دن خاریج اولسا دا، اؤهده‌سین‌دن گلدیکلری ایشلردن ده اسیرگییرلر. زیبیل و توللانتیلارین یئری یئنی بیر مکانا کؤچورولمه‌لی‌دیر. اهر شهری ویلایت‌ده بیرینجی دفعه کومپوست زاوودونون تیکیلم‌سهینه ایستارت وئریب. بورادا بیر داها بلدییه‌نین کمکی لازیم‌دیر. لاییحه‌یه بلدییه دستک وئررسه، اوندا شهر توللانتیلارینین ۷۰%-نی دیرلی کومپوستا چئویرمک اولار».

اهر شهر اطراف موحیطین محافظه‌سی ایداره‌سینین ری‌سی شهرین چیرکاب سولاری پروبلئملرین‌دن ده دانیشیب.

«توتالیم، سو و چیرک‌لی سولار ایداره‌سینین شهر چیرکاب سولارینین ۷۰ فایزی چیرکاب تمیزله‌مه تسیساتین‌دا زررسیزلشیر. لاکین قالان ۳۰ فایزه نه باش وئریر، معلوم دئییل. بونلار چایلارا آخیدیلیر، یئرالتی قاتلارا یؤنلیر و یا دیگر قای‌دالارا ضد فورمادا دف اولونور. دیگر طرف‌دن، اهر شهرینین ایچمه‌لی سو تسیساتین‌دا یارانان چیرکاب سولار بیرباشا شؤله بران کانالینا اؤتورولور. بو دوروم اؤزو اطراف موحیطه بؤیوک بیر تهلوکه یاراداراق ساکینلرین ساغلام‌لیغینی تهدید ائدیر».

علی داییلاری موصاحیبه‌سین‌ده شهرین هاواسینین کئیفیتی باره‌ده ده دانیشیب.

«شهرین هاواسی ویلایت اوزره ان تمیز هاوالاردان بیری‌دیر. بونا سبب شهر اطرافین‌دا اولان گئنیش مئشه‌لیکلر، یایلاقلار و اوتلاقلاردیر. دئمک اولار، هاوانی چیرکله‌ن‌دیره‌ن هئچ بیر عامل یوخ‌دور. بو گؤزل نعمت‌دن توریزمین اینکیشافی اوچون ایستیفاده ائتمک اولار. لاکین بئله ایمکانلاردان کیفایت قدر ایستیفاده اولونمور. زامان-زامان کلئیبرین فرمانداری (ایجرا حاکمیتینین باش‌چی‌سی) بئله بیر ایفاده ایشلدیب: «کلئیبرده توریزم‌دن گلن گلیرله بیر ویلایتی ایداره ائتمک مومکون‌دور». من ده اونون سؤزلرینه قاتیلیر، دئییرم، اهرده ده بئله بیر ایمکان وار. ساده‌جه، مؤوجود اولان ایمکانلاردان دوزگون ایستیفاده ائتمک لازیم‌دیر. گؤزل سولار، گؤزل طبیعت، مئشه‌لر، داغ‌لیق یئرلری، یایلاقلار و س. عمومی‌لیک‌ده، طبیعت اهر شهرینه خئی‌لی نعمتلر بخش ائدیب. حتی توریستلرین اوز توتدوغو ایکی ساحه‌نین – «فیندیق‌لی مئشه‌سی» و «ستتارخان کمپی» ایداره ائدیلمه‌سین‌ده چتین‌لیک چکیریک.

همچینین، ۵ قوم-چینقیل زاوودون‌دان بیری باغلانیب، قالان ۴ زاوود ایسه ایقلیمله القادار ایلده ۴-۵ آی فعالیت گؤستریر. بونلارا اطراف موحیطین قورونماسی ایله باغلی لازی‌می تلیماتلار وئریلیب. شوکورلر اولسون کی، بو باره‌ده هله‌لیک بیر پروبلئم یوخ‌دور. انجرد میس مده‌نینین توللانتیلارینا گلدیک‌ده، البته، بو مده‌نین اطراف موحیطه زیانلاری وار. لاکین همین زیانین مینیمال سوییه‌یه سالماق اوچون اونلارا تلیماتلار وئریلیب و ایجرا اولونور. اگر بونا ریایت اولونماسا، نؤوبتی آددیملار آتیلاجاق».

اطراف موحیطین محافظه‌سی ایداره‌سینین ری‌سی قویروغو قهویی کپنیین قوروقلارا هوجوم ائتمه‌سین‌دن ده دانیشیب:

«بو باره‌ده شرقی آذربایجان اطراف موحیطین محافظه‌سی تشکیلاتینا معلومات وئرمیشیک. ائکسپئرت قروپو ساحه‌یه گلیب، آراش‌دیرمالار آپاریب. ان اویغون موباریزه اوسولو باره‌ده بیزه معلومات وئریله‌جک. اوللر یئرلی ساکینلر کپنکلری ییغاراق دؤولته ساتیر، پول آلیردی. بو ایلده‌ن همین ساحه ائکولوگییا ایداره‌سینین نظارتین‌دن چیخدیغی اوچون پروقرام دایاندیریلیب».

قاراداغ مئشه‌لرین‌ده آغاجلارین کسیلمه‌سی مسئله‌سین‌ده دانیشان موصاحیب بیلدیریب کی، اهر شهرین‌ده ۷۲۴۰۰ قوروق مئشه وار. همین قوروق مئشه‌لردن آغاجلارین کسیلمه‌سی ادعا اولسا دا، بو، حقیقتی عکس ائتدیرمیر:

«چونکی، کسیله‌ن آغاجلار دیگر بؤلگه‌لره عایید اولوب و ساده‌جه داشییانلار بو بؤلگه‌دن کئچدیکلری اوچون بئله بیر تسووور یارانیب».