آنا صحیفه رپورتاژ |
Axar.az تورکییهنین ایستانبول شهرینده یاشایان آراشدیرماچی-یازار محمد رحمانیفرین ایرانداکی حادثهلرله باغلی مصاحیبهسینی تقدیم ائدیر:
- ایرانداکی سون اعتراضلاردان دانیشاردینیز. اونو اولکی اعتراضلاردان فرقلندیرن اساس خصوصیت ندیر؟
ایلک گوندن دئییرم کی، بو اعتراضلارین ۳ بؤیوک اؤزللیگی وار. بیرینجیسی گئنیشلیییدیر. داها اوللر ده ایراندا اعتراضلار اولوب، آنجاق جغرافی باخیمدان بو گنیشلیکده اعتراضلارا بیز شاهید اولمامیشدیق. حاضیرکی اعتراضلار هارداسا اؤلکهنی باشدان-باشا احاطه ائدیر. ایکینجی مسئله داواملیلیغیدیر. اولکی اعتراضلار اوزاغی ۱۰ گونه حاکمیت طرفیندن یاتیریلیب، داغیدیلیب. آنجاق بو دفعه بونون عکسینی گؤروروک. تخمیناً ۸۰ گون اؤنجه باشلایان گنیشمیقیاسلی اعتراضلار هله ده داوام ائدیر. بللیدیر کی، حکومت ده اعتراضلاری یاتیرا بیلمهیهجک. حاضیرکی آکسییالارین ۳-جو و ان بؤیوک اؤزللییی ایسه قادینلارین، خصوصیله گنج قیزلارین اؤن سیرالاردا یئر آلماسی و آپاریجی عنصر کیمی اورتایا چیخمالاریدیر. حاکمیت ده بونو بیلیر.
- گؤرونور، حاکمیت قادینلارلا باغلی مسئلهده گذشته گئتمهیه حاضردیر. بیر نئچه گوندور مطبوعاتدا «اخلاق پلیسی»نین لغوی ایله باغلی خبرلر یئر آلیر…
- بو خبر بینالمل مطبوعاتدا دا عکس اولوندو. آنجاق ایرانین داخیلینه نظر یئتیرنده بونا کیمینسه اینانمادیغینی گؤروروک. اولا حکومت رسمیلری بونو رسمی شکیلده آچیقلاماییبلار. بونونلا یاناشی ایرانلیلار بیلیر کی، «اخلاق پلیسی»نین آدی دییشسه ده، باشقا فورماتدا باسقیلار داوام ائدجک. نئجه کی ایندی قادینلارین باش اؤرتوسو و گئییملرینه سادهجه «اخلاق پلیسی» نظارت ائتمیر. اوفیسلرده، ایش یئرلرینده هر یئرده «حراست» دئییلن بیر بؤلمه وار. بو «حراست» ایرانین کشفیاتینا تابع اولان بؤلمهدیر. اونون وظیفهلرین بیری ده دولته مخصوص ایستهنیلهن ایش یئرینده، حتی مکتب و اونیورسیتتلرده قادینلارین گئییمینه نظارت ائتمکدیر. اونا گؤره ده ایرانلیلار هئچ بو شایعهلری جدییه آلمیرلار.
-ایرانداکی اعتراضلاردا گونئی آذربایجان فعاللارینین دا حبسینی، ساخلانیلدیغینی گؤرورورک. اونلارین آکسییالارا یاناشماسیندان دانیشاردینیز…
- گونئی آذربایجان تورکلری ایلک گوندن بو اعتراضلاردا آپاریجی رول اویناییبلار. واخت آشیری میدانلارا آخین ائدرک اؤز شعارلارینی سسلندیریبلر. باشقا ملتلرله آیاقلاشسالار دا، اؤز سؤزلرینی دئییبلر:، «آذربایجان ملتی، چکمز بو ذلتی»، «بیز اؤلمهیه حاضیریق، بابکین سربازیییق!» «آزادلیق، عدالت، ملی حکومت»، « نه شاهچییام، نه شیخچی، ملتچییهم ملتچی!» بو تیپ شعارلار فرقلی شهرلرده قارشیمیزا چیخیر. عمومیتله ایسه آذربایجانلیلار دئینده فرقلی دوشونجهده اینسانلار یاشاییرلار. بونو اونوتماق اولماز کی، بعضیلری هله او ایراندا دموکراتییانین یئرینه اوتوراجاغینا، بعضیلری رژیم چرچیوهسینده فدرالیزمین گئرچکلشمهسینه اینانیرلار. اما جدی کسیم وار کی، اونلار «آذربایجان ملی حرکاتی» آدلانیر و اؤزونه گؤره توپلومدا دا قبول گؤرولن جریاندیر. بو جریان گونئی آذربایجانین مستقیللیینی ایستییر. اونلار بئله دوشونور کی، آذربایجان ایراندان آیریلماسا سویداشلاریمیز اوردا خوشبختلیگیی، سعادتی تجربه ائده بیلمهیهجکلر.
تاریخ
2022.12.06 / 09:30
|
مولف
آیتاج آراز
|