گونئی‌لی وکالیست مهدی قاضیزاده‌نین Kult.az-آ مصاحبه‌سی:

- مهدی بی، اؤزونوز حاقدا قوزئی آذربایجان اوخوجولارینا معلومات وئرردینیز...

- ایران آذربایجانینین (گونئی آذربایجان) ایندیکی آدی پارساباد اولان مغان شهرینده آنادان اولموشام. اوشاقلیقدان موسیقیه هوسیم اولوب. حاجی‌بیلینین «او اولماسین، بو اولسون» و «آرشین مال آلان» اپرتتالاری ایلک دفعه منده موسیقی ذؤوقونو آییلدیب. هر دفعه بو موسیقیلی کمدیالارا تلویزیادا باخاندا ائوده - قوناقلاریمیزین یانیندا مشهدی عبادین اوبرازینی هوسله جانلاندیرماغا چالیشیردیم. ایران مکتبلرینده فارس دیلینین اوستون توتولماسی، آنا دیلیمیزده تحصیله قاداغا قویولماسی منی سئودییم صنعتدن اوزاق سالدی. بونا باخمایاراق، ۱-جی صینیفدن ۱۲-جی صینیفه قدر مکتبده تدبیرلر زمانی آواز اوخویاردیم. سسیمی بیندیکلری اوچون اذان دا اوخویاردیم. نهایت، ۲۰ یاشیمدا اسکریپکانی(ویولن) اؤیرنمه‌یه چالیشدیم. بیر نئچه ایل سونرا تهران کنسرواتوریاسیندا تحصیل آلماغا باشلادیم. اما بو، منی قانع ائتمه‌دی و ۲ ایل سونرا قوزئی آذربایجانا گله‌رک، اوزیر حاجی‌بیلی آدینا باکی موسیقی آکادمیاسیندا وکال اوزه تحصیل اوچون باش ووردوم.

- نیه وکال تحصیلی اوچون محض آذربایجانی، هم ده اوزیر حاجی‌بیلی آدینا باکی موسیقی آکادمیاسینی سئچدینیز؟

- اساس سبب داهی بستکاریمیز اوزیر حاجی‌بیلینین اسرارانگیز اثرلری اولوب. اونون اثرلرینی او قدر سئویرم کی، حیاتدا امیدیمی ایتیرنده، ساده‌جه «کوروغلو» اوورتوراسینی، یاخود بسته‌کارین دیگر اثرلرینی دینله‌مک اؤزومو اله آلماغا کفایت ائدیر. قوزئی آذربایجاندا آنا دیلینده تحصیل آلماق دا خصوصی اولاراق بیز گونئی‌لیلر اوچون اؤنم داشییر. بونو دا قید ائتمک ایستیرم کی، من وکال اوزره تحصیلیمی گئج باشلادیغیما باخمایاراق، بو آکادمیادان چوخ فایدالاندیم. بیلیرم کی، بو گلیش حیاتیم اوچون بؤیوک و اعلا تاثرات ایله نتیجه‌لنه‌جک.

- گله‌جک اوچون هانسی پلانلارینیز وار؟

- اؤنجه‌لیکله، تحصیلیمی داوام ائتدیرمیی دوشونورم. بوندان علاوه، چالیشیریق گونئی‌ده آذربایجانین موسیقیلی کمدیالارینی صحنه‌لشدیرک. بونا گؤره، دوزو، ایشی مالیه‌لشدیرمک ده لازمدیر. هم ده گونئیلی ووکالچیلاریمیزلا همکارلیغی دوشونورم. بیر ده کی، من بستکارلیغا دا هوسلییه‌م. چونکی منده ملودیالار بداحتا، شعر کیمی دوغولور. بو ساحه‌ده چوخ آددیملار آتمیشام و داوام ائدیرم.

- ایران موسیقی صنعتینده حاضردا هانسی چاتیشمازلیقلار وار؟

- ایراندا دولتین موسیقییه اهمیت وئرمه‌مه‌سی، دیگر طرفدن آغلاسیغماز قاداغالارین قویولماسی موسیقی صنعتینین پداگوژی طرفینی چوخ جدی پروبلملرله اوزلشدیریب. خصوصیله، آکادمیک سولو اوخوما صنعتی برباد وضعیتده‌دیر. اپرا صنعتی ایسه تمامیله سقوط ائدیب. ایراندا پشه‌کار موسیقی مکتبینین اولماسینا باخمایاراق، مرکزدن کنار شهرلرده پداگوژی چرچیوه‌نین یوخلوغو بیر سیرا آرزواولونماز نتیجه‌لره یول آچیر. مثلاً، اؤزل موسیقی مکتبلری طلبه‌لرین موسیقی تربیه‌سینده سهوه و یانلیشلیغا یول وئریرلر.

- موسیقی صنعتینه یئنی آددیملایانلارا هر هانسی توصیه‌نیز وارمی؟

- بیز گونئی‌لیلرین اوزرینده جدی مسئولیت وار. موسیقی ساحه‌سینده چوخ ایشلر گؤرمییمیزی ضروری حساب ائدیرم. بو اوزدن گونئیلی باجی-قارداشلاریمیزا توصیه ائدیرم کی، موسیقینی پروفسیونال شکیلده اؤیرنمه‌یه جهد گؤسترسینلر.