کیمی‌سی آرتیق چکی‌دن خلاص اولماق دردینده‌دیر، کیمی‌سی ایسه بو وضعیتی فورصت بیلیب هئچ بیر علمه اساسلانمایان اصوللارلا اینسانلارین ساغلام‌لیغی ایله اویناییرلار.

دوغرودانمی ۱ هفته‌ده ۵ کیلو آریقلاماق اولار؟ تورکییه‌لی دیتولوق تورقای کؤسه بو سوالا قطعی اولاراق "خئیر!" جوابینی وئریب. نیه‌سینی ایسه بئله ایضاح ائدیر:

"هر گون مطبوعات و موختلیف سوسیال شبکه‌لرده معجزه پهریزلرله قارشیلاشیریق. یاخشی، بو قدر چوخ پهریز سیاهی‌سی وارکن نیه اینسانلارین آرتیق چکی پروبلئمی هله ده وار؟ چونکی بو پهریزلر ایلک واختلاردا سرعتلی چکی ایتکیسینه سبب اولسا دا، قیسا مدتدن سونرا بو کیلولار آرتیقلاماسی ایله گئری قاییدیر. بو جور پهریزلر ساغلاملیغا ضرر وئریر، ماده‌لر موبادیله‌سینی پوزور، عینی زاماندا عؤمرو قیسالدیر. اونسوز دا حیات طرزینه اویغون اولمایان هئچ بیر شئی اوغورلو اولمور. بو جور پهریزلرده اصلینده آغیرلیق ایتکیسی بدنده‌کی یاغ کوتلسینین آزالماسینا سبب اولور. چکی ایتکیسینین سرعتله باش وئرمه‌سی اولجه سو، سونرا عضله کوتله‌سینین آزالماسی ایله علاقداردیر. عضله و سو کوتله‌سینین ایتکیسی ایسه ساغلاملیق باخیمین‌دان ریسکلیدیر".

پهریز فردی اولمالیدیر

حکیم بیلدیریر کی، پهریز موطلق فردی کاراکتر داشیمالیدیر. چونکی هر کسین ماده‌لر موبادیله‌سی بیر-بیریندن فرق‌لیدیر، عینیله بارماق ایزی کیمی: "مولتیفاکتوریال بیر خسته‌لیک اولان کؤکلویون معالیجه‌سینه فردی یاناشماق لازیمدیر. تئراپییا متخصصی و یا اندوکرینولوق، دیئتولوق، فیزیوتئراپئوت و پسیخولوقلاه قروپ حالیندا معالیجه داها اوغورلو نتیجه وئره بیلر. معاصر زاماندا بیر چوخ خرونیکی خستلیین تمل سببی اولان آرتیق چکینین معالیجه‌سینده دیئتولوق ان صلاحیت‌لی شخص‌دیر. حکیم خسته‌نی معایینه ائدیر، دیاقنوز قویور، دیئتولوق آدامین خصوصیتلرینه اویغون اولاراق قیدالانما مودئلی تعیین ائد‌رک آرزو ائدیله‌ن چکییه دوشمه‌سینی تعمین ائدیر".

آریقلاما پروگراملاری اینسانین فردی خصوصیتلری - یاش، جینسیت، بوی اوزونلوغو، بدن چکیسی، فیزیکی فعالیت سوییه‌سی، قیدالانما وردیشلری و س. ایله باغلیدیر. خصوصیتلرینه گؤره فردین یئنی قیدالانما پروقرامینی اونون حیات طرزی حالینا گتیرمه‌سینی تعمین ائتمک لازیمدیر: "اونوتماق اولماز کی، آیدا ۶ کیلو و داها چوخ آریقلاماق متابولیک اولاراق باشقا ساغلاملیق پروبلملرینه زمین یارادیر. ایلک نؤوبه‌ده صبرلی اولماق شرط‌دیر. اینسان ایللرله ییغدیغی چکینی بیر نئچه هفته‌ده وئرمه‌یه چالیشمامالی‌دیر. بونون اوغرون‌دا آج قارینا قریپفروت و یا لیمون سویو ایچمک، بالقاباق تومو یئمک، موختلیف یوسون حبلری، آریقلادان چایلارا اومید ائتمیین هئچ بیر علمی اساسی یوخدور. عکسینه، فایدادان چوخ ضررلری وار. انرژی ترکیبی آشاغی اولان پهریزلر و هزم سیستمینه ائدیلن جراحی موداخیله‌لر قیدا المنتی چاتیشمازلیقلاری، زولال ایتکیسی نتیجه‌سینده بؤیرک و اورک پروبلملری، اورک چاتمازلیغینا، حتی اؤلومه گتیریب چیخاریر".

چکی ایتکیسی ۲-۴ کیلو آراسیندا اولمالیدیر

عومومدونیا ساغلاملیق تشکیلاتی آیلیق آغیرلیق ایتکی‌سینین ۲-۴ کیلو آراسیندا اولماسینی وورغولاییر. بیر اینسان چوخ کؤکدورسه، عملیات اولوناجاقسا، آنستزییا ریسکینی آزالتماق اوچون حکیم و دیتولوق نظارتی ایله آیدا ۶ کیلو آریقلایا بیلر: "یوخسا کیمسه ۲۰ ایلده آلدیغی چکینی ۲۰ گونده وئرمه‌یه جهد ائتمه‌مه‌لیدیر. صبرله معالیجه‌نی اوستون توتماق لازیمدیر. آریقلاماق علمه اساسلانمالیدیر. تراپوت، اندوکرینولوق نظارتی آلتین‌دا قان آنالیزینین نتیجه‌لری موذاکیره ائدیلیر و دیئتولوق تیببی قیدالانما موالیجه‌سینی تعیین ائدیر. مشق و داورانیش آکتیولیگی ده واجیب‌دیر. ۳ آی مدتین‌ده پهریز، مشق و داورانیش دییشیکلیگی تطبیق ائدیلمه‌دن درمان معالیجه‌سی و یا جراحی موداخیله ائدیلمه‌مه‌لیدیر. آرتیق چکی خسته لیینین معالیجه‌سین‌ده تک باشینا پهریز قطعی اولماز. اونوتمایین کی، تکجه پهریز کیفایت ائتمیر، مشق، ایدمان و آکتیولیک ده واجیبدیر".